Talagsaong Panagkita Pag-usab Human sa 30 ka Tuig

NIADTONG 1967 duha ka batan-ong lalaki sulagmang nagkita. Sila gitudlo ingong kauban sa kuwarto diha sa Michigan Technical University sa Tinipong Bansa. Si Dennis Sheets, nga taga-Lima, Ohio, 18-anyos niadtong panahona nga anaa sa primerong ang-ang sa kursong forestry. Ang 20-anyos nga si Mark Ruge taga-Buffalo, New York. Siya anaa sa ikatulong ang-ang sa kursong civil engineering.

Niadtong panahona, ang ilang panaghigalaay morag mikilab lang. Wala ipadayon sa mga batan-on ang ilang pagtuon diha sa unibersidad; nag-iyaiya sila pagpangagpas sa ilang mga tinguha. Milabay ang kapin sa katloan ka tuig. Dayon, usa ka adlaw sa Dominican Republic, ang duha nagkita pag-usab. Sa usa ka paagi, sulagma kining ilang hinanaling panagkita pag-usab. Apan dunay laing hinungdan sa ilang wala-damhang panagkita pag-usab. Unsa kana? Aron mahibaloan ang tubag, atong sundan ang dalan sa ilang kinabuhi.

Si Dennis Nagsundalo

Si Dennis mipauli human sa iyang unang tuig sa kolehiyo. Dayon, sa Disyembre 1967, siya girekluta sa Armi sa T.B., ug sa Hunyo 1968, gipadala ngadto sa Vietnam. Didto nakita niya ang makalilisang nga mga buhat sa gubat. Sa dihang natapos ang iyang asaynment sa militar sa 1969, siya mipauli sa Tinipong Bansa, ug sa ulahi nakakitag trabaho sa usa ka dakong kompaniya sa Ohio. Apan, dili siya malipayon.

“Ang akong pangandoy sa bata pa mao ang pagbalhin ngadto sa Alaska ug manag-iyag uma,” miingon si Dennis. Mao nga sa 1971 siya ug usa ka higala sa hayskul miadto sa pagkab-ot sa maong pangandoy. Apan, imbes makapanag-iyag uma, lainlaing trabaho nga gamay rag suweldo ang iyang nasudlan. Nakapuyo siya ug makadiyot sa tolda ug nakatrabaho ingong bombero sa kalasangan. Nagpataas siya sa iyang bungot ug buhok ug nagsugod sa pagtabakog marijuana.

Sa 1972, si Dennis mipahawa sa Anchorage aron sa pagtan-aw sa Mardi Gras sa New Orleans, Louisiana. Human niana, nagtukod siya ug gamayng payag sa kakahoyan sa Arkansas. Didto nagtrabaho siya sa pagtukod sa gambalay sa mga balay ug tigsemento. Sa Hunyo 1973, si Dennis milibot sa nasod pinaagi sa pagsakayg libre aron sa pagsusi kon makakaplag ba siya ug katuyoan sa kinabuhi.

Si Mark Nalangkit sa Batok-Gubat nga Kalihokan

Si Mark nagpadayon sa pag-eskuyla sa unibersidad sa pipila ka semestre human miundang si Dennis apan mihukom nga dili siya buot makigbahin sa sistema nga nagasuportar sa gubat. Busa mipauli siya sa Buffalo, diin didto nagtrabaho siya makadiyot ingong kapatas sa usa ka planta sa asero. Kay wala gihapon malipay sa mga kalihokan sa gubat, miundang siya sa iyang trabaho, mipalit ug motorsiklo, ug gitadlas niya ang nasod paingon sa San Francisco, California. Walay kalibotan si Dennis ug si Mark nga niadtong higayona, didto sila sa San Francisco sa makadiyot sa samang panahon.

