Gikan sa Among mga Magbabasa

Globalisasyon Nalingaw ako sa inyong panghapin nga serye nga “Globalisasyon​—Tunglo o Solusyon?” (Mayo 22, 2002) Nakatambong na akog ubay-ubayng mga pakigpulong maylabot sa globalisasyon ug namatikdan nako nga may gidapigan ang maong mga presentasyon. Ang mga mamumulong mahimong modapig sa globalisasyon pinaagi sa pagsaysay sa mga kaayohan niini o magsaway niini nga walay ihatag nga kapilian. Bisan pa niana, sumala sa gipakita sa inyong mga artikulo, ang Gingharian sa Diyos magpatunghag usa ka globalisasyon nga makahatag ug kaayohan kanatong tanan. Maikagon kaayo akong nagapaabot sa maong mapuslanong mga kausaban!

E. F., Pilipinas

Sa makausa pa nakasulat kamog maayo kaayong artikulo nga dayegon gayod sa kadaghanan. Sumala sa gipasiugda sa inyong konklusyon, ang bugtong solusyon alang sa katawhan mao ang pagmando sa Gingharian sa Diyos ibabaw sa usa ka paraisong yuta. Buot kong ipahayag ang akong pagpasalamat sa inyong maayong buluhaton sa pagpatik ug mga artikulo nga may kalabotan sa makuyaw nga mga adlaw nga atong ginapuy-an.

G. B., Irlandia

Buot kong pasalamatan kamo tungod sa inyong dalayegong buluhaton sa pag-ebanghelyo. Nabasa nako ang panghapin nga serye nga “Globalisasyon​—Tunglo o Solusyon?” ug nakaplagan kining tukma gayod. Kining seryeha motabang kanato sa pagkaamgo sa atong tawhanong mga limitasyon. Motabang usab kini kanato sa pagsabot nga kon dili kita magkinabuhi subay sa mga balaod ni Jehova, dili gayod kita molampos.

J. D., Belgium

Buot kong ipahayag ang akong pagdayeg sa mga artikulo bahin sa globalisasyon. Maayo kaayo kining pagkasulat ug pagkahulagway. Sa wala pa nako basaha kining mga artikuloha, wala gayod koy ideya kon unsay kahulogan sa termino, apan karon daghan na kog nahibaloan bahin niini. Malingaw gayod ako sa pagbasa sa Pagmata!

E. K., Peru

Pandungog Daghan kaayong salamat sa artikulo nga “Ampingi ang Imong Igdulungog!” (Mayo 22, 2002) Unang tuig ko karon sa pagbansay aron mahimong espesyalista sa hearing-aid, busa nahibalo ako sa mga epekto sa kabanha matag adlaw. Sa pagkatinuod, hinungdanon nga pahibaloon ang mga batan-on sa adlaw-adlaw nga kabanha nga niana ilang giladlad ang ilang kaugalingon.

C. K., Alemanya

Mga Batan-on Nangutana Alang nako, matulon-anon kaayo ang artikulo nga “Mga Batan-on Nangutana . . . Unsaon Ko Pagkakaplag ug Kauban sa Lawak nga Akong Ikasinabot?” (Mayo 22, 2002) Hamtong na ako, apan di pa dugay nagbulag mi sa akong bana. Nakurat ako sa pagkasayod nga tungod sa kamahal sa palaliton, dili na ako makahimo sa pagkinaugalingon. Ang akong bugtong sulbad mao ang pagpangitag kauban sa lawak. Gihunahuna ko nga tungod sa akong pangedaron, kini mahimo gayong suliran. Ang usa ka batan-ong sister, nga bag-o lang miduyog sa among kongregasyon, nagkinahanglan usab ug kauban. Nag-uban mi pagpuyo. Ang among panag-uban maoy panalangin gayod. Wala madugay, nagkalisod mi sa panalapi, ug lain pang sister ang miipon pagpuyo kanamo. Makaingon ko nga sa organisasyon lamang ni Jehova nga ang usa ka 60-anyos nga lola ug duha ka batan-ong babaye nga lainlain ug kagikan makakaplag ug dagayang pakigdait ug gugma samtang nagauban pagpuyo! Nahimo ming usa ka gamay nga pamilya, ug sa daghang paagi kini nakahupay sa kahaw-ang sa among kinabuhi.

L. G., Tinipong Bansa

Pagpaniid sa Kalibotan Salamat sa artikulo diha sa “Pagpaniid sa Kalibotan” nga nag-ulohang “Pagsabot sa Sakit sa Hunahuna.” (Mayo 22, 2002) Duna akoy bipolar disorder sulod na sa 18 ka tuig. Bisan pa niining maong balatian, ako nagkinabuhi ug usa ka mabungahong kinabuhi. Nakapadako akog tulo ka anak nga mga lalaki ug usa ako ka maayong asawa sa akong bana. Nakatabang usab akog pipila ka tawo nga makahibalo bahin sa Bibliya. Aduna akoy mahigugmaong pamilya ug mga higala diha sa kongregasyon. Salamat sa Pagmata! Kini nagtuboy kanatong tanan ngadto sa samang sukod sa edukasyon.

H. B., Habagatang Aprika

[Picture Credit Line sa panid 30]

Mountain High Maps® Copyright © 1997 Digital Wisdom, Inc.