Pagpakita ug Gugma—Usa ka Dugay ug Lisod nga Pagtaganag Hinabang

SI RICHARD VARA, usa ka eksperyensiyadong editor sa Houston Chronicle, maoy tawo nga dili daling modayeg, apan niadtong miaging tuig siya nakadayeg. “Wala pa akoy nakita nga sama niini!” siya miingon. “Dili ako makatuo niini.” Ingon usab niana ang gibati ni Lee P. Brown, mayor sa Houston, Texas, T.B.A. Siya miingon: “Maayo untag makita sa tanang tawo sa Houston ang inyong gibuhat dinhi. Nakadayeg gayod ako.” Unsa may ilang gihisgotan? Ang editor ug ang mayor nagkomento bahin sa pagtaganag hinabang nga gipahigayon sa mga Saksi ni Jehova sa Houston. Unsay nalangkit sa maong paningkamot? Nganong gikinahanglan kadto? Ug unsay nakahimo niadto nga dalayegon kaayo? Aron atong mahibaloan, atong sugdan sa sinugdanan.

Kinagrabehang Baha Sukad

Sayo sa Hunyo 2001, usa ka kusog nga tropikal nga bagyo nga ginganlag Allison mihampak sa kapatagan sa habagatan-sidlakang Texas. Sa kataposan, sa Biyernes, Hunyo 8, sulod sa 24 oras, si Allison nakapahinabo gilayon ug usa ka metros nga ulan sa Houston​—ang ikaupat nga kinadak-ang siyudad sa nasod. * Wala madugay, ang nagkadakong tubig milanap sa mga tindahan, opisina, ug sa tinagpulo ka libong puy-anan. Ang dagkong mga dalan sa tibuok siyudad nahimong nagbul-og nga mga suba, nga milapaw sa natanggong nga mga kotse ug habog nga mga trak. Ang taas nga tubig nakapugong bisan sa dagkong mga trak sa bombero ug ubang mga sakyanan nga gamiton sa pagsalbar sa pagtadlas diha sa pipila ka gibahaan nga mga dalan. Ang mga helikopter ug dagkong mga sakyanan sa sundalo gipatabang sa pagsalbar sa mga tawo.

Sa kataposan, sa dihang mihayag na ang langit sa pagka-Lunes, Hunyo 11, nadayag nga si Allison nagpahinabog kamatayon ug mga kadaot sa kabtangan. Bayente dos ka tawo ang namatay, lakip ang duha ka Saksi ni Jehova: si Jeffrey Green, usa ka Kristohanong ansiyano, ug ang iyang bayaw nga babaye nga si Frieda Willis. * Dugang pa, mga 70,000 ka puy-anan ang nangadaot, mao nga kining bahaa nahimong usa sa kinagrabehang natural nga mga katalagman nga mihampak sa usa ka dakong siyudad. Sa pagkatinuod, pinaagi sa pagpahinabog halos $5 bilyones nga kadaot sa propiedad, si Allison maoy bagyo nga nakapahinabog kinadak-ang gasto sa kasaysayan sa Tinipong Bansa.

Nagbaha ang mga Boluntaryo

Ang mga tawo nangaluya. Usa ka boluntaryo sa pagtaganag hinabang miingon: “Basa ang ilang mga higdaanan. Basa ang ilang alpombra. Ang ilang mga letrato sa pagkabata ug niadtong sa ilang mga anak nangawagtang.” Kadaghanan sa kapin sa 16,000 ka Saksi ni Jehova sa Houston nakaagom ug kadaot. Walo ka Kingdom Hall ug ginatos ka puy-anan sa mga Saksi ang nangadaot. Pipila niining maong mga puy-anan gibahaan ug halos taga-tuhod; ang uban hangtod sa atop. Tanantanan, kapin sa 80 ka kongregasyon sa mga Saksi ni Jehova ang naapektohan. Apan, kining mga igsoona wala pasagdi. Pipila lamang ka adlaw ang milabay, misanap ang usa ka baha​—baha sa mga boluntaryo aron motabang sa mga igsoon. Sa unsang paagi kadto nahitabo?

