Korte Suprema Mihukom Pabor sa Kagawasan sa Panulti

ANG ADLAW SA DESISYON miabot niadtong Hunyo 17, 2002, sa dihang gipatik sa Korte Suprema ang sinulat nga mga hukom niini. Unsa ba ang desisyon? Ang mga ulohan sa mantalaan maoy nagpahibalo sa resulta. Mipatugbaw ang The New York Times: “Giwagtang sa Korte ang Restriksiyon sa Pagduaw sa mga Saksi ni Jehova.” Mipahayag ang The Columbus Dispatch sa Ohio: “Ginulo sa Hataas nga Korte ang Obligadong Permiso.” Yanong nag-ingon ang The Plain Dealer sa Cleveland, Ohio: “Mga Solisitador Wala Magkinahanglan sa OK sa City Hall.” Miproklamar ang Op/Ed nga panid sa USA Today: “Nakadaog ang Kagawasan sa Panulti.”

Gibalit-ad ang mga desisyon sa ubos nga korte batok sa mga Saksi ni Jehova pinasukad sa botos nga 8 kontra 1! Gisulat ni Justice John Paul Stevens ang opisyal 18-panid nga Hukom sa Korte. Ang desisyon maoy usa ka malukpanong pagpamatuod sa panalipod sa Unang Enmiyenda nga gihatag sa publikong ministeryo sa mga Saksi ni Jehova. Diha sa sinulat nga hukom niini, ang Korte nagpatin-aw nga ang mga Saksi dili moaplay alang sa permiso tungod kay giingon nila nga “ilang nadawat ang ilang awtoridad sa pagsangyaw gikan sa Kasulatan.” Unya gikutlo sa Korte ang testimonya diha sa ilang sinulat nga argumento: “Alang kanamo ang pagpangayog permiso sa pagsangyaw gikan sa munisipyo maoy halos pag-insulto sa Diyos.”

Mipahayag ang Sinulat nga Hukom sa Korte: “Sulod sa kapin sa 50 ka tuig, ginulo sa Korte ang mga restriksiyon sa pagkambas ug pagpanagtag sa mga pulyeto diha sa kabalayan. Dili kay sulagma lang sa kasaysayan nga ang kadaghanan nianang mga kasoha naglambigit sa mga pagkuwestiyon sa mga Saksi ni Jehova sa Unang Enmiyenda, kay ang pagkambas diha sa kabalayan giobligar man sa ilang relihiyon. Sumala sa among gipahayag diha sa Murdock v. Pennsylvania, . . . (1943), ang mga Saksi ni Jehova ‘nag-angkon nga nagsunod sa panig-ingnan ni Pablo, nga nanudlo “sa publiko, ug sa balay ug balay.” Buhat 20:20. Literal ang ilang pagsabot sa sugo sa Kasulatan,  “Panglakaw kamo sa tibuok nga kalibotan, ug iwali ang maayong balita ngadto sa tanang kalalangan.” Marcos 16:15. Sa ilang pagbuhat niana sila nagtuo nga ilang ginasugot ang usa ka sugo sa Diyos.’”

Unya gikutlo na usab sa Sinulat nga Hukom ang 1943 nga kaso: “Ubos sa Unang Enmiyenda kining matanga sa relihiyosong kalihokan sama ka hinungdanon sa pagsimba diha sa mga simbahan ug sa pagwali gikan sa mga pulpito. Kini samang may katungod sa panalipod sama sa mas dinawat ug naandang mga tulumanon sa relihiyon.” Sa pagkutlo sa usa ka 1939 nga kaso, ang Sinulat nga Hukom miingon: “Ang pag-obligar sa pagsensura pinaagi sa pagkuhag lisensiya nga maghimog imposible sa librelibre ug walay-kababagan nga pagpanagtag sa mga pulyeto makadaot sa mga garantiya sa konstitusyon.”​—Italiko ilaha.

Unya ang Korte mihimog makahuloganong pahayag: “Ang mga kaso nagpasundayag nga ang mga panlimbasog sa mga Saksi ni Jehova sa pagsupak sa pagkontrolar sa panulti dili pakigbisog alang lamang sa ilang mga katungod.” Ang Sinulat nga Hukom nagpatin-aw nga ang mga Saksi maoy dili lamang ang ‘ordinaryong mga tawo’ nga nag-atubang sa kapeligrohan nga pahilomon pinaagi sa mga lagda nga pareho sa ordinansa sa Balangay.”

Ang Sinulat nga Hukom nag-ingon pa nga ang ordinansa “maoy insulto​—dili lamang sa mga prinsipyong gipanalipdan sa Unang Enmiyenda, kondili sa ideya mismo sa gawasnong katilingban​—nga kon bahin sa matag-adlawng mga pakigkabildo ang lungsoranon kinahanglang magpahibalo sa gobyerno sa iyang tinguhang makigsulti sa iyang mga silingan ug dayon mokuhag permiso aron buhaton kana. . . . Ang balaod nga mag-obligar sa pagkuhag permiso aron makigkabildo maoy hingaping pagbulag sa atong nasodnong panulondon ug sumala-sa-konstitusyong tradisyon.” Unya ang Sinulat nga Hukom naghisgot bahin sa “makadaot kaayong epekto sa pag-obligar sa maong permiso.”