Sama kang Dennis, si Mark nagpataas sa bungot ug buhok ug nagsugod sa pagtabakog marijuana. Apan si Mark nalinga pag-ayo sa batok-gubat nga kalihokan, nga nag-apil-apil sa mga protesta ug mga martsa. Gipangita siya sa FBI tungod sa paglikay sa pagsundalo, busa pipila ka tuig nga naggamit siyag  mga alyas aron dili masakpan. Siya nagsubay ug hippie nga estilo sa kinabuhi sa San Francisco. Didto, sa 1970, duha ka Saksi ni Jehova nanuktok sa iyang pultahan.

Si Mark nag-asoy: “Tingali nagtuo sila nga nagpakita ako ug gamayng interes, busa sila mibalik. Wala ako sa balay, apan nagbilin sila ug berdeng Bibliya ug tulo ka libro.” Apan, si Mark nalinga pag-ayo sa politikanhong mga isyu ug sa kalingawan mao nga wala siyay panahon sa pagbasa niini. Dugang pa, gigukod siya sa FBI. Migamit ug laing alyas, mibalhin siya sa Washington, D.C. Ang iyang trato, si Kathi Yaniskivis, nga iyang nakaila sa unibersidad, miapas kaniya didto.

Sa kataposan, sa 1971, nadakpan sa FBI si Mark. Gikuyogan siyag duha ka detektib sa FBI sakay sa ayroplano gikan sa Washington, D.C., paingon sa New York ug naneguro nga makalarga siya paingon sa Toronto, Canada. Seguro ang FBI wala maglantaw kaniya nga hulga sa kalinaw sa katilingban; buot lang nila nga mohawa siya sa nasod. Pagkasunod tuig siya ug si Kathi nagpakasal, ug mibalhin sila sa Gabriola Island, sa British Columbia, Canada. Buot nilang magpalayo sa katilingban, apan ilang gibati nga aduna gayoy kahulogan ang kinabuhi.

Sila Nahimong mga Saksi

Si Dennis, sama sa imong mahinumdoman, naglibotlibot sa nasod nga tigsakayg libre nga nangitag kahulogan sa kinabuhi. Sa iyang paglibot nakaabot siya sa Montana, diin didto nakakita siya ug trabaho sa gawas sa Chinook nga mitabang sa usa ka mag-uuma panahon sa pag-anig lugas. Ang asawa ug anak nga babaye sa lalaki maoy mga Saksi ni Jehova. Si Dennis gihatagan ug usa ka magasing Pagmata! aron mabasa. Wala magdugay, siya nakombinsir nga ang mga Saksi mao ang nagsubay sa tinuod nga relihiyon.

Gidala ang Bibliya, si Dennis mihawa sa uma ug mibalhin ngadto sa Kalispell, Montana. Didto mitambong siya sa unang higayon sa tigom sa mga Saksi ni Jehova. Mihangyo siya ug pagtuon sa Bibliya sa maong tigom. Wala magdugay human niadto, nagpatupi siya ug namalbas sa iyang bungot. Sa Enero 1974 nakigbahin siya sa buluhatong pagsangyaw sa unang higayon, ug gibawtismohan sa biawan alang sa mga hayop sa Polson, Montana, sa Marso 3, 1974.

Kasamtangan si Mark ug Kathi, nga nagpuyo sa Gabriola Island, mihukom nga mosulay sa pagsusi sa Bibliya kay may panahon man sila. Sila nagsugod sa pagbasa sa King James Version apan naglisod sa pagsabot sa kinaraang Iningles. Dayon si Mark nakahinumdom nga anaa pa kaniya ang Bibliya ug mga libro nga gihatag kaniya sa mga Saksi sa nangaging mga tuig. Ilang gibasa ang Bibliya uban sa mga librong Ang Kamatuoran nga Motultol sa Kinabuhing Dayon ug Tinuod ba nga Pulong sa Diyos ang Bibliya? Si Mark ug Kathi naikag pag-ayo sa ilang nakat-onan.