Bisan sa wala pa mosugod paghubas ang baha, nanglihok na ang Kristohanong mga ansiyano sa mga kongregasyon sa mga Saksi ni Jehova sa Houston. “Among gitawgan ug giduaw ang among mga igsoon,” miasoy ang usa ka ansiyano. “Dayon among gisusi ang kadaot, ug sa pagka-Lunes, Hunyo 11, among naipon ang bug-os nga taho nga naglista sa mga biktima, gidaghanon sa nadaot nga mga puy-anan, ug ang gidak-on sa kadaot. Kini gipadala ngadto sa hedkuwarter sa mga Saksi ni Jehova sa Brooklyn, New York.” Pipila ka adlaw sa ulahi, ang sangang buhatan sa mga Saksi ni Jehova sa Tinipong Bansa nagpundar ug usa ka komite ug naghatag ug pondo sa pagtaganag hinabang. Kini  gilangkoban sa walo ka Kristohanong mga ansiyano nga taga-Houston. Ang asaynment sa komite? Ang pagtabang aron mahupay ang mga biktima ug ang pag-ayo usab sa nadaot nga mga puy-anan sa mga Saksi​—kapin sa 700 ka puy-anan!

‘Sa unsang paagi among mahimo kining dakong buluhaton?’ namalandong ang mga membro sa bag-ong giporma nga Jehovah’s Witnesses Houston Relief Committee 2001. Nagtrabaho sila hangtod sa lalom nga kagabhion aron makahimo ug pasiunang plano ug gidapit ang kapin sa 160 ka kongregasyon sa mga Saksi sa Houston sa pagtabang. “Talagsaon kaayo ang sanong sa mga igsoon,” miasoy ang tsirman sa komite. “Kapin sa 11,000 ka Saksi ang miboluntaryo, nga nagtanyag sa ilang panahon, kusog, ug mga kahanas nga wala magpabayad.”

Agup-op Kontra mga Boluntaryo

Pipila ka adlaw human sa baha, ang mga boluntaryo nanggikan aron ayohon ang mga puy-anan sa mga biktima, gitangtang ang nasuphan nga mga alpombra, nadaot nga mga salog, naguba nga mga bungbong, nabasa nga mga kabinet, nahibat nga mga pultahan, ug ang tanang butang nga nahugawan sa tubig gikan sa imburnal. “Nabalaka kami dili lamang sa pag-ayo sa mga puy-anan sa mga igsoon,” miasoy ang usa ka boluntaryo, “kondili sa pagpanalipod usab sa ilang panglawas.” Tungod kay ang makahilong agup-op motubo dayon diha sa likod sa mga bungbong ug sa sulod sa mga kabinet, ang mga puy-anan kinahanglang madis-inpektar una sa bug-os.

Aron makakat-on kon unsaon pagbuhat niana sa luwas nga paagi, daghang Saksi ang mihangyo  nga mabansay sa Federal Emergency Management Agency (FEMA), usa ka ahensiya sa kagamhanan nga nag-espesyalisar sa mga sulirang ipahinabo sa mga katalagman. Human niana, ang kada Saksi nga nabansay sa FEMA nagdapit ug napulo ka boluntaryo nga mokuyog kaniya ngadto sa nadaot nga puy-anan, ug gitudloan sila kon unsaon pagdis-inpektar ang maong puy-anan sa hustong paagi. Sa pagkasunod adlaw, ang kada usa sa napulo ka boluntaryo nga bag-ong nabansay mao na poy nagkuyog ug laing napulo ka boluntaryo. “Pipila lamang ka adlaw,” matod sa usa ka boluntaryo, “ginatosgatos na ang nakakat-on kon unsaon kini paghimo.” Ang mikatap nga agup-op wala makasagubang sa nagdaghang boluntaryo! Ang mga retirado ug mga tin-edyer nga bakasyon sa eskuyla maoy nagtrabaho sa maadlaw. Inigkagabii, laing mga boluntaryo ang mopuli ug mopadayon pagtrabaho. Sulod sa unom ka semana, hinlo ug luwas nang puy-an ang tanang nahugawang mga puy-anan sa mga Saksi.

