Gikan sa Among mga Magbabasa

Kalinaw sa Kalibotan Ekselente kaayo ang pagkasulat sa serye nga “Damgo ba Lamang ang Kalinaw sa Kalibotan?” (Mayo 8, 2002) Angay kining basahon sa tanang politiko. Tin-aw kaayong gipakita sa inyong mga publikasyon kon unsay angay nga mahibaloan sa usa ka tawo ug kon sa unsang paagi siya magkinabuhi.

J. S., Czech Republic

Inisyatiba sa Usa ka Batan-on Dugay na nga gusto nakong isulti kaninyo nga nalingaw kaayo ako sa inyong mga magasin, ug sa kataposan ako nakahukom sa pagbuhat niini human mabasa ang artikulong “Gibaslan ang Iyang Inisyatiba.” (Mayo 8, 2002) Di pa dugay naeksperyensiyahan nako ang susama sa nahitabo ni Stella. Nalipay ako sa pagkahibalo nga dunay mga batan-on sa tibuok-kalibotan sama kanako nga nagauna kang Jehova diha sa ilang kinabuhi. Makapadasig sa tanan ang mga eksperyensiya nga sama niini, batan-on man o tigulang.

L. P., Tinipong Bansa

Mga Hayop Mao pay pagkahuman nakog basa sa artikulong “Himamata ang Misteryosong Leopardo sa Niyebe.” (Mayo 8, 2002) Ganahan ako sa tanang linalang nga gihimo ni Jehova, ilabina ang balhiboong mga hayop! Naglagot ako sa pagkabasa nga diyutay na lang ang nahibilin sa mga leopardo sa niyebe. Hunahunaa kon unsay pagbati ni Jehova bahin niini.

D. R., Tinipong Bansa

Hankul Ako 13 anyos, ug nalingaw ko sa artikulo nga “Atong Sulayan ang Pagsulat Diha sa Hankul!” (Mayo 8, 2002) Sukad nga makamao na kong mobasa, interesado na kaayo ako sa langyawng mga pinulongan. Hinaot magpatik pa kamog dugang nga mga artikulo maylabot sa langyawng mga pinulongan sa umaabot!

B. J., Tinipong Bansa

Ako nag-edad ug 11 anyos, ug ang nakaplagan kong talagsaon mao nga ang Hankul magamit bisan sa mga pulong nga dili Koreano. Ang ideya sayon rang sabton. Salamat sa pagpatik niining artikuloha!

J. I., Tinipong Bansa

Mga Lawalawa Nalingaw ako sa artikulong “Usa ka Lawalawa nga Nagtakobang Hulmigas.” (Abril 22, 2002) Kahibulongan gayod nga Maglalalang si Jehova! Naghinamhinam ako sa kinabuhi sa bag-ong kalibotan, aron ako mahibalog dugang bahin sa mga butang nga iyang gilalang.

P. P., Sri Lanka

Mga Barko nga Gisakyan ug mga Kriminal Kapin na sa 50 ka tuig nga ginabasa ko ang inyong mga magasin. Di pa dugay akong gibasa ang artikulo nga “Makauulawng Yugto sa mga Kriminal sa Australia.” (Abril 22, 2002) Sa panid 13, inyong gihisgotan ang pagkawala sa Britanikong barko nga Amphitrite niadtong 1883 nga gisakyan ug mga kriminal. Nagtuo ako nga kini sayop. Sumala sa akong panukiduki, ang barko aktuwal nga nawala niadtong Agosto 1833. Kadto maoy sulod sa yugto sa mga kriminal nga gihisgotan sa artikulo, nga natapos niadtong 1868.

D. B., Scotland

Ang “Pagmata!” nagtubag: Ang gibasehan sa among artikulo nag-ingon nga ang “Amphitrite” nawala niadtong 1833. Pasayloa kami sa maong sayop.

Mga Batan-on Nangutana Salamat sa pagpatik sa artikulong “Mga Batan-on Nangutana . . . Komosta Kon Duna Koy Ikahibalag nga Eskolmet Samtang Ako Nagsangyaw?” (Pebrero 22, 2002) Daghang tuig kanhi ako maoy sobra ka maulawong tin-edyer nga batang lalaki nga magbungabunga pagsulti. Lisod para nako ang pagsangyaw, ilabina kon ikahibalag nako ang akong mga eskolmet. Nasayod ako nga kining artikuloha makatabang ug dako sa ubang mga batan-on.

W. T., Tinipong Bansa

Kasaligang Tambag Salamat sa pagtagana niining dagaya ug impormatibong basahon. Ang inyong mga artikulo nagkobre sa nagkadaiyang mga ulohan, ug dili sama sa ubang mga publikasyon, ang inyong mga artikulo walay-gidapigan ug matinahoron ug tinamdan sa mga tinuohan sa uban. Ang Pagmata! nahimo nakong suod ug dili-ikabilin nga higala, usa ka tinubdan sa kasaligang tambag nga makatabang kanako sa pag-atubang sa mga suliran sa kinabuhi uban ang paglaom.

N. P., Brazil