Gikan sa Among mga Magbabasa

Pagsurbi Nalingaw ako sa artikulo nga “Pagsurbi​—Unsa Kini?” (Hunyo 8, 2002) Ang akong bana ug ako maoy mga inspektor sa Estado sa Florida alang sa paghimog karsada. Sa among trabaho, ang pagsurbi maoy adlaw-adlaw nga buluhaton. Nalipay ko nga nasayod sa kasaysayan niini, ug ang inyong pagpasiugda sa Proverbio 22:28 nakapahimo niining talagsaon gayod. Bisag nahibalo ko nga ang mga hulagway maoy mga ilustrasyon lamang, gusto kong ipatin-aw nga iinsistir gayod namo nga ang tanang surbeyor mogamit ug mga besti ug mga himan sa kahilwas. Kini maghimo kanilang daling makita, tungod kay sila sagad magtrabaho diha sa daplin sa dalan nga magtalikod sa nagpadulong nga mga sakyanan. Salamat sa matulon-anon kaayong artikulo!

C. S., Tinipong Bansa

Pakiggubat Gaan kaayo ang akong pagbati human nako mabasa “Ang Hunahuna sa Bibliya: Ang Diyos ba Mouyon sa Pakiggubat?” (Mayo 8, 2002) Kining ulohana nakapabalaka nako tungod kay ako usa sa mga Saksi ni Jehova ug ang mga tawo nga akong nasangyawan nangutana nako kon nganong ang karaang nasod sa Israel nakigsangka man ug daghan kaayong gubat. Naningkamot kong ipatin-aw kana, apan wala koy igong kasayoran. Yano ug makapakombinsir kining artikuloha! Gikopya ko ang tanang punto aron magamit ko kini sa bisan unsang higayon. Gikinahanglan gayod namo ang maong mga artikulo!

V. S., Rusya

Usa ako ka drayber sa tangke-de-giyera niadtong Gubat sa Kalibotan II. Sa buntag human mailog ang usa ka hinungdanong bungtod, usa ka halaran ang gitukod sa maong dapit. Nahinumdoman ko nga dihay tulo ka sundalo nga tigmaneho sa tangke nga nangluhod atubangan sa halaran ug gibendisyonan sa pari. Wala madugay human niana, kami na usab ang gisulong, ug ang tulo ka sundalo nga tigmaneho sa tangke nangamatay. Ang akong asawa ug ako nahimong mga Saksi ni Jehova niadtong 1957, ug niadtong panahona among nasayran nga ang Diyos walay gidapigan sa maong panaggubat. Sukad niadto, nakig-away kami sa espirituwal nga pakiggubat, ug nahibalo gayod kami kon kinsay gidapigan sa Diyos.

F. S., New Zealand

Pagkainahan Salamat sa serye nga “Ang Pagkainahan​—Nagkinahanglan bag Usa ka Superyor nga Babaye?” (Abril 8, 2002) Ako 13 anyos pa lamang, apan kining mga artikuloha nagpakita kanako kon unsay nasinatian ni Mama ug kon unsay iya pang masinatian sa umaabot nga mga bulan​—lima ka bulan ug tunga na siyang nagsabak. Karon nga nabasa na nako kining magasina, maningkamot gayod ako kutob sa akong mahimo nga pasidunggan ug tahoron siya.

N. B., Tinipong Bansa

Alta Presyon Salamat sa nindot nga artikulo nga “Alta Presyon​—Pagsanta ug Pagkontrolar.” (Abril 8, 2002) Kinahanglan kong maospital tungod sa kalit nga atake sa kasingkasing. Human niana, nabasa ko kining artikuloha, ug gidetalye pag-ayo niini kon unsaon pagsagubang sa alta presyon. Siyempre, daghang pahimangno ang akong nadawat gikan sa akong doktor ug nutrisyonista. Apan, kining artikuloha gisulat sa paagi nga daling masabtan. Sukad karon, ampingan ko gayod ang kinabuhi nga gihatag ni Jehova kanako!

N. I., Japan

Aduna koy alta presyon, ug gitambagan ko sa mga propesyonal nga tig-atiman sa panglawas nga limitehan ang pagkaog asin kutob sa mga dos gramos kada adlaw. Sa panid 22, ang numero nga unom ka gramo kada adlaw, nga gipahiuyon sa Ikatulong Brazilianong Kasabotan Bahin sa Alta Presyon sa Arteriya, morag taas ra kaayo. Dili ba kini sayop lang sa pagpatik?

F. S., Tinipong Bansa

Ang “Pagmata!” nagtubag: Ang tinubdan sa maong pamulong nagrekomendar ug dili molabaw sa 100 mEq (milliequivalent) nga asin kada adlaw, nga maoy 5.85 gramos. Ang usa ka kutsarita, nga tingali mas daling mahanduraw, maoy mga 5.18 gramos. Apan, sumala sa gipaila sa potnot, ang usa ka tawo nga may alta presyon o may susamang balatian kinahanglang magpakonsulta sa doktor. Tingali makabenepisyo ang maong tawo kon mas diyutay pa nga asin ang iyang kaonon.