“Among Sugton ang Diyos Inay ang mga Tawo”

Sa nag-edad siya ug 17 anyos, si Adam maoy usa sa tulo ka mananaog sa usa ka bangga nga gipaluyohan sa Holocaust Memorial Museum sa T.B. Ang duolan sa 500 nga misalmot sa bangga migamit ug arte o sinulat aron sa paghulagway sa kaisog ilalom sa pagdaogdaog sa Nazi. Si Adam maoy usa sa mga Saksi ni Jehova, ug nakahukom siya sa paggama ug usa ka collage nga maghulagway sa kalisdanan nga gisagubang sa mga membro sa iyang relihiyon ilalom sa rehimeng Nazi. Si Adam nag-ingon nga ang maong arte nagpahayag, dili sa kaparotan o kayugot, kondili sa kalipay tungod kay nagmadaogon ang mga Saksi ni Jehova batok sa mabangis nga pag-atake nianang pintas nga tigdaogdaog. May batang babaye nga gipakita diha sa collage. Ngano man? “Aron ipakita nga bisan ang mga bata nagpabiling lig-on batok sa paglutos sa Nazi,” matod ni Adam.

Daghan ang nasayod nga panahon sa Nazi, ang mga Saksi ni Jehova wala mosaludar kang Hitler o mopaluyo sa iyang politikal nga partido. Giilustrar ang ilang baroganan diha sa ibabaw nga tuong bahin sa collage ni Adam. Gikutlo didto ang usa ka sulat nga gipadala sa tanang kongregasyon sa mga Saksi ni Jehova ngadto sa kagamhanang Aleman niadtong Oktubre 7, 1934. Sa bahin, ang sulat nag-ingon: “May direktang panagsumpaki tali as inyong balaod ug sa balaod sa Diyos, ug, sa pagsunod sa panig-ingnan sa matinumanong mga apostoles, ‘kinahanglang sugton namo ang Diyos inay ang mga tawo,’ ug kini among himoon. (Buhat 5:29) . . . Sanglit kay ang inyong kagamhanan ug ang mga opisyales niana nagpadayon sa inyong pagsulay sa pagpugos kanamo sa paglapas sa kinatas-ang balaod sa uniberso, napugos kami karon sa pagpahibalo kaninyo nga kami, pinaagi sa iyang tabang, mosugot kang Jehova nga Diyos ug sa bug-os magasalig Kaniya sa pagluwas kanamo gikan sa tanang pagdaogdaog ug mga tigdaogdaog.”

Mapasigarbohon si Adam sa iyang espirituwal nga panulondon. “Hugot nga gituohan sa mga Saksi ni Jehova nga dili nila daoton ang ilang isigkatawo ug ang Diyos lamang ang simbahon, bisan pag nagkahulogan kini ug kamatayon,” matod niya. Ang dili mausab nga baroganan sa mga Saksi ni Jehova makita diha sa ulohan sa collage ni Adam: “Among Sugton ang Diyos Inay ang mga Tawo!”