Ang Hunahuna sa Bibliya

Palabyon ba sa Diyos ang Atong mga Kahuyangan?

‘Dili ako daotan! Gipaningkamotan ko gayod nga mabiyaan ang daotan kong mga dalan, apan huyang lang kaayo ko!’

SUSAMA ba kana sa imong gibati o nianang sa imong kaila? Daghan ang mihinapos nga halos imposibleng mabuntog ang nakagamot na pag-ayong moral nga mga kahuyangan. Ang ubang mga tawo nagdepende sa alkoholikong ilimnon, tabako, o mga droga. Ang kadalo mao ang naghari sa kinabuhi sa daghang uban pa. Ug anaa kadtong nagpadala sa seksuwal nga kahiwian, nga nangatarongang nabuang na sila pag-ayo sa sekso.

Sumala sa gipakita sa Mateo 26:​41, si Jesus malulotong nagpahayag sa iyang pagsabot sa tawhanong mga kahuyangan. * Gani, ang tibuok rekord sa Bibliya tin-awng nagpamatuod nga si Jehova nga Diyos ug si Jesus maluluy-on gayod sa mga tawo. (Salmo 103:​8, 9) Apan makadahom ba kita nga palabyon lang sa Diyos ang tanan natong mga sayop?

Si Moises ug si David

Tagda ang asoy bahin kang Moises. Nailhan siya ingong ang “labing maaghop sa tanang tawo sa ibabaw sa nawong sa yuta,” ug gipaningkamotan niyang mahuptan kanunay ang maong maayong hiyas. (Numeros 12:3) Samtang mipanaw ang mga Israelinhon latas sa kamingawan, sila kanunayng milihok nga dili-makataronganon ug nagpakitag kawalay-pagtahod sa Diyos ug sa iyang mga hawas. Bisan pa nianang tanan, mapaubsanong nangayo si Moises sa pagtultol sa Diyos.​—Numeros 16:12-14, 28-30.

Apan, sa hapit nang matapos ang taas, hago nga panaw, wala siya makapugong sa iyang kasuko atubangan sa tibuok nasod ug wala siya motuman sa mga instruksiyon sa Diyos. Gipasaylo siya sa Diyos, apan gipalabay ba Niya ang maong hitabo? Wala. Iyang giingnan si Moises: “Tungod kay [ikaw] wala magpakitag pagtuo kanako . . . , [ikaw] dili magadala niini nga kongregasyon ngadto sa yuta nga akong ihatag gayod kanila.” Si Moises dili makasulod sa Yutang Saad. Human sa 40 ka tuig nga pakigbisog sa maong talagsaong pribilehiyo, ang usa ka seryosong tawhanong kasaypanan maoy nakaingon nga wala niya maangkon ang ganti.​—Numeros 20:7-12.

 Si Haring David maoy usa usab ka diyosnong tawo nga may kahuyangan. Sa usa ka higayon nagpadala siya sa pangibog ug nakigsekso sa asawa sa laing tawo. Unya iya kadtong gisulayan sa pagtabon pinaagi sa pagpapatay sa bana sa babaye. (2 Samuel 11:2-27) Human niana, gibasolan gayod niya ang mga krimen nga iyang nahimo, ug gipasaylo siya sa Diyos. Apan nakabungkag si David ug usa ka pamilya, ug wala siya panalipdi ni Jehova gikan sa malaglagong mga katalagman nga misunod. Ang masusong anak nga lalaki ni David grabeng nasakit, ug wala mangilabot si Jehova, bisan pa sa mga pag-ampo ni David alang sa iyang anak. Namatay ang bata, ug human niadto nahitabo ang sunodsunod nga mga trahedya sa panimalay ni David. (2 Samuel 12:13-18; 18:33) Dako kaayog gibugti si David tungod sa pagpadaog niya sa moral nga kahuyangan.

Kining maong mga panig-ingnan nagpakita nga ang mga tawo manubag sa Diyos tungod sa ilang panggawi. Kinahanglang palig-onon niadtong buot moalagad kaniya ang huyang nga mga bahin sa ilang espirituwalidad ug mahimong mas maayong mga Kristohanon. Daghan ang mihimo niana sa unang siglo.

Ang Pagpakigbisog sa Pagbiya sa Kasal-anan

Si apostol Pablo haom nga tawgong modelo sa Kristohanong pagkinabuhi. Apan nahibalo ka ba nga kanunay siyang nakigbisog sa iyang mga kahuyangan? Ang Roma 7:18-25 tin-awng naghubit niining maong pakig-away, o sumala sa bersikulo 23, niining maong ‘pakigbugno.’ Si Pablo wala mohunong sa pagpakigbisog, tungod kay siya nahibalo nga ang sala anaa kanunay.​—1 Corinto 9:​26, 27.

Ang pipila ka membro sa Kristohanong kongregasyon sa karaang Corinto nagbatasan kanhi sa pagbuhat ug kalapasan. Ang Bibliya nag-ingon nga kaniadto sila maoy ‘mga makihilawason, mga mananapaw, mga lalaking makigdulog sa mga lalaki, mga kawatan, mga tawong dalo, mga palahubog.’ Apan kini nag-ingon usab nga sila “nahugasan na.” (1 Corinto 6:9-11) Sa unsang paagi? Sila napalig-on sa paghunong sa ilang daotang mga binuhatan pinaagi sa tukmang kahibalo, Kristohanong panag-ubanay, ug sa espiritu sa Diyos. Sa ngadtongadto, sila gipahayag sa Diyos nga matarong sa ngalan ni Kristo. Oo, ang Diyos nagpasaylo kanila, sa ingon naghatag kanila ug hinlong tanlag.​—Buhat 2:38; 3:19.

Wala pakamenosa ni Pablo ug sa mga Kristohanon sa Corinto ang ilang masalaypong mga kiling. Hinunoa, sila nakigbugno niini, ug uban sa tabang sa Diyos sila nagmadaogon. Ang maong unang-siglo nga mga magsisimba nahimong dalayegon sa moral, bisan pa sa ilang kahimtang ug dili-hingpit nga mga kiling. Komosta ang bahin kanato?

Ang Diyos Nagdahom nga Kita Makigbisog sa Atong mga Kahuyangan

Ang pagpakigbisog sa kahuyangan mahimong dili moresulta sa pagkawala niini sa bug-os. Bisan pag dili kita kinahanglang magpadaog sa atong pagkadili-hingpit, dili nato kini mawagtang. Kini magpatunghag mga kahuyangan nga lisod tingali kaayong buntogon. Bisan pa niana, dili kita magpadaog sa atong mga kahuyangan. (Salmo 119:11) Nganong hinungdanon man kaayo kini?

Tungod kay ang Diyos dili motugot sa pagkadili-hingpit nga mahimong kanunayng pasangil sa daotang panggawi. (Judas 4) Buot ni Jehova nga magmahinlo ang mga tawo, nga magkinabuhi nga maayog moral. Ang Bibliya nag-ingon: “Kasilagi ang daotan.” (Roma 12:9) Nganong ingon niana ka lig-on ang baroganan sa Diyos?

Ang usa ka rason mao nga ang pagpadaog sa kahuyangan maoy peligroso. “Bisan unsay ginapugas sa usa ka tawo, kini usab iyang anihon,” nag-ingon ang Bibliya diha sa Galacia 6:7. Kadtong magpadala sa pagkagiyan, kadalo, ug kahilayan kasagarang mag-ani ug grabeng kadaot sa ilang kinabuhi. Apan duna pay mas hinungdanong rason.

Ang sala makapasuko sa Diyos. Magpahinabo kinig “panagkabahin” tali kanato ug kang Jehova. (Isaias 59:2) Sanglit kadtong padayong nagpakasala dili makaangkon sa iyang pabor, siya nag-awhag kanila: “Hugasi ang inyong kaugalingon; hinloi ang inyong kaugalingon; . . . hunong na sa pagbuhat ug daotan.”​—Isaias 1:16.

Mahigugmaon ug mapuangoron ang atong Maglalalang. “Siya wala magtinguha nga adunay malaglag apan nagtinguha nga ang tanan makakab-ot sa paghinulsol.” (2 Pedro 3:9) Ang pagpadaog kanunay sa kahuyangan makapugong kanato sa pag-angkon sa pabor sa Diyos. Tungod kay dili man palabyon sa Diyos ang atong mga kahuyangan, dili usab nato kini angayng palabyon.

[Footnote]