Si Mark nag-asoy: “Naikag gayod ako sa gihisgotan sa librong Kamatuoran bahin sa usa ka grupo sa mga Kristohanon nga dili makiggubat sa bisan unsang mga kahimtang. Nagtuo ako nga kini mao ang nagsubay sa matuod nga Kristiyanidad.” Wala magdugay, si Mark ug Kathi mibalik sa Houghton, Michigan, sa pagduaw sa pamilya ni Kathi​—bisan pa sa kapeligrohang dakpon. Didto, bisag mga hippie gihapong tan-awon, sila mitambong sa tigom sa mga Saksi. Gidawat nila ang pagtuon sa Bibliya ug nagtuon nianang bulana nga didto sila sa Michigan.

Sa dihang namauli sila sa Gabriola Island, nakahibalag sila ug Saksi sa dalan sa Nanaimo, British Columbia, ug miingon nga gusto sila nga magtuon sa Bibliya. Niana mismong adlawa usa ka kotse nga puno sa mga Saksi miabot sakay sa lansa aron sa pagpakigkita kanila, ug usa ka pagtuon sa Bibliya ang nasugdan. Tulo ka bulan sa ulahi, si Mark ug Kathi nagsugod sa pagsangyaw. Tulo ka bulan human niana, sa Marso 10, 1974, silang duha gibawtismohan. Kadto maoy usa ka semana human nga gibawtismohan si Dennis!

Si Dennis sa Bug-os-Panahong Pag-alagad

Si Dennis nahimong usa ka payunir, o bug-os-panahong ministro, sa Septiyembre 1974. Siya miingon: “Malipayon ako nga nagpayunir, apan buot kong magpalambo pa sa akong ministeryo; busa sa Hulyo 1975, miaplay ako sa pag-alagad sa hedkuwarter sa mga Saksi ni Jehova sa tibuok kalibotan sa Brooklyn, New York. Niana nga Disyembre gidapit ako didto.”

Ang unang asaynment nga gihatag kang Dennis mao ang pagtabang sa paghimo sa Towers Hotel kaniadto nga usa ka puy-anan alang sa mga trabahante sa hedkuwarter. Daghang tuig nga nagtrabaho siya didto, nga nagdumala sa mga tighan-ay ug mga baldosa. Unya, kay buot magminyo, siya mibalhin sa California. Sa 1984, samtang nag-alagad ingong ansiyano sa Cathedral City nga kongregasyon, gipakaslan  niya ang usa ka payunir nga ginganlag Kathy Enz.

Si Dennis ug Kathy determinado sa paghimo sa ilang kinabuhi nga yano aron makapangagpas sa intereses sa Gingharian sa Diyos. Busa, balibaran kanunay ni Dennis ang mga higayon nga makasapig daghan diha sa kusog nga negosyo labot sa konstruksiyon sa habagatang California. Sa 1988 siya ug si Kathy miaplay sa pagtabang sa internasyonal nga buluhaton sa pagpanukod sa mga Saksi ni Jehova. Sa Disyembre nianang tuiga, sila nakadawat ug asaynment sa pagtrabaho sa pagpanukod nga proyekto sa sanga sa Buenos Aires, Argentina.

Sa 1989, si Dennis ug Kathy gidapit sa pag-alagad ingong permanenteng mga membro sa buluhaton sa pagpanukod sa mga Saksi ni Jehova. Niining linaing matang sa bug-os-panahong pag-alagad, sila duha ka beses nga nakaalagad sa Suriname ug Colombia. Sila usab nakatrabaho sa pagtukod sa sanga sa Ecuador ug Mexico, maingon man sa samang proyekto sa Dominican Republic.