Usa ka Hedkuwarter ug Pito ka Sentro

Sa kasamtangan, ang komite sa pagtaganag hinabang mipalit ug daghan kaayong gypsum board ug tonetoneladang uban pang materyales sa konstruksiyon. Apan asa man kadto ipondo? “Sa dihang nasayran sa manedyer sa usa ka kompaniya ang among panginahanglan,” miasoy ang tigpamaba sa komite sa pagtaganag hinabang, “iyang gipagamit ang usa ka bodega​—nga may luna nga 5,000 metro  kuwadrado​—nga walay bayad!” Gawas nga mapondohan ug mga materyales sa konstruksiyon, may luna usab ang bodega alang sa opisina. Sa wala madugay, kadto nahimong hedkuwarter sa pagtaganag hinabang, nga dihay mga 200 ngadto sa 300 ka boluntaryo nga nagtrabaho sa adlaw, gabii, ug sa mga hinapos sa semana.

Tungod kay ang nadaot nga mga puy-anan nahimutang man sa halapad kaayong luna, gitukod ang rehiyonal nga mga sentro sa pagtaganag hinabang diha sa pito ka Kingdom Hall. Matag hinapos sa semana ang kada sentro mapuno sa mga boluntaryo. (Tan-awa ang kahon nga “Sentro sa Kalihokan.”) Daghan kanila nagtrabaho na kaniadto sa pagtukod ug mga Kingdom Hall diha sa rehiyon. Ngani, mitabang usab ang mga boluntaryo nga may mga kahanas sa konstruksiyon nga gikan sa 11 ka nagkalainlaing Regional Building Committee sa Arkansas, Louisiana, Oklahoma, ug Texas. * Sa kada sentro, ang mga panday, tigpintal, tubero, ug ubang batid nga mga trabahante maoy nanguna ug nagbansay sa uban.​—Tan-awa ang kahon nga “Mga Programa sa Pagbansay.”

Usa ka Plano ug Usa ka Data Base

Gisunod sa mga boluntaryo ang pito-ka-hugna nga plano sa konstruksiyon. Upat ka higayon nga gihatod ang mga materyales sa konstruksiyon ngadto sa mga puy-anan, ug ang pag-ayo sa kada puy-anan gieskedyul nga himoon sa tulo ka hinapos sa semana. Niining paagiha, ang katibuk-ang pagtaganag hinabang nakompleto sa mga unom ka bulan.

Aron mosaler ang plano, ang komite nagtukod ug 22 ka departamento, lakip ang pagdumala sa mga detalye sa trabaho, pagpamalit, paghatag ug temporaryong puy-anan, ug paghatod sa materyales. Ang tanang departamento giabagan sa impormasyon nga naipon diha sa dakong data base (o mga impormasyon nga gisulod diha sa kompiyuter) nga naugmad sa mga boluntaryo. Sa wala pa magsugod ang pagpang-ayo, ang mga boluntaryo migugol ug napulo ka adlaw sa pagsulod sa maong mga impormasyon. “Kadto maoy usa ka dakong proseso sa pagsulod ug mga impormasyon,” matod sa usa ka balita. Bisan pa niana, pagkahuman sa napulo ka adlaw, ang natigom nga mapuslanong mga impormasyon mahimo nang magamit. Usa lang ka klik sa mouse (sa kompiyuter), ipakita sa data base kon kanus-a mabatonan ang 11,000 ka boluntaryo, kon unsay ilang mga abilidad, ug kon unsaon sila pagkontak. Usa pa ka klik, ipakita niini ang angayng himoon nga pagpang-ayo, mga permiso sa pagtukod nga gikinahanglan, ug ubang mga detalye sa nadaot nga mga puy-anan. Ang data base nailhan ingong “ang kinauyokan sa buluhaton sa pagtaganag hinabang.”

Napuno sa Kalipay ug Pasalamat

Ang mga puy-anan nga wala nay agup-op ug nauga na giduaw sa mga boluntaryo nga batid sa pagtukod ug puy-anan aron tinoon kon unsay gikinahanglan sa pag-ayo sa nadaot. “Gibanabana sa maong mga boluntaryo ang gikinahanglang materyales hangtod sa gidaghanon sa lansang,” matod pa sa tigpamaba. “Dili namo gustong usikan ang bisan unsang pondo o inamot nga mga materyales.” Sa samang panahon, ang ubang boluntaryo mikuha sa gikinahanglang permiso sa konstruksiyon gikan sa mga opisyales sa siyudad.

Dayon, ang naapektohang mga pamilya gipaadto sa bodega aron mopili gikan sa limitadong suplay sa  mga alpombra, kabinet, vinyl sa salog, ug ubang mga butang aron mapulihan ang ilang nawalang mga butang. Ang mga biktima sa baha napuno sa kalipay ug kasagarang mihilak sa ilang pagkakita sa tanang butang nga gitagana alang kanila. Ang mga biktima nakadawat usab ug mga sugyot gikan sa mga boluntaryo nga may kahibalo bahin sa insyurans ug mga polisa sa kagamhanan. Dayon, gieskedyul ang pag-ayo sa mga puy-anan, ug sa adlaw gayod nga ang mga trabahante nagkinahanglag materyales sa pagtukod, kini gihatod sa boluntaryong mga drayber. Samtang giayo ang puy-anan sa usa ka bana nga dili Saksi, siya miingon sa iyang asawa nga Saksi: “Kahibulongan ang imong mga igsoon. Inigbiya sa usa ka trabahante, mopuli dayon ang lain. Mora silag mga hulmigas nga nagtrabaho!”

Ang paninugdang mga pagpang-ayo gidangtan ug mga tulo ka hinapos sa semana alang sa kada puy-anan. “Apan usahay, kini gidangtan ug lima o kaha walo ka semana,” matod sa tsirman sa komite. Sa dihang gitangtang ang mga bungbong sa daan-daan nga mga puy-anan, ang mga boluntaryo kasagarang makamatikod ug daan nang mga daot, ug dili nila gustong itaod ang bag-ong mga bungbong nga dili una ayohon ang maong mga daot. Matod sa usa ka boluntaryong trabahante: “Usahay among makita nga gianay ang mga balayan sa bungbong, busa among tinoon nga puohon una ang anay. Daghan ang among giayo nga mga sagbayan aron kini matul-id. Among gibiyaan ang mga puy-anan nga maayo na.” Usa ka biktima sa baha nagbanaag sa pagbati sa daghang tag-iyag puy-anan sa dihang mapasalamaton niyang giingnan ang usa ka bisita: “Mas maayo pa karon ang akong puy-anan kay sa akong pagpalit niini!”

 Paspas nga Giluto ug Gihatod nga mga Pagkaon

Aron mapakaon ang daghang boluntaryo, gihimo sa usa ka grupo sa mga Saksi ang usa ka bodega sa likod sa usa ka Kingdom Hall nga sentro sa pag-andam ug pagpadalag pagkaon. Ang mga Saksi sa tibuok nasod miamot ug mga repridyeretor, freezer, makina sa paghugas ug plato, kosenilya, ug ubang mga kasangkapan sa kosina. Matag Sabado ug Dominggo, 11 ka tigluto ug mga 200 ka lain pang mga boluntaryo ang magdegamo ug libolibong pagkaon diha sa sentro. Ang boluntaryo nga maoy nagdumala sa kosina miingon: “Daan na mi nga tig-andam ug mga pagkaon alang sa mga proyekto sa pagtukod ug Kingdom Hall sulod sa 19 ka tuig, apan kining proyektoha mas dako kay sa among gidahom.”

Ang mga pagkaon giempake diha sa 120 ka dagkong mga sudlanan. Kini ikarga diha sa 60 ka sakyanan nga naghulat nang daan, nga maoy magdala sa mga pagkaon ngadto sa tanang mga sentro ug sa hedkuwarter. Sa kasamtangan, ang kada grupo nga nagtrabaho diha sa usa ka puy-anan magpadalag usa ka boluntaryo ngadto sa ilang natudlong sentro aron mokuha ug mga pagkaon alang sa tibuok grupo. Ang mga boluntaryo anha na mokaon sa mga puy-anan ug dayon mobalik sa trabaho.

