Ikaw Makadiskobre ug Disenyo Diha sa Kinaiyahan

SA DIHANG magsuroysuroy sa baryo, kadaghanan kanato makamatikod sa katahom sa kinaiyahan. Kini tingali maoy pungpong sa mga bulak, usa ka mabulokong langgam, nagbuntaog nga kahoy, o makapahingangha nga talan-awon. Daghang tawo ang magpahinungod sa maong katahom ngadto sa usa ka Maglalalang o Batid nga Tigdisenyo.

Tingali nagtuo ka nga mga siyentipiko lamang ang makadiskobre sa makuting disenyo diha sa kinaiyahan. Apan, ikaw wala magkinahanglan ug komplikado nga siyentipikanhong kasangkapan aron makita ang mga disenyo sa kinaiyahan. Ang gikinahanglan lamang mao ang imong idlot nga pagpaniid, gamayng imahinasyon, ug apresasyon alang sa katahom ug porma. Tingali kinahanglan usab nga imong panid-an pag-ayo ang naandang mga butang nga tingali wala kaayo nimo tagda.

Usa sa kinayanohang mga disenyo mao ang espayral. Kini makita diha sa pamilyar nga mga butang nga hinimo sa tawo sama sa linubid nga pisi o usa ka espring. Apan, makakita ka ug mas eleganteng espayral nga disenyo diha sa mga kinhason o sa mga bunga sa kahoyng pino. Ug kon imong tan-awon pag-ayo ang tunga sa bulak nga mirasol, sa makausa pa imong makita ang espayral nga disenyo. Gidayandayanan usab ug medyo espayral nga mga disenyo ang tunga sa rosas ug ang balay sa lawalawa.

Tan-awa pag-ayo ang balay sa lawalawa. Una, iplastar sa lawalawa ang pangunang mga banting sa balay niini, nga medyo sama sa mga rayos sa usa ka ligid. Dayon magsugod kini diha sa tunga sa pagkonektar sa mga banting pinaagig pilitpilit nga sedang lawa. Maglibotlibot sa paglala ang lawalawa hangtod nga matapos ang balay. Ang espayral mao kining nagkadakong biyo sa lawa.

Ang laing makaiikag nga disenyo diha sa kinaiyahan mao ang matamata. Kining mga matamata makita diha sa wala-damhang mga dapit​—sa mga balahibo sa langgam, sa mga pako sa alibangbang, o bisan diha sa mga himbis sa isda. Ang mga siyentipiko nag-ingon nga ang mga matamata makatabang sa pagpangulitawo, paglingla sa manunulong, o aron likayan sa ubang mananap. Ang paboreyal mao tingali ang labing iladong pananglitan sa mga matamata, ug ang iyang pasundayag sa pagpangulitawo maoy usa sa kahibulongang mga pasundayag sa kinaiyahan. Si Alejandrong Bantogan nakadayeg gayod sa katahom sa paboreyal maoy hinungdan nga siya miinsistir nga panalipdan ang maong langgam sa tibuok niyang gingharian.

Ang sirkulo ug ang bola nga porma maoy pamilyar usab nga mga disenyo. Ang bulawanong lingin sa talisalop nga adlaw o ang bugnaw ug kahayag nga takdol nga bulan makapukaw gayod sa atong pagdayeg. Daghang bulak sa pamilya sa daisy ang samag-adlaw ug dagway, nga dalag ang tunga ug namuklad ang mga gihay nga lainlain ug kolor. Ang bulawanong sentro niining mga bulaka nga makita bisan diin nagtanyag ug abundang dugos nga makapadugok sa mga alibangbang, sa samang paagi nga ang usa ka bulawanong baybayon makapadugok ug mga turista.

Sanglit ang bola nga porma mao ang labing madaginotong porma kon putson, ang mga prutas ug mga berry kasagarang bola ug porma nga lainlaig gidak-on ug kolor. Ang ilang hayag nga mga kolor makapadani sa mga langgam, nga maoy magkatag sa mga liso isip baylo sa lamiang pagkaon.

Siyempre, ang espayral nga mga disenyo, mga matamata, mga sirkulo, ug bola nga mga porma maoy pipila lamang sa mga pananglitan sa daghang disenyo nga makita diha sa kinaiyahan. Bisan ug ang pipila dunay espesipikong katuyoan, ang uban tingali nagsilbing dayandayan o takoban. Kon unsa man ugaling, pangitaa ug kalingawi kini.

 [Tibuok-panid nga hulagway sa panid 26]