Si Mark Misulod sa Bug-os-Panahong Pag-alagad

Sa 1976, si Mark, uban sa libolibo pang ubang batan-ong mga lalaki sa Amerika nga mikalagiw ngadto sa Canada aron dili marekluta sa pagkasundalo, gihatagan ug amnestiya sa kagamhanan sa T.B. Siya ug ang iyang asawa, si Kathi, nagtinguha usab sa paghimo sa ilang kinabuhi nga yano aron makagugol ug mas daghang panahon sa ilang ministeryo. Busa, si Mark nagtrabahog partaym ingong surveyor, ug anam-anam nga gibayran nila ni Kathi ang ilang mga utang nga wala mabayri sa wala pa sila magpabawtismo.

Sa 1978, sa dihang ang mga Saksi sa Canada nagplano sa pagtukod ug bag-ong bilding sa sanga duol sa Toronto, Ontario, si Mark ug Kathi anaa sa kahimtang sa pagtanyag sa ilang mga serbisyo. Sanglit si Mark maantigong mosukod ug yuta, sila gidapit sa buluhaton sa pagpanukod. Sila nagtrabaho sa proyekto sa Georgetown hangtod nga kini natapos sa Hunyo 1981. Human niana, sila mibalik sa British Columbia ug sa sunod nga upat ka tuig mitabang sa pagtukod ug usa ka Assembly Hall sa mga Saksi ni Jehova didto. Sa dihang kini natapos, sila gidapit ug balik sa pagtrabaho sa dugang nga pagpanukod sa sanga sa Canada.

Sa 1986, human sa pipila ka bulan sa Georgetown, si Mark ug Kathi gidapit sa pagpabilin ingong regular nga mga membro sa sanga sa Canada. Sila nakaalagad sa sanga sukad niadto ug daghang higayong nakabahin sila sa buluhatong pagpanukod diha sa daghang ubang mga nasod. Tungod sa kahibalo ni Mark sa pagsukod ug yuta, siya gigamit sa pagsukod sa yuta nga pagatukoran sa mga bilding sa sanga ug sa mga Assembly Hall sa mga Saksi ni Jehova sa Amerika del Sur ug Sentral Amerika ug sa mga isla sa Caribbeano.

Sa daghang tuig, siya ug si Kathi nag-alagad sa Venezuela, Nicaragua, Haiti, Guyana, Barbados, sa Bahamas, Dominica, Tinipong Bansa (Florida), ug sa Dominican Republic. Tungod niining linaing matang sa bug-os-panahong ministeryo, si Mark ug Dennis nagkita pag-usab.

Nagkita Pag-usab sa Dominican Republic

Wala lamang mahibalo niana, si Mark ug Dennis nagtrabaho sa susamang mga proyekto sa Dominican Republic. Usa ka adlaw sulagmang nagkita silang duha diha sa mga pasilidad sa sanga sa mga Saksi ni Jehova sa Santo Domingo. Sama sa imong mahanduraw, nalipay kaayo sila nga nagkita pag-usab. Gawas pa, 33 ka tuig na ang milabay ug daghan kaayong butang ang pagaestoryahan. Kay natingala pag-ayo, sila nag-estoryahay sa kaagi sa kinabuhi sama nianang imong mabasa sa ibabaw. Apan ang labing talagsaon niining tanan​—maingon  man ngadto sa tanan nga ilang giestoryahan sa ilang mga eksperyensiya​—mao ang daghang kaamgid nga hitabo sa ilang kinabuhi.

Ang duha nagkinabuhig hippie nga mga estilo sa kinabuhi ug miadto sa hilit nga mga lugar aron malayo sa materyalistikanhon nga modernong paagi sa kinabuhi uban sa tanang kabalaka niini. Si Dennis naminyo sa babayeng ginganlag Kathy; si Mark naminyo sa babayeng ginganlag Kathi. Ang duha ka lalaki midawat sa pagtuon sa Bibliya sa dihang sila unang mitambong sa tigom sa mga Saksi ni Jehova. Ang duha gibawtismohan sa Marso 1974. Ang duha nahimong mga membro sa pamilya sa sanga sa mga Saksi ni Jehova​—si Dennis sa Tinipong Bansa ug si Mark sa Canada. Ang duha naningkamot sa pagpayano sa kinabuhi aron makapangagpas sa espirituwal nga mga tumong. (Mateo 6:22) Ang duha nakaalagad sa internasyonal nga pagpanukod ug nakadawat ug mga asaynment diha sa daghang nasod. Una pa sa ilang sulagmang panagkita didto sa Dominican Republic, ang duha wala gayod makakita sukad ug mga higala kanhi nga midawat sa mga kamatuoran sa Bibliya.