Napalampos ang Buluhaton!

Sa kataposan, sa Abril 2002, ang 11,700 ka boluntaryo nakahuman sa usa sa kinadugayang mga kampanya sa pagtaganag hinabang nga gihimo sukad sa mga Saksi ni Jehova. Ang mga boluntaryo nakagugol ug 1,000,000 ka oras sa pagpang-ayo o pagtukod pag-usab sa 8 ka Kingdom Hall ug 723 ka puy-anan. Usa ka biktima sa baha mipahayag alang sa uban sa dihang siya misulti nga nagluha sa pagkamapasalamaton: “Nagpasalamat ako kang Jehova ug sa mga boluntaryo sa tanang tabang nga ilang gihatag. Makapahupay kaayo ang pagkahimong bahin sa usa ka mahigugmaong panag-igsoonay!”

[Mga footnote]

[Kahon/Hulagway sa panid 21]

SENTRO SA KALIHOKAN

Sabado kadto sa alas 7:00 s.b., sa Sentro Num. 4 sa amihanan-sidlakang Houston. Ang mga boluntaryo nga nagkatigom sa Kingdom Hall nag-estoryahanay, nangatawa, nanginom ug kape, ug nangaon ug donat. Ang pipila mibiyaheg ginatos ka kilometro gikan sa ilang lungsod aron lang makaabot didto. Apan sa alas 7:30 s.b., ang alegreng panaghisgot nahunong, ug ang magtatan-aw sa maong sentro midumala sa panaghisgot sa usa ka teksto sa Bibliya. Gipahibalo usab niya nga ang Pagtuon sa Bantayanang Torre himoon sa Dominggo sa alas 7:30 s.b., sa dili pa moadto sa ilang mga trabahoan ang mga boluntaryo, ug iyang gidasig ang tanan nga makig-ambit sa pagtuon pinaagi sa pagkomento ug Iningles o Kinatsila. Iyang gipaabot ang pangomosta gikan sa tibuok-kalibotang hedkuwarter sa mga Saksi ni Jehova, ug namakpak ug dugay ang mga boluntaryo.

Dayon ang magtatan-aw sa maong sentro mihatag sa ulahing mga balita bahin sa pagtaganag hinabang ug mainitong gipasalamatan ang mga boluntaryo sa ilang kinabubut-ong espiritu. Siya nangutana: “Duna ba kaninyoy wala mahibalo kon unsay buhaton o kon asa moadto karong adlawa?” Walay miisa ug kamot. “Kinsay gustong mokaon unya?” Ang tanang kamot abtik nga giisa, ug ang mga boluntaryo nangatawa. Sa kataposan, gitanyag ang pag-ampo, ug ang 250 ka boluntaryo​—mga lalaki, babaye, batan-on ug tigulang​—nangadto sa ilang trabaho nga andam na usab sa tibuok adlaw nga hagong buluhaton.

Ingon usab niadto ang kahimtang sa lain pang unom ka sentro ug maingon man sa bodega. Sa kasamtangan, ang ubang mga boluntaryo nga nagdigamo sa sentro nga kosina nagkapuliki na usab sa pag-ukay sa ilang mga linuto​—kay ang tinuod, sa pagkaudto niadtong adlawa kapin sa 2,000 ka gutom nga mga boluntaryo sa tibuok Houston gusto nang mokaon ug init nga pagkaon!

[Kahon/Hulagway sa panid 22]

MGA PROGRAMA SA PAGBANSAY

Panahon sa pagtaganag hinabang, ang miboluntaryo nga batid nga mga trabahante nagdumalag mga klase aron sa pagbansay sa dili-batid nga mga boluntaryo alang sa espesipikong mga buluhaton. Ang pipila gibansay sa pagdis-inpektar sa mga puy-anan. Ang uban nakakat-on sa pag-instalar ug mga bungbong ug kabinet. Samtang ang uban nakakat-on sa pagpalitada ug pagpintal. Gi-video ang maong mga Skilled-Workers Seminar, ug kini gipasalida diha sa mga sentro aron mabansay ang dugang mga boluntaryo. “Pinaagi sa maong mga seminar,” matod sa usa ka membro sa komite sa pagtaganag hinabang, “among naseguro ang dekalidad nga pagpang-ayo.”

