Gikan sa Among mga Magbabasa

Pagkainahan Salamat sa panghapin nga serye nga “Ang Pagkainahan​—Nagkinahanglan bag Usa ka Superyor nga Babaye?” (Abril 8, 2002) Karon daghan ang mibati nga ang mga inahan nga anaa lang sa balay dili sama ka puliki sa nagtrabahong mga inahan. Ang inyong artikulo nagtabang sa inyong mga magbabasa sa pagsabot nga ang tanang inahan maoy puliking mga inahan!

T. M., Tinipong Bansa

Ang unang butang nga akong namatikdan mao ang hulagway sa usa ka superyor nga babaye sa panid 2. Gusto kong basahon dayon ang artikulo. Ingong inahan sa duha ka gagmayng mga anak, ako makaingon nga ang adlaw-adlawng rutina sa usa ka inahan gihubit pag-ayo sa mga artikulo.

C. L., Alemanya

Usa ako ka 12-anyos nga batang babaye, ug sa dihang nadawat ko kining magasina, gibasa ko dayon kini. Nahibaloan ko na karon kon unsay ginahimo sa akong Mama alang kang Papa ug nako. Gipabilhan ko siya ug mas pa nakong tabangan siya karon!

A. L., Tinipong Bansa

Duha ka tuig kanhi nanganak akog usa ka batang lalaki. Hangtod sa maong panahon, usa ako ka bug-os-panahong ebanghelisador nga may partaym nga trabaho. Kay nangandoy sa kanhi kong estilo sa pagkinabuhi, gibati kong dili-takos mahimong inahan. Hinungdanon nga ako mobating masaligon, ug mao kanay akong gibati sa dihang gibasa ko kining mga artikuloha.

S. T., Italya

Ang inyong tambag nga mogahin ug panahon alang sa paglingawlingaw nagpunting sa usa ka butang nga mao pay akong pagkaamgo. Gisugdan ko kini sa pagbuhat sa wala pa nako mabasa kining mga artikuloha, apan mibati akong sad-an sa pagbuhat niini. Salamat sa pagtabang kanako sa pagsabot nga dili kinahanglang mobating sad-an basta mahuptan ang pagkatimbang.

C. C., Tinipong Bansa

Ang ubang mga inahan mibati nga wala pabilhi ang ilang hago nga trabaho. Kining mga artikuloha naghatag kanila sa pagpabili nga takos kanila. Ingong usa ka inahan nga may upat ka anak, nahibalo ko kon unsa ka lisod balansehon ang pagkahimong asawa ug ang pagkaadunay trabaho. Ang kamatuoran nga gigamit ni Jehova si Solomon sa pagsulat sa mga hunahuna bahin sa kugihang mga inahan nakahatag kanakog kahupayan ug nagdasig kanako sa paghimo kutob sa akong maarangan.

E. S., Alemanya

Ingong inahan sa usa ka tres-anyos nga batang babaye, nakigbisog ako sa pagbati sa pagkasad-an tungod kay kanunay kong kapoyon. Kining mga artikuloha nagtabang kanako sa pagsabot nga wala ako mag-inusara niining pagbatia, ug kini naghatag ug maayo kaayong mga sugyot kon unsay akong mahimo sa pagpaarang-arang sa akong kahimtang.

K. J., Tinipong Bansa

Ang hapin niining magasina nagpakita sa usa ka inahan nga nagkugos sa iyang gamayng bata. Morag nagkaon ang bata ug hot dog. Ang akong asawa ug ako mao pay pagkahuman ug tungha sa klase bahin sa infant/child CPR. Ang instruktor nag-ingon nga ang pagkaon ug mga hot dog maoy numero unong hinungdan nga matuk-an ang mga masuso ug mga bata. Hugot niyang gidili ang pagpakaon sa gagmayng mga bata ug mga hot dog.

G. E., Tinipong Bansa

Ang “Pagmata!” nagtubag: Mouyon kami nga tungod sa pagkaon ug mga hot dog mahimong tuk-an ang mga masuso ug gagmayng mga bata. Sa pagkatinuod, ang bata diha sa among hapin nagsupsop ug karot samtang gikugos sa iyang inahan.

Pagpakigkomunikar sa Mananap Daghang salamat sa artikulong “Pinulongan sa Ihalas nga Hayop​—Ang mga Misteryo sa Pagpakigkomunikar sa mga Mananap.” (Abril 8, 2002) Nakakatawa ko sa pagbasa bahin sa talagsaong paagi sa wildebeest, o gnu, sa pagpalibog sa kaaway. Sa laing bahin, nakahilak ko sa komento ni Joyce Poole bahin sa nakita niyang bayeng elepante nga “nagminatay” tungod sa iyang nati nga patay nang gihimugso. Ang maong buhi ug makalingaw nga mga artikulo makapahunahuna ug motabang kanato sa pagkaamgo nga kining “pinulongan sa ihalas nga mga hayop” naghatag ug “pagdayeg sa usa nga naghimo niana, si Jehova nga Diyos.” Padayon sa pagsulat sa maong mga artikulo!

A. G., Polandia