Gilantaw ba ni Mark ug Dennis kining talagsaong panagkaatol ingong kapalaran? Wala gayod. Sila nahibalo nga, sumala sa Bibliya, “ang panahon ug ang wala damhang panghitabo modangat [kanatong] tanan”​—usahay sa makaiikag kaayong mga paagi. (Ecclesiastes 9:11) Apan, sila nahibalo usab nga usa ka butang ang hinungdan sa ilang panagkita pag-usab: ang ilang pagpangitag katuyoan sa kinabuhi ug sa ilang gugma alang kang Jehova nga Diyos.

Ang eksperyensiya ni Dennis ug Mark nagpasiugda usab sa pipila ka butang nga masabog sa tanang matinud-anon-ug-kasingkasing nga mga tawo nga nakakat-on sa kamatuoran sa Bibliya. Si Dennis miingon: “Ang naagian namo ni Mark nagpakita nga si Jehova nahibalo sa mga kahimtang sa kinabuhi sa mga tawo, ug kon ang ilang kasingkasing hustong nakiling, siya magakabig kanila ngadto kaniya.”​—2 Cronicas 16:9; Juan 6:44; Buhat 13:48.

Si Mark midugang: “Ang among eksperyensiya usab nagtudlo kanamo sa pagsabot nga kon ang usa ka tawo magpasibo sa mga sukdanan ni Jehova, magpahinungod sa iyang kinabuhi ngadto kaniya, ug magtanyag sa iyang kaugalingon, mahimong gamiton ni Jehova ang iyang kahibalo ug mga abilidad sa pagpalambo sa matuod nga pagsimba alang sa kaayohan sa iyang katawhan.”​—Efeso 4:8.

Ang ilang eksperyensiya usab nagpakita nga panalanginan ni Jehova ang tibuok-kasingkasing nga pag-alagad sa iyang katawhan. Si Dennis ug Mark mibati gayod nga gipanalanginan. Si Dennis miingon: “Dako kaayong pribilehiyo ang pag-alagad sa intereses sa Gingharian diha sa linain nga bug-os-panahong pag-alagad. Tungod niini napahimuslan namo ang pagdinasigay sa usag usa samtang nag-alagad uban sa Kristohanong mga igsoong lalaki ug babaye gikan sa tibuok kalibotan.”

Si Mark midugang: “Panalanginan gayod ni Jehova kadtong mag-una sa iyang Gingharian. Gilantaw nako nga usa ka linaing panalangin nga makaalagad ingong membro sa pamilya sa sanga sa Canada ug makaalagad sa internasyonal nga pagpanukod.”

Usa ka talagsaong panagkita pag-usab? Oo, tungod kay si Mark miingon: “Ang tinuod nga katarongan kon nganong makalipay kaayo ang among panagkita maoy tungod kay kaming duha nakadangat sa pagkaila, paghigugma, ug pag-alagad sa talagsaong Diyos, si Jehova.”

[Hulagway sa panid 21]

Si Dennis, sa 1966

[Hulagway sa panid 21]

Si Mark, sa 1964

[Hulagway sa panid 23]

Si Dennis sa South Dakota, 1974

[Hulagway sa panid 23]

Si Mark sa Ontario, 1971

[Hulagway sa panid 24]

Si Dennis ug Mark, uban sa ilang mga asawa, wala madugay human sa ilang sulagmang panagkita pag-usab, 2001