Gidapit Kamo sa Pagtambong sa “Masibotong mga Magmamantala sa Gingharian” Distritong Kombensiyon

DINHI SA PILIPINAS lamang, 63 ka kombensiyon ang gieskedyul. Ang unang kombensiyon pagahimoon sa Nobyembre 22-24, 2002, ug ang kataposan pagahimoon sa Enero 10-12, 2003. Lagmit, usa niining tulo-ka-adlaw nga mga panagkatigom​—nga kasagarang himoon sa Biyernes hangtod sa Dominggo​—ipahigayon diha sa siyudad nga duol sa imong gipuy-an.

Ang mga sesyon pagasugdan sa usa ka musika sa alas 8:30 s.b. Sa unang adlaw, ang pangbukas nga pakigpulong pagasundan sa usa ka bahin nga dunay mga interbiyo uban sa mga magmamantala sa Gingharian. Dayon, human sa mga pakigpulong nga “Pagbaton ug Tumang Kalipay Diha Kang Jehova” ug “Ipakita nga Kamo Mapasalamaton,” ang sesyon sa buntag taposon pinaagi sa keynote address nga, “Ang mga Magmamantala sa Gingharian Napukaw sa Tumang Kasibot.”

Ang sesyon sa Biyernes sa hapon maglakip sa tulo-ka-bahin nga simposyum, “Ang Tagna ni Miqueas Nagpalig-on Kanato sa Paglakaw Diha sa Ngalan ni Jehova,” maingon man sa mga pakigpulong nga “Ampingi ang Kaputli Pinaagi sa Pag-amping sa Imong Kasingkasing” ug “Pagbantay Batok sa Panglimbong.” Sa kataposan, usa ka ekselenteng tabang ang itagana may kalabotan sa Kristohanong ministeryo panahon sa kataposang pakigpulong sa maong adlaw, “Simbaha ang Bugtong Matuod nga Diyos.”

Ang sesyon sa Sabado sa buntag maglakip sa tulo-ka-bahin nga simposyum nga “Mga Magmamantala sa Gingharian nga Naghimaya sa Ilang Ministeryo.” Pagasundan kini sa makapadasig nga mga pakigpulong nga “Kon Nganong ‘Mag-ampo nga Walay Hunong’” ug “Ang Espirituwal nga Kabildohay Makapalig-on.” Ang programa sa buntag taposon pinaagi sa pakigpulong sa pahinungod ug bawtismo, nga human niana adunay kahigayonan alang sa kuwalipikadong mga indibiduwal nga mabawtismohan.

Ang programa sa Sabado sa hapon magpasiugda sa kataposang tulo-ka-bahin nga simposyum sa kombensiyon, “Ang Kalidad sa Atong Pagtuo Ginasulayan Pinaagi sa Nagkalainlaing mga Pagsulay.” Ang maong mga bahin motabang sa mga Kristohanon sa pag-atubang sa mga hagit sa paghupot sa neyutralidad. Ang programa sa Sabado matapos pinaagi sa usa ka haylayt sa kombensiyon, ang makapadasig nga pakigpulong nga “Pakigsuod Kang Jehova.”

Ang programa sa Dominggo sa buntag magsentro sa pagtagad nganha sa mga batan-on, nga pagasugdan sa mga pakigpulong nga “May Pagsalig Ka ba Kang Jehova?” ug “Mga Batan-on​—Planoha ang Inyong Kaugmaon Uban sa Organisasyon ni Jehova.” Ang ulahing bahin maglakip ug 20 minutos nga mga interbiyo. Pagasundan kini sa usa ka full-costume nga drama bahin kang Jeremias, kinsa mibalibad nga “ako usa ka bata lamang,” sa dihang gitudlo ingong usa ka manalagna. (Jeremias 1:6) Human niana, usa ka pakigpulong ang magpasiugda sa mensahe nga gipasabot sa drama. Ang programa sa hapon magpasiugda sa pakigpulong publiko nga, “Ang Talan-awon Niining Kalibotana Nagakausab.”

Walay duhaduha nga ang imong kinabuhi matagbaw sa espirituwal pinaagi sa pagtambong nimo sa tibuok tulo ka adlaw. Alang sa dapit sa kombensiyon nga labing duol sa imong gipuy-an, kontaka ang lokal nga Kingdom Hall sa mga Saksi ni Jehova o pagsulat ngadto sa mga magpapatik niining magasina.