Gikan sa Among mga Magbabasa

Mga Magtutudlo Ako nagtudlo sa elementarya sulod na sa upat ka tuig, ug nalipay ako sa pagbasa sa serye nga “Mga Magtutudlo​—Mag-unsa na Lang Kita Kon Wala Sila?” (Marso 8, 2002) Usa ka makapabalaka nga kiling nga akong namatikdan mao nga ang mga bata wala masayod sa kalainan tali sa husto ug sayop. Usa ka problema usab kon ang mga bata bug-os nga makasabot sa ilang mga katungod sa dili pa sila mahibalo sa ilang mga responsabilidad. Bisan pa niana, ang pagtudlo maoy usa ka magantihong karera, ilabina kon ang mga estudyante naikag nga mokat-on ug nagauswag.

J. K., Tinipong Bansa

Salamat niining mga artikuloha. Nagtabang kini kanako nga makasabot kon unsa ka daghang sakripisyo ang ginahimo sa mga magtutudlo alang kanato, bisan pag kasagaran kita walay gihimong sakripisyo alang kanila.

S. M., Italya

Otso anyos ang akong edad. Ang inyong mga artikulo bahin sa mga magtutudlo nagtabang nako nga masabtan nga gimahal sa mga magtutudlo ang mga estudyante. Malipay sila sa pagtudlo sa mga bata, bisan pag kini malisod. Akong gihatagan ang akong magtutudlo ug sulat sa pagpasalamat. Ang akong kuwatro-anyos nga igsoong babaye ug ako nagtuon sa pagtudlo sa mga tawo bahin kang Jehova​—bisan pag malisod kini usahay​—tungod kay among gihigugma ang mga tawo.

T. M., Tinipong Bansa

Upat ka tuig human ako mohunong sa pagtudlo, dihay usa ka estudyante nga misulat nako nga nagpahayag sa iyang apresasyon sa mga panahon nga siya akong gitabangan. Gisukipan niya kini ug bookmark nga siya mismo ang naggama. Inyong mahanduraw ang akong dakong kalipay sa pagkadawat nianang sulata!

A. R., Slovenia

Akong gihatag kini nga magasin ngadto sa prinsipal ug duha ka magtutudlo diha sa tunghaan sa akong mga anak. Akong gipalabay ang duha ka adlaw una mibalik aron makuha ang ilang opinyon. Mihangyo sila ug dugang 20 ka magasin sa Kinatsila ug Iningles aron ihatag ngadto sa mga ginikanan.

M. M., Tinipong Bansa

Sa miaging tuig nagtrabaho ako ingong usa ka magtutudlo sa elementarya sulod sa upat ka bulan. Ang ubang mga magtutudlo nga akong nakauban miingon nga ang kawalay apresasyon sa mga ginikanan nagpalisod sa ilang trabaho ingong mga magtutudlo. Busa malipayon gayod ako nga gipabilhan pag-ayo niining seryeha ang buluhaton sa dedikadong mga magtutudlo. Sa dihang natapos ang gitagal nga panahon sa akong pagtudlo, nakadawat ako ug daghang sulat sa pasalamat gikan sa akong mga estudyante. Gipabilhan gayod nako ang matag usa niini!

S. I., Japan

Pagsakay ug Balon Daghan kaayong salamat alang sa inyong nindot nga artikulong “Naglupad Uban sa Hangin.” (Marso 8, 2002) Ang pagsakay ug balon dugay na nakong pangandoy, pero wala pa kini matuman. Apan, ang pagbasa sa inyong artikulo medyo nakahulip niini tungod kay morag misakay usab ako niini! Ako gayong “gibati” nga mialsa ang basket ug nagtabyogtabyog. Gamay na kaayong tan-awon ang kalibotan gikan didto, apan kini ug ang mga tawo hinungdanon kang Jehova.

S. A., Alemanya

Mga Pagbati nga Sad-an Gikinahanglan ko gayod ang artikulong “Ang Hunahuna sa Bibliya: Mga Pagbati sa Pagkasad-an​—Kanunay Bang Daotan?” (Marso 8, 2002) Tungod kay taas kaayo ang akong mga pagdahom, nalisdan ko sa pagkontrolar sa akong emosyon sa dihang makiglabot sa akong kauban sa bug-os-panahong pag-ebanghelyo. Apan gipakita niining maong artikulo nga kon kanunay natong ipabati ngadto sa uban nga sila sad-an kon dili nila himoon ang mga butang sumala sa atong gihunahuna nga maoy hustong paagi, kini dili mahigugmaon ug dili mabungahon. Nalipay ko nga akong nausab ang akong panglantaw. Palihog ipadayon sa pagtudlo kanamo ang panglantaw ni Jehova.

K. K., Japan