“Ang Talan-awon Niining Kalibotana Nagakausab”
Tambong ug Paminaw sa Pakigpulong Publiko
“Ang Talan-awon Niining Kalibotana Nagakausab”
KINI MAOY PANAHON SA KASAMOK. Ang mga hitabo nga nakapatay-og sa kalibotan morag nagsunodsunod sa pagkahitabo nga hilabihan ka paspas. Nabug-atan ka ba ug nalibog niining tanan—nga ang tanang butang sa imong palibot kusog kaayong nagakausab?
Ang Bibliya naundan niining maalamong obserbasyon maylabot sa mga kalihokan sa katawhan: “Ang talan-awon niining kalibotana nagakausab.” (1 Corinto 7:31) Si apostol Pablo, nga maoy nagsulat nianang mga pulonga, nagtandi sa mga hitabo sa kalibotan ngadto sa nag-usab-usab nga mga talan-awon diha sa entablado sa usa ka teatro. Latas sa kasaysayan, ang mga lider sa kalibotan ug ang mga tigpasiugdag bag-ong estilo nanungha ug nangahanaw sa entablado sa kalibotan, nga ang daan kanunayng ilisan ug bag-o. Apan sa atong adlaw—ilabina sukad sa hinungdanong tuig nga 1914—ang pag-usab-usab morag nagkakusog.
Apan, nahibalo ka ba nga kining mga kasamok sa kalibotan—bisan ang kinabag-ohang nahitabo—nagpasabot usab ug maayong balita alang sa katawhan? Oo, sa pagkatinuod kini naglangkob sa pamatuod nga ang talan-awon sa kalibotan moarang-arang sa dili madugay. Ang Bibliya dugay nang nagtagna sa grabeng kalisdanan sa atong panahon. Gipatin-aw usab niini nga kanang tanang kasamok maoy pasiuna lamang sa kinadak-ang kausaban nga makaapektar sa tibuok tawhanong katilingban. Kining taliabot nga dakong kausaban, bisan tuod makahahadlok pamation, maoy usa gayod ka maayong balita alang sa matinud-anog-kasingkasing nga mga tawo sa tanang dapit. Ang talan-awon niining kalibotana mausab ug mahimong malinawon ug malipayon alang sa tawhanong pamilya.
Buot ba nimong mahibalo ug dugang bahin niining maong mga kausaban ug kon sa unsang paagi gipatin-aw kini sa Bibliya? Mainiton ka namong gidapit nga motambong sa pakigpulong publiko nga nag-ulohang “Ang Talan-awon Niining Kalibotana Nagakausab,” diha sa distritong mga kombensiyon sa mga Saksi ni Jehova nga magsugod sa sunod bulan. Ang mga kombensiyon pagahimoon sa gatosan ka dapit sa tibuok kalibotan. Aron mahibaloan ang kombensiyon nga labing duol kanimo, palihog kontaka ang mga Saksi ni Jehova sa inyong dapit.
[Hulagway sa panid 32]
Usa ka bomba atomika nagpayhag sa Hiroshima, 1945
[Credit Line]
Ang Paril sa Berlin nalumpag, 1989
[Hulagway sa panid 32]
Pag-atake sa mga terorista sa World Trade Center sa New York, 2001
[Credit Line]
USAF photo
[Hulagway sa panid 32]
AP Photo/Lionel Cironneau