Kinahanglan Kang Matulog ug Maayo!

Aduna bay si bisan kinsang mosupak sa pahayag nga ang hinanok nga pagkatulog sa gabii hinungdanon aron mahuptan ang maayong panglawas? Lagmit wala. Apan, alang sa daghan dili kaayo hinungdanon ang pagkatulog. “Apan mag-antos ka sa sangpotanan niana pagkasunod adlaw,” nag-ingon si Shawn Currie, nga usa ka clinical psychologist ug katabang nga propesor didto sa University of Calgary, sa Canada. Kon kulang ka ug tulog, lagmit mahimo kang mas sapoton ug usahay masulub-on pa.

“Gituohan sa mga siyentipiko nga ang pagkatulog may gahom sa pagpasig-uli sa utok, ug nga ang pagkat-on magpadayon panahon sa pagkatulog,” nag-ingon ang mantalaang Calgary Herald. Si Propesor Currie nag-ingon: “Inigkagabii mapalig-on nimo ang imong mga panumdoman ug ang bisan unsang butang nga imong nasayran panahon sa adlaw matisok ug maayo sa gabii. Sa pagkatinuod, mawala ang nakat-onan kon dili ka makapahulay.” Dugang pa, siya nag-ingon nga “kon makatulog kag maayo, lagmit makatabang usab kini sa pagpalig-on sa imong mga pagbati.”

Busa, unsa ka taas ang igong pagkatulog? Bisan pag giingon sa daghang eksperto nga igo na ang walo ka oras, si Currie nag-ingon: “Ang mga tawo magkalahi ug panginahanglan sa pagkatulog.” Tungod niana, siya misugyot nga tinguhaon nga makatulog ug maayo. Apan sa unsang paagi makab-ot kana, ilabina niadtong may suliran sa pagkatulog? Aniay pipila ka sugyot:

◼ Kaligo ug medyo init nga tubig sa dili pa matulog.

◼ Himoa ang kasarangan nga mga ehersisyo sa makadaghan sulod sa usa ka semana; apan ayaw paghimog hago nga ehersisyo sa dayon nang matulog.

◼ Hupting hilom, ngitngit, ug medyo bugnaw ang imong lawak.

◼ Paningkamoting mobangon sa samang oras kada buntag aron maestablisar ang regular nga kinatulgan.

Tungod sa dayag nga mga benepisyo sa panglawas, magmaalamon ug himoa ang pagkatulog nga usa sa imong mga prioridad.