Iyang Sulbad sa Polusyon sa Kalangas

“Ako nagtrabaho sa usa ka kompaniya nga naggama ug mga dulaan. Kasagaran kini maoy balikbalik nga matang sa trabaho, ug ang mga empleyado gitugotan sa pagpaminaw ug musika. Usa sa akong mga kauban sa trabaho, nga nahimutang sa gamayng lawak nga tapad sa akoa, hilig kaayong maminaw ug makadaot nga musika. Duha ka lain pang empleyado sa akong seksiyon ganahan usab nianang maong matang sa musika. Apan, alang nako, usa ka pagsulay ang pagpaminaw niana walo ka oras sa usa ka adlaw.

“Gihunahuna ko ang mga bentaha sa paghupot sa trabaho. Ang usa ka rason mao nga ang akong superbisor kanunayng maghatag kanako ug bakasyon aron makatambong sa distritong mga kombensiyon ug sa espesyal nga mga tigom sa mga Saksi ni Jehova nga anaa sa bug-os-panahong ministeryo. Gawas pa, dili layo ang akong gitrabahoan, ug ang akong eskedyul sa trabaho naghatag kanakog panahon para sa akong ministeryo.

“Akong giduol ang akong mga kauban sa trabaho ug matinahorong gihangyo sila nga kon mahimo ilang ilisan ang musika o kaha pahinayan ang tingog. Mireklamo sila sa superbisor. Gipatawag ko sa superbisor ngadto sa iyang opisina. Siya miingon: ‘Sharon, dili nimo makabig kining kompaniyaha sa imong relihiyon. Ang among mga empleyado makapaminaw sa tanang gusto nilang paminawon.’

“Dayon mihangyo ko kon mahimo ba nakong dad-on ang akong cassette player ug ang usa ka set sa headphone. Miuyon siya. Gidala nako ang mga rekording sa The Watchtower. Nakatabang kini kanako aron dili makapaminaw sa dili-maayong musika. Ang pagpaminaw sa mga teyp nakatabang usab kanako sa pagpabiling lig-on sa espirituwal.”​—Sumala sa giasoy ni Sharon Quan.