Ang Isyu—Kon sa Unsang Paagi Nagsugod Kini

ANG STRATTON, OHIO, T.B.A., maoy gamayng komunidad nga naa sa duol sa Suba sa Ohio, nga nag-ulot sa estado sa Ohio ug sa West Virginia. Gibatbat kini ingong usa ka balangay ug adunay alkalde. Kining gamayng komunidad nga adunay kubos sa 300 ka molupyo kalit nahimong sentro sa panagbangi niadtong 1999 sa gisulayan sa mga awtoridad didto nga ang mga Saksi ni Jehova obligahon, apil sa ubang mga butang, sa pagkuhag permiso sa dili pa moduaw sa kabalayan sa mga tagabalangay nga nagdala sa ilang gibase-sa-Bibliya nga mensahe.

Nganong kadto usa ka hinungdanong isyu? Samtang magbasa ka sa among asoy, imong masabtan nga ang maong matang sa ordinansa ug pagkontrol sa gobyerno maglimite gayod sa mga katungod bahin sa gawasnong pagsulti dili lang sa mga Saksi ni Jehova kondili sa tanang molupyo sa Tinipong Bansa.

Kon sa Unsang Paagi Nagpadayon ang Panagbangi

Ang mga molupyo sa Stratton giduaw sa daghang katuigan sa mga ministro sa Kongregasyon sa mga Saksi ni Jehova sa Wellsville, nga nakasinatig mga suliran batok sa pipila ka lokal nga opisyales bahin sa maong balay-balay nga ministeryo sukad pa niadtong 1979. Sa sayong bahin sa katuigang 1990, gigukod sa usa ka polis ang usa ka grupo sa mga Saksi pagawas sa lungsod, nga miingon: “Wala koy labot sa inyong mga katungod.”

Ang isyu misangko nga kinagrabehan niadtong 1998 sa dihang ang alkalde sa Stratton personal nga nakigharong sa upat ka Saksi ni Jehova. Nagdrayb sila niadto pagawas na sa balangay pagkatapos sa ilang pagbalikduaw didto nga nakigsulti sa mga molupyo nga nagpakitag interes sa pagpakighisgot sa Bibliya. Sumala pa sa usa sa mga babaye nga giatubang, ang alkalde miingon nga kon sila mga lalaki pa, sila iyang ipabilanggo.

Ang hinungdan sa kinaulahiang panagbangi mao ang ordinansa sa balangay nga “Pagkontrolar sa Wala-Dapitang Pagpamaligya ug Pagpanukot Diha sa Pribadong Propiedad,” nga nag-obligar kang bisan kinsa nga magbalay-balay sa pagkuhag permiso, nga walay bayad, gikan sa alkalde. Giisip sa mga Saksi ni Jehova nga kanang maong ordinansa maoy pagpanghilabot sa kagawasan sa panulti, kagawasan sa pagsimba, ug  kagawasan sa prensa. Busa, nagpasaka silag usa ka kaso sa pederal nga korte human sa pagdumili sa balangay nga usbon ang ilang pagpatuman sa maong ordinansa.

Niadtong Hulyo 27, 1999, ang usa ka husay gihimo atubangan sa huwes sa korte sa distrito sa T.B. alang sa Habagatang Distrito sa Ohio. Gisuportahan niya ang pagkakonstitusyonal sa ordinansa labot sa permiso sa balangay. Human niadto, sa Pebrero 20, 2001, ang Korte sa Apelasyon sa T.B. alang sa Ikaunom nga Korte misuportar usab sa hukom nga ang ordinansa nahiuyon sa konstitusyon.

Aron mahusay ang isyu, ang Watchtower Bible and Tract Society of New York duyog sa Kongregasyon sa mga Saksi ni Jehova sa Wellsville mihangyo sa Korte Suprema sa T.B. sa pagrepaso sa kaso.

[Mapa/Hulagway sa panid 3]

(Alang sa aktuwal nga pagkahan-ay, tan-awa ang publikasyon)

Los Angeles

New York

OHIO

Stratton