[Hulagway]

Mga batid nga trabahante nagdumalag mga klase

[Kahon sa panid 24]

“ANG TINUOD NGA BUHAT SA DIYOS”

“Ang mga kompaniya sa insyurans nag-isip nga ang natural nga mga katalagman maoy mga buhat sa Diyos,” matod sa usa ka membro sa komite sa pagtaganag hinabang. “Apan,” siya midugang, “ang mga boluntaryo nga mitrabaho dinhi sulod niadtong mga bulana mao ang tinuod nga buhat sa Diyos. Ang among panag-igsoonay maoy usa ka milagro!” Panahon sa pagtaganag hinabang, 2,500 o kapin pang boluntaryo ang nanungha sa mga hinapos sa semana aron motrabaho. Matod pa sa tsirman sa komite: “Kadtong wala magpabayad nga mga boluntaryo nagkanselar sa ilang giplanong mga bakasyon, nag-usob sa ilang mga eskedyul sa pamilya, ug wala una idayon ang ilang personal nga mga buluhaton aron motabang sa kinadak-ang pagtaganag hinabang nga gibuhat sukad sa mga Saksi ni Jehova.”

Ang dugaydugay nga pagtaganag hinabang nagkinahanglag mga sakripisyo. Usa ka boluntaryo nga misuportar sa buluhaton gikan sa pagsugod hangtod sa pagkahuman dihay sekular nga trabaho nga 50 ka oras kada semana. Sa gihapon, siya migugol ug 40 ka oras kada semana sa pagtaganag hinabang. “Si Jehova nagpalig-on kanako,” siya miingon. “Ang akong mga kaila nangutana kanako, ‘Gibayran ba mo ana?’ Sila akong giingnan, ‘Dili kabayran ug salapi ang akong pagbuhat niini.’” Sa mga hinapos sa semana, human sa tibuok semanang sekular nga trabaho, usa ka pamilya gikan sa estado sa Louisiana mobiyahe ug 800 kilometros ngadto-ngari aron motabang sa pagtaganag hinabang. Daghan ang motrabaho gikan sa pagsidlak hangtod sa pagsalop sa adlaw, ug dayon mobiyahe pauli. Usa ka grupo sa 30 ka batid nga mga boluntaryo, nga mibiyaheg pito ngadto sa napulo ka oras sa pagpaingon, miingon: “Mapuslanon kaayo kadto.” Lain pang boluntaryo mogawas sa iyang trabaho sa alas 3:30 s.h. ug dayon moboluntaryo sa hedkuwarter hangtod sa alas 10:00 s.g. Motabang usab siya sa mga hinapos sa semana. “Magantihon gayod kadto,” siya miingon.

Sa pagkatinuod, kini sila ug ang tanang ubang mga boluntaryo andam sa pagtabang tungod sa ilang inigsoong gugma​—ang ilhanan sa tinuod nga mga Kristohanon. (Juan 13:35) Human moduaw sa hedkuwarter sa pagtaganag hinabang, ang mayor sa Houston nadasig sa pagsulti ngadto sa usa ka grupo sa mga Saksi: “Kamo nagtuo nga kinahanglang buhaton ang gisulti sa Diyos kanato. Inyong gipadapat ang inyong mga tinuohan.”

[Hulagway sa panid 20, 21]

Ang baha milanap sa Houston, Hunyo 9, 2001

[Credit Line]

© Houston Chronicle

[Hulagway sa panid 21]

Ang dagkong mga dalan nahimong mga suba

[Hulagway sa panid 21]

Ang tubig milanap sa mga puy-anan

[Mga hulagway sa panid 23]

Pipila sa libolibong Saksi nga miboluntaryo

[Hulagway sa panid 24]

Ang mga taga-kosina nag-andam ug kapin sa 250,000 ka pagkaon!

[Picture Credit Line sa panid 19]

NOAA