Gikan sa Among mga Magbabasa

Mga Linog Akong gibasa ang seryeng panghapin nga “Mga Naluwas sa Linog Nag-asoy sa Ilang Naagoman.” (Marso 22, 2002) Dinhi inyong gikutlo ang usa ka tinubdan nga nag-ingong ang gidaghanon sa “mga linog nga may gikusgong 7.0 ug kapin pa ‘halos mao lang gihapon’ sulod sa ika-20ng siglo.” Apan, gipakita diha sa 1999 World Almanac nga midaghan gayod ang mga linog sa katuigang 1990.

F. A., Italya

Ang “Pagmata!” nagtubag: Sa walay pagdapigdapig bahin niining isyuha, gihisgotan lang sa among artikulo ang gipahayag sa pipila ka seismologist mahitungod sa katibuk-ang pagkasubsob sa mga linog sa ika-20ng siglo. Gipasiugda ang punto nga bisan ug nagtuo ang usa ka tawo nga ang gidaghanon sa mga linog “halos mao lang gihapon,” ang tagna ni Jesus nga gitala sa Mateo kapitulo 24 nagakatuman sa atong panahon. Si Jesus yanong nag-ingon nga mahitabo ang “dagkong mga linog.” ​—Lucas 21:11.

Nakuhaan Sa dihang akong nakita ang artikulong “Nakuhaan Ako sa Akong Gisabak” (Marso 22, 2002), nanglugmaw ang mga luha sa akong mga mata, kay nahinumdom ko sa namatayng bata nga akong gisabak. Dihadiha akong gipasalamatan si Jehova pinaagig pag-ampo tungod sa iyang pagtagana niining gikinahanglan-kaayong impormasyon ug sa kahupayan nga gidulot niini. Makapahupay gayod kanato ang kamatuoran nga sa bag-ong kalibotan sa Diyos, kini dili na gayod mahitabo pag-usab kang bisan kinsa.

J. S., Tinipong Bansa

Nanganak ako ug patay nga bata sa ika-30ng semana sa akong pagsabak. Kadto ang kinagrabehang panghitabo sa akong kinabuhi. Pagkadakong tabang ug kahupayan ang nahatag niining artikuloha, sanglit naghisgot kini sa usa ka ulohan nga kasagarang giisip nga dili angayng hisgotan, ug naghatag usab kini ug mapuslanong tambag.

K. W., Alemanya

Ako usab nakuhaan sa akong gisabak. Sa akong lihok akong gipakita nga morag wala ray nahitabo. Apan sulod sa akong kasingkasing dili ako mahupay, ug sa adlaw-adlaw sa dihang ako mag-inusara, magsige ra kog hilak. Ang kasakit dili tingali mawala samtang naglungtad kining sistemaha. Apan kining artikuloha nakatabang gayod nako.

I. M., Japan

Husto gayod ang inyong giingon nga sa panahon pa lang sa pagsabak, ang inahan ug anak duna nay pagbinatiay sa usag usa. Ang kaguol dili mahanduraw. Milabay na ang 19 ka tuig, apan maghilak gihapon ako tungod sa among wala-mahimugso nga anak.

C. C., Britanya

Nalisdan gayod ako sa pagpakig-estorya niadtong may ingon niana nga kahimtang. Sa dihang akong nasayran nga nakuhaan ang usa ka igsoong babaye sa among kongregasyon, akong gibasa pag-usab ang artikulo ug gisulatan siya ug ang mga apohan, nga nagpahayag sa akong kinasingkasing nga simpatiya.

D. R., Alemanya

Kining artikuloha maoy tubag sa akong mga pag-ampo. Salamat sa pagkamahunahunaon bahin sa kaguol ug kalisod nga maagoman sa usa ka babaye human makuhaan. Samtang nagbasa niini nga artikulo, akong gibati nga morag gihalog ug gihupay ko ni Jehova.

C. P., Tinipong Bansa

Ang akong inahan nakuhaan sa bata nga mao untay sunod nako una pa sa akong manghod nga babaye. Seguradong dako kaayo ang iyang kaguol. Human mabasa ang kahong “Kon sa Unsang Paagi Makatabang ang Pamilya ug mga Higala,” gisulatan dayon nako siya.

M. Y., Japan

Pila ka Kontinente? Sa panid 25 sa Pebrero 8, 2002, nga isyu, kamo nag-ingon nga ang Australia mao ang “kinagamyan nga kontinente sa lima ka kontinente sa kalibotan.” Abi nakog dunay pito ka kontinente.

L. U., Canada

Ang “Pagmata!” nagtubag: Ang tinuod dunay pito ka kontinente​—Asia, Aprika, Amerika del Norte, Amerika del Sur, Antartika, Uropa, ug Australia. Apan, ang uban nga nag-isip sa Uropa ug Asia ingong usa ka kontinente (Eurasia) moingong dunay unom. Ang uban wala mag-isip sa Antartika ingong usa ka kontinente.