Kinsay Magpatunghag Dumalayong Pakigdait?

NGANONG wala tubaga sa Diyos ang mga pag-ampo alang sa pakigdait nga gilitok sa mga lider sa nagkalainlaing relihiyon sa kalibotan? Ang Bibliya adunay makapaikag kaayong tubag. Dili kay ang Diyos walay interes sa pakigdait​—mas kusganon ang iyang tinguha alang sa pakigdait kay sa mga klerigo nga nag-ampo bahin niana. Ngani, ang Diyos naghimo nag tinong mga kahikayan sa pagpatungha sa pakigdait sa kalibotan. Naghimo na siyag determinadong mga tikang sa pagkab-ot nianang tumonga. Sa tin-aw, iya nang gisulti ang iyang mga intensiyon ngadto sa katawhan. Apan, ikasubo, ang mga relihiyon sa kalibotan wala gayod magpakabana sa gisulti sa Diyos.

Dugay na kanhi ang Diyos nagsaad ug usa ka “binhi,” usa ka magmamando, nga progresibong gihubit diha sa Bibliya, nga nagtaganag dugang mga impormasyon kon kinsa siya. (Genesis 3:15; 22:18; 49:10) Ang manalagnang si Isaias, nga ilado tungod sa iyang talagsaong mga tagna bahin sa Mesiyas, misulat nga kining gitagnang Lider mahimong “Prinsipe sa Pakigdait” ibabaw sa yuta ug nga ilalom sa iyang pagmando, ‘dili matapos ang pakigdait.’ (Isaias 9:​6, 7) Isip langitnong Magmamando, siya mosalga aron laglagon ang pagkadaotan ug himoon ang yuta nga usa ka paraiso, nga wala nay inhustisya, sakit, kakabos, o kamatayon. Ang pakigdait ug walay-kataposang kinabuhi molungtad. (Salmo 72:​3, 7, 16; Isaias 33:24; 35:​5, 6; Daniel 2:44; Pinadayag 21:4) Kanus-a kini mahitabo?

Pakigdait sa Kalibotan Haduol Na

Giingnan ni Jesus ang iyang mga tinun-an nga ang kalaglagan niining daotang sistema sa mga butang ug ang pagsugod sa bag-ong tawhanong katilingban pagaunhan sa talagsaong sunodsunod nga makatay-og nga mga panghitabo sa kalibotan, nga ang tanan mahitabo sulod sa samang yugto sa panahon. (Mateo 24:​3, 7-13) Daghan niining mga hitaboa​—sama sa mga gubat, kanihit sa pagkaon, linog​—nahitabo sa popanahon sa matag yugto sa panahon. Apan, wala gayod kini maghampak sa katawhan nga dungan sa tibuok kalibotan sama sa atong panahon. Ug ang mga epekto sa maong mga kalamidad mas malaglagon kay sa kaniadto kay nagdasok na karon ang mga tawo sa kalibotan.

Ang laing hitabo nga gitagna sa Bibliya mao ang padayong pagdaot sa tawo sa kalikopan. (Pinadayag  11:18) Dugang pa, sa dili pa ang gitagnang kalaglagan, ang tibuok-kalibotang buluhaton sa pagpasidaan kinahanglang mahuman, ang pagsangyaw sa “maayong balita sa gingharian.” Karon ang mga Saksi ni Jehova nagahimo niana sa tibuok-kalibotan.​—Mateo 24:14.

Ang katumanan sa maong mga tagna maoy maayong balita alang sa matinumanong katawhan. Ang gitagnang bag-ong kalibotan nga may bug-os nga pakigdait haduol na! Kana ang garantiya sa bug-os nga pagkahanaw sa pagdumot ug terorismo. Ang Bibliya nagsaysay: “Dili sila magadaot ni magagun-ob sa tibuok nakong bukid nga balaan; tungod kay ang yuta mapuno sa kahibalo kang Jehova ingon sa katubigan nga nagtabon sa dagat mismo.”​—Isaias 11:9.

Mga Pag-ampo nga Patalinghogan sa Diyos

Ang pag-ampo sa Diyos usa gayod ka mapuslanon ug makahuloganong seremonyas. Sa Bibliya, si Jehova gitawag nga “Tigpatalinghog sa pag-ampo.” (Salmo 65:2) Busa, sa bisan unsang panahon, siya maminaw sa daghang pag-ampo nga litokon sa sinserong mga tawo sa yuta. Apan, duna bay mga kinahanglanon nga angayng kab-oton aron dunggon ang mga pag-ampo? Ang Bibliya nag-ingon nga ang matinud-anog-kasingkasing nga mga tawo nga makakat-on sa mga kamatuoran sa Bibliya bahin sa Diyos kinahanglang mosanong niini, nga mahimong “matuod nga mga magsisimba,” nga magsimba kaniya ‘sa espiritu ug kamatuoran.’ (Juan 4:23) Ang mga pag-ampo niadtong dili motahod sa iyang mga kinahanglanon dili pagadunggon: “Siya nga nagapahilayo sa iyang igdulungog gikan sa pagpamati sa balaod [sa Diyos]​—bisan ang iyang pag-ampo maoy dulumtanan.”​—Proverbio 28:9.

Ikasubo, daghang lider sa relihiyon karon wala magtudlo ni mag-ampo bahin sa katuyoan sa Diyos sa pagpatunghag pakigdait. Hinunoa, nag-ampo sila nga ang tawhanong mga kagamhanan makasulbad sa mga suliran, bisan pag ang Pulong sa Diyos tin-awng nag-ingon nga “dili iya sa tawo nga nagalakaw bisan ang pagtultol sa iyang lakang.”​—Jeremias 10:23.

Gitagna nga “sa kaulahiang bahin sa mga adlaw,” sa atong panahon, ang mga mahigugmaon sa pakigdait magaganayan ngadto sa simbolikong “bukid sa balay ni Jehova”​—buot ipasabot, ngadto sa matuod nga pagsimba. Ang maong mga tawo maghimog dagkong kausaban sa ilang kinabuhi: “Ilang pagasalsalon ang ilang mga espada nga mga punta sa daro ug ang ilang mga bangkaw nga mga galab. Usa ka nasod dili mobakyaw sa espada batok sa usa ka nasod, ni makakat-on pa sila sa gubat.”​—Isaias 2:2-4.

Duna bay grupo sa mga magsisimba karon nga naningkamot pagtuman nianang mga pulonga? O ang tanang relihiyon naghisgot ba lamang ug pakigdait samtang nagpasiugda ug gubat? Sa sunod panahon nga makahibalag kag mga Saksi ni Jehova, ikaw gidapit nga makighisgot kanila bahin sa pakigdait ug sayra kon unsang relihiyona ang nag-edukar sa mga tawo nga magmakigdaiton sa tanan.