Ang Hunahuna sa Bibliya

Aduna bay Sala nga Dili Mapasaylo?

ADUNA bay silot nga molabaw pa sa kamatayon? Oo, ang kamatayon nga walay paglaom sa pagkabanhaw tungod kay ang usa ka tawo nakasala nga dili mapasaylo. Si Jesus nag-ingon nga dunay matang sa sala nga “dili pagapasayloon.”​—Mateo 12:31.

Apan, ang Bibliya naghubit sa Diyos ingong mapinasayloon. Bisan tuod makiling ang mga tawo sa paghambin ug kasuko ug dili mopasaylo, ang Diyos ‘nagapasaylo sa madagayaon gayod.’ (Isaias 55:7-9) Gani, sa iyang dakong kapildihan, gipadala sa Diyos ang iyang minahal nga Anak nganhi sa yuta aron mahimong usa ka halad pasig-uli, o pangtabon, nga bililhon kaayo nga kini makapapas sa atong mga sala.​—Juan 3:​16, 17; Buhat 3:19; 1 Juan 2:​1, 2.

Sa nahaigong panahon banhawon sa Diyos ang daghang tawo nga sad-an sa grabeng mga sala apan kinsa wala nay tulubagon sa ilang nangaging mga kasaypanan. (Buhat 24:15; Roma 6:23) Gani, miingon si Jesus nga gawas sa sala nga dili mapasaylo, ‘ang tanang matang sa sala ug pasipala pagapasayloon.’ (Mateo 12:31) Busa mahibulong ka tingali, ‘Unsay nakapagrabe sa maong sala nga dili man kini mapasaylo sa Diyos?’

Sa Dihang Dili na Posible ang Paghinulsol

Ang pasidaan ni Jesus nagtumong sa tinuyong “pasipala batok sa espiritu.” Dili mapasaylo kining matanga sa sala. “Dili, dili niining sistemaha sa mga butang ni nianang sa umaabot,” siya midugang. (Mateo 12:​31, 32) Kadtong makasala sa maong sala dili pagabanhawon.

Unsa ang pagpasipala batok sa espiritu? Kini naggikan sa kasingkasing, nga nagpadayag ug usa ka daotang tinamdan ug katuyoan. Ang tinuyong pagbatok sa balaang espiritu sa Diyos magpasamot sa kabug-at sa maong sala. Sa pag-ilustrar: Diha sa ubang dapit sa kalibotan, ang balaod nag-ila sa kalainan tali sa first-degree murder ug sa second-degree murder pinasukad sa katuyoan ug sa paagi sa pagpatay, ug ang silot nga kamatayon ipahamtang lamang sa tinuyo o giplano-daan nga pagpatay.

Si apostol Pablo maoy usa ka tigpasipala kanhi apan miingon: “Gipakitaan akog kaluoy, tungod kay ako walay alamag.” (1 Timoteo 1:13) Ang pagpakasala batok sa balaang espiritu maoy tinuyo nga pagpakigbatok niana. Naglakip kini sa daotang kahimtang sa kasingkasing nga miabot hangtod sa punto nga lisod nang magbag-o.

Dayag nga gitumong ni Pablo kining matanga sa sala sa dihang siya misulat: “Imposible  nga silang sa makausa nalamdagan na, ug nakatilaw na sa walay bayad nga langitnong gasa, ug nahimong mga mag-aambit sa balaang espiritu, ug nakatilaw na sa maayong pulong sa Diyos ug sa mga gahom sa umaabot nga sistema sa mga butang, apan nahulog, ang pagpabalik pa kanila sa paghinulsol.” (Hebreohanon 6:4-6) Ang apostol miingon usab: “Kay kon kita tinuyo nga magpakasala human makadawat sa tukmang kahibalo sa kamatuoran, wala nay halad nga nahibilin alang sa sala.”​—Hebreohanon 10:26.

Ang panggawi sa pipila ka relihiyosong mga pangulo sa iyang adlaw mao ang nakatukmod kang Jesus sa pagpasidaan batok sa sala nga dili mapasaylo. Apan wala sila manumbaling sa iyang pasidaan. Gani, ilang gipapatay siya. Sa ulahi nakadungog silag dili-malalis nga ebidensiya nga ang balaang espiritu nagmilagro. Gisultihan sila nga si Jesus nabanhaw! Tin-aw nga si Jesus mao ang Kristo! Bisan pa niana, sila milihok sa daotang paagi batok sa balaang espiritu pinaagi sa pagsuhol sa Romanong mga sundalo aron ipanghimakak ang pagkabanhaw ni Jesus.​—Mateo 28:11-15.

Pasidaan Alang sa Matuod nga mga Kristohanon

Nganong seryosong tagdon sa matuod nga mga Kristohanon ang pasidaan maylabot sa sala nga dili mapasaylo? Tungod kay bisan pag nakabaton na kitag tukmang kahibalo sa Diyos ug sa paglihok sa iyang espiritu, mahimong maugmad gihapon nato ang daotang kasingkasing. (Hebreohanon 3:12) Angay kitang magbantay nga dili maghunahuna nga dili gayod kini mahitabo kanato. Tagda si Judas Iscariote. Siya maoy usa ka matinumanong sumusunod ni Jesus kanhi. Gipili siya ingong usa sa 12 ka apostoles, busa aduna gayod siyay maayong mga hiyas. Apan sa usa ka punto gitugotan niyang motubo ang daotang mga hunahuna ug mga tinguha, ug sa ngadtongadto gidaog siya niini. Sulod sa yugto sa panahon nga iyang nakita mismo ang talagsaong mga milagro ni Jesus, siya nangawat ug kuwarta. Unya, tungod sa kuwarta, tinuyo niyang giluiban ang Anak sa Diyos.

Ang ubang mga tawo nga kanhi matinumanong mga Kristohanon tinuyong nagpahilayo sa Diyos, tingali tungod sa kayugot, garbo, o kahakog, ug karon mga apostata nga nakigbatok sa espiritu sa Diyos. Tinuyo nilang gikontra kon unsa ang tin-awng gipalampos sa espiritu. Nakasala ba kining mga tawhana ug sala nga dili mapasaylo? Si Jehova mao ang kataposang Maghuhukom.​—Roma 14:12.

Inay hukman ang uban, labing maayo kon atong bantayan ang atong kaugalingon nga dili makahimog tinagong mga sala nga anam-anam nga magpatig-a sa atong mga kasingkasing. (Efeso 4:30) Ug malipay kitang mahibalo sa kamatuoran nga si Jehova magapasaylo kanato nga madagayaon gayod, bisan pa sa kaseryoso sa sala nga atong nahimo, kon kita mahinulsolon.​—Isaias 1:​18, 19.

[Hulagway sa panid 12, 13]

Ang pipila ka Pariseo nakahimog sala nga dili mapasaylo