Mga Kapeligrohan sa Krimen

Unsa na man ang hunahuna nga ang permiso maoy panalipod batok sa mga kawatan ug sa ubang mga kriminal? Ang Korte miergo: “Bisan pag makataronganon ang pagtagad sa maong mga kabalaka, sumala sa nangaging mga kaso tin-aw nga gikinahanglan ang pagbalanse sa maong mga kabalaka ug sa epekto sa mga lagda nganha sa mga katungod sa Unang Enmiyenda.”

Ang Sinulat nga Hukom sa Korte nagpadayon: “Ang pagkawalay permiso lagmit dili makapugong sa mga kriminal sa pagpanuktok sa mga pultahan ug sa pagpakigsulti nga wala hisgoti sa ordinansa. Pananglitan, sila tingali magpatultol sa dalan o mananghid nga motelepono, . . . o tingali magparehistro sila sa dili-tinuod nga ngalan nga dili masilotan.”

Sa paghisgot sa mga desisyon sa katuigang 1940, ang Korte misulat: “Ang mga pulong nga gigamit sa legal nga mga desisyon sa panahon sa Gubat sa Kalibotan II nga sa kadaghan nakaluwas sa mga kaigsoonan sa pagtuo sa mga tigpetisyon [Watch Tower Society] gikan sa mga asunto gumikan sa korto nga kaisipan mopadayag sa pagtimbangtimbang  sa Korte labot sa mga kagawasan sa Unang Enmiyenda nga nalambigit niining kasoha.”

Unsay kataposang desisyon sa Korte? “Gibalit-ad ang desisyon sa Korte sa Apelasyon, ug ang kaso gibalik sa maong korte alang sa dugang proseso nga nahiuyon niining sinulat nga hukom. Kini ang among instruksiyon.”

Busa, ang resulta maoy, sumala sa gipahayag sa Chicago Sun-Times, “Korte Nagpaluyo sa mga Saksi ni Jehova,” ug pinasukad kana sa mayoriya nga 8 kontra 1.

Unsa Kaha ang Umaabot?

Unsay pag-isip sa mga Saksi ni Jehova sa duol nga Kongregasyon sa Wellsville sa maong kadaogan sa Korte Suprema? Wala gayoy katarongan nga manghambog bahin niana sa kaulawan sa mga molupyo sa Stratton. Ang mga Saksi walay pagdumot sa madungganong mga tawo sa balangay. Si Gregory Kuhar, usa ka lokal nga Saksi, miingon: “Dili among kagustohan kining maong kaso sa korte. Ang ordinansa mismo ang sayop. Ang among gibuhat maoy dili lamang alang kanamo, kondili alang sa tanan.”

Gipakita sa mga panghitabo nga ang mga Saksi naningkamot gayod nga dili pasuk-on ang lokal nga katawhan. Si Gene Koontz, laing Saksi, mipatin-aw: “Ang kataposang higayong nagsangyaw kami sa Stratton maoy Marso 7, 1998​—kapin nag upat ka tuig kanhi.” Midugang siya: “Ako mismo gisultihan nga dakpon. Latas sa daghang katuigan kami may daghang taho mahitungod sa mga polis nga nanghulga sa pagdakop kanamo. Unya sa dihang mihangyo kami nga motan-aw sa sinulat nga ordinansa, wala gayod kami tubaga.”

Si Koontz midugang: “Palabihon namo nga kami may maayong relasyon uban sa among mga silingan. Kon dili gusto sa pipila nga kami moduaw kanila, among tahoron ang ilang desisyon. Apan ang uban mahigalaon ug gustong makigsulti bahin sa Bibliya.”

Si Gregory Kuhar mipatin-aw: “Kining kasoha wala namo ipadayon aron kontrahon ang katawhan sa Stratton. Buot lamang namo nga matukod sa legal nga paagi ang among kagawasan sa panulti ubos sa Konstitusyon.”

Siya mipadayon: “Ngadtongadto, kami naglaom nga makabalik sa Stratton. Malipay ako nga maoy unang manuktok sa usa ka pultahan sa among pagbalik. Kinahanglang mobalik kami sumala sa sugo ni Kristo.”

Ang resulta sa “Watchtower v. Village of Stratton” dunay layog-abot nga mga epekto. Human mahibalo sa desisyon sa Korte Suprema, daghang opisyales sa mga munisipalidad sa T.B. miila nga ang lokal nga mga ordinansa dili na diay magamit sa pagdili sa pag-ebanghelyo sa mga Saksi ni Jehova. Sa pagkakaron, ang mga pagdili sa pagsangyaw diha sa mga ganghaan nahusay na diha sa duolan sa 90 ka komunidad sa Tinipong Bansa.

[Kahon sa panid 9]

“NAKADAOG NA USAB ANG MGA SAKSI NI JEHOVA”

Si Charles C. Haynes, senyor nga eskolar ug direktor sa mga programa sa edukasyon sa First Amendment Center, misulat sa mga pulong sa itaas diha sa Freedom Forum Web site, ubos sa ulohang “Ang Kagawasan sa Pagtuo.” Si Haynes nagpadayon: “Sa miaging semana [ang mga Saksi] nakaangkon sa ilang ika-48 nga kadaogan sa Korte Suprema​—talagsaong serye sa mga kaso nga nakapauswag pag-ayo sa mga panalipod sa Unang Enmiyenda alang sa tanang Amerikano.” Siya nagpasidaan: “Hinumdomi kini: Kon ang gobyerno makapiot sa usa ka relihiyon, kini adunay gahom sa pagpiot sa kagawasan sa bisan unsang relihiyon​—o sa tanang relihiyon. . . . Hinuon, ang mga tawo adunay katungod nga dili magpatalinghog​—ug sa pagsira sa pultahan. Apan ang gobyerno dili angayng makabaton sa awtoridad sa pagdesisyon kon kinsay tugotan nga manuktok sa pultahan. Busa salamat sa Korte Suprema.”

Si Haynes mihinapos: “Kitang tanan nakautang ug kabubut-on sa mga Saksi ni Jehova. Bisan kon pila ka beses sila giinsulto, gigukod pagawas sa lungsod, o gidagmalan pa sa pisikal, sila nagpadayon sa pagpakigbisog alang sa ila (ug sa atoa usab) nga kagawasan sa relihiyon. Ug sa dihang makadaog sila, makadaog kitang tanan.”

[Kahon/Mga hulagway sa panid 10, 11]

ANG DESISYON SA KORTE SUPREMA—KON UNSAY GISULTI SA PRENSA

◼ “Korte Nagpaluyo sa mga Saksi ni Jehova; Balay-Balay nga Ministeryo Wala Magkinahanglag Permiso

Sa ilang buluhaton sa pagpanuktok sa mga pultahan ingong mga Saksi ni Jehova, [ang mga Saksi] nagtuo kanunay nga ang Diyos nagpaluyo kanila. Karon ang Korte Suprema sa T.B. nagpaluyo usab kanila.”​—Chicago Sun-Times, Hunyo 18, 2002.

◼ “Kagawasan sa Panulti Nakadaog

Sa sunod higayon nga ang pipila ka Saksi ni Jehova mobalda sa imong paniudto, ikaw makahunahuna tingali sa pagpasalamat kanila. Tungod sa ilang maisogong pagtuman sa ilang relihiyosong mga prinsipyo, kining dili-naandang denominasyon sa duolag 1 ka milyong membro [sa Tinipong Bansa] lagmit mas dakog nabuhat kay sa ubang institusyon aron maseguro ang kagawasan sa panulti alang sa matag usa ka Amerikano. . . .

“Alang sa mga Saksi, ang pagdangop sa hataas nga korte naandan nilang ginahimo. Sa kapig 24 ka kaso latas sa 65 ka katuigan, sila nakapakigbisog nga malamposon batok sa pagpanglupig sa mayoriya.”​—USA TODAY, Hunyo 18, 2002.

◼ “Balay-Balay nga Pagduaw Gihukom nga Konstitusyonal nga Katungod. Desisyon Maoy Kadaogan sa mga Saksi ni Jehova

Ang Korte Suprema sa T.B. mihukom niadtong Lunes nga ang mga politiko, relihiyosong mga grupo, mga Girl Scout ug uban pa adunay konstitusyonal nga katungod sa pagduaw sa balay-balay nga magpauswag sa ilang mga kawsa nga dili una mokuhag permiso gikan sa lokal nga mga opisyales.”​—San Francisco Chronicle, Hunyo 18, 2002.

◼ “Korte Suprema: Mga Saksi ni Jehova ug mga Girl Scout Dili Nimo Kapugngan sa Pagpanuktok

WASHINGTON​—Ang Konstitusyon nagapanalipod sa katungod sa mga misyonaryo, mga politiko ug uban pa sa pagpanuktok sa mga pultahan nga dili mokuhag permiso gikan sa lokal nga mga awtoridad, ang Korte Suprema mihukom karong adlawa. . . .

“Sa botos nga 8 kontra 1, ang korte nangatarongan nga ang katungod sa kagawasan sa panulti sa Unang Enmiyenda naglakip sa katungod sa direktang pagdala sa usa ka mensahe ngadto sa pultahan sa usa ka tawo.”​—Star Tribune, Minneapolis, Hunyo 18, 2002.

[Hulagway sa panid 9]

Justice Stevens

[Credit Line]

Stevens: Collection, The Supreme Court Historical Society/Joseph Bailey