Gikan sa Among mga Magbabasa

Pagpangulipon Nalisdan ako sa pagpangitag hustong mga pulong sa pagpahayag sa akong pasalamat alang sa seryeng panghapin nga “Sa Dihang Wala na ang Tanang Matang sa Pagpangulipon!” (Hunyo 22, 2002) Ang mga artikulo nakatabang kanakong makaamgo nga ang mga tawo posible nga mahimong mga ulipon sa daghang butang, sama sa mga droga, pagpanigarilyo, ug pagpamakak. Ako naulipon sa sugal. Ako nahibalo diha sa akong kasingkasing nga sayop kini, apan lisod kaayong kontrolahon ang akong gana. Ang kasinatian nga inyong giasoy bahin kang Ricardo nakapahilak kanako. Natabangan ako niini nga masabtan nga kon maningkamot lang ang tawo, mahimo siyang molampos sa paglingkawas gikan nianang mga matanga sa pagkaulipon. Salamat sa pagpatik sa maong makapahupay nga mga artikulo may kalabotan sa tinuod nga mga kahimtang sa kinabuhi.

M. W., Tinipong Bansa

Trinidad Salamat sa artikulong “Usa ka Dili-Mapihigong Gingharian sa Mapihigong Panahon.” (Hunyo 22, 2002) Makaiikag nga mabasa ang bahin kang Sigismund, kinsa nagdepensa sa mga kontra-Trinitarian diha sa ilang mga debate, ug kon sa unsang paagi gihatagan ug legal nga pag-ila ang Unitarian Church. Nahingangha ako sa makapakombinsir nga paagi sa pagpangatarongan ni Francis Dávid batok sa Trinidad. Nakapahinumdom kini kanako sa kaisog ni apostol Pablo. Kasagaran, dili ako interesado sa mga artikulo nga naglakip ug daghang kasaysayan, apan naningkamot ako sa pagpasangkad sa akong interes ug sa pag-ugmad ug gana alang sa tanan nga itagana sa “matinumanon ug maalamong ulipon” pinaagi sa atong mga magasin. (Mateo 24:45-47) Kining artikuloha maayong pagkasulat ug pagkadukiduki. Nalingaw gayod ako niini.

M. C., Tinipong Bansa

Akong nabasa ang inyong makaiikag nga artikulong nagtumba sa doktrina sa Trinidad. Kami sa pagkakaron naghisgot niining ulohana sa among simbahan. Ako dugay nