Gikan sa Among mga Magbabasa

Pagsimba Sa wala pa ako mahimong usa sa mga Saksi ni Jehova, dili gayod ako makapatin-aw kon unsay akong hunahuna bahin sa Diyos. Ang seryeng panghapin nga “Makasimba ba Ako sa Diyos sa Akong Kaugalingong Paagi?” (Abril 22, 2002) nagpatin-aw gayod kon nganong natukmod ako sa pagsugod ug pagtuon sa Bibliya. Nagplano ko nga magpadala ug tagsa ka kopya sa maong gula ngadto sa matag membro sa akong pamilya.

B. R., Tinipong Bansa

Sugilanon sa Kinabuhi Nakahilak ako sa kalipay ug kasubo samtang nagbasa ako sa sugilanon sa kinabuhi nga “Bisan pa sa mga Pagsulay, Sanag Gihapon ang Akong Paglaom.” (Abril 22, 2002) Ang kaisog ni Brader Hanák sa panuigong 20 nagpahinumdom kanako nga makasalig kita kang Jehova nga mohatag ug determinasyon sa mga batan-on sa pagtuboy sa matarong nga mga sukdanan ni Jehova. Salamat sa padayong pagpatik sa nindot nga mga artikulo nga naghatag kanamong tanan sa kadasig nga among gikinahanglan niining makuyaw nga mga panahon diin kita nagkinabuhi.

K. G., Tinipong Bansa

Mga Batan-on Nangutana Ako 11-anyos nga batang lalaki, ug buot ko kamong pasalamatan sa artikulo nga “Mga Batan-on Nangutana . . . Komosta Kon Duna Koy Ikahibalag nga Eskolmet Samtang Ako Nagsangyaw?” (Pebrero 22, 2002) Giatubang ko ang susamang kahimtang nga gihubit sa mga batan-on diha sa artikulo. Human mabasa kini, nasabtan ko nga wala koy katarongan nga ikaulaw ang bililhon ug dinaliang mensahe nga atong dad-on ngadto sa mga tawo. Daghan kaayong salamat niining maong impormasyon.

D.D.S., Italya

Ako 10 anyos. Salamat niining maong artikulo. Sa adlaw human mabasa kini, misangyaw ako sa kanataran ug mibating mas relaks tungod sa pagpadapat sa tambag sa magasin.

D.D.C., Italya

Ang artikulo nga “Mga Batan-on Nangutana . . . Nganong Lisod Ikasabot ang Akong Kauban sa Lawak?” (Abril 22, 2002) gisulat alang gayod kanako! Ako usa ka bug-os-panahong ebanghelisador, ug tunga sa tuig na akong may kauban sa lawak. Sumala sa giingon sa artikulo, ang pagpuyo ipon sa usa ka tawo nga gipadako sa lahing paagi mahimong makaiikag, apan mahimong makahatag usab ug kapit-os. Sa tabang sa akong mga ginikanan, mga ansiyano, ug ni Jehova, anam-anam kong nausab ang akong panglantaw. Karon gusto kong mobalhin uban sa akong higala ngadto sa kongregasyon diin dako ang panginahanglan. Nagtuo ako nga gitagana ni Jehova kining artikuloha ingong gasa kanako!

I. S., Japan

Ang artikulo nga “Mga Batan-on Nangutana . . . Sa Unsang Paagi Makasangyaw Ako sa Akong mga Eskolmet?” (Marso 22, 2002) may linaing kahulogan alang kanako. Nahinumdom ako nga nagpaambit sa akong pagtuo, nga medyo nagpanuko, ngadto sa pipila ka isigkaestudyante ug ilabina ngadto sa usa ka higala nga nagpakitag pagtahod sa akong mga tinuohan. Wala na kamiy kontak hangtod sa pipila ka tuig nga miagi, sa dihang akong nahibaloan nga nagtuon siya sa Bibliya uban sa mga Saksi ni Jehova. Karon pareho na kaming mga ansiyano sa kongregasyon, ug kami suod kaayong managhigala. Ingon sa gipakita sa artikulo, ang pagsulti sa uban bahin kang Jehova kanunayng magdala ug maayong mga resulta.

J.R.M., Brazil

Matulon-anon Alang sa Tanang Pangedaron Nalingaw gayod ako sa inyong mga magasin tungod kay dili lang kini makaiikag alang kanako kondili sa akong mga anak usab. Daghang mantalaan ug mga magasin nga makadaot sa atong mga batan-on. Sa laing bahin, ang inyong magasin makapauswag kanila. Salamat sa kalamdagan nga inyong gihatod kanamo.

G. M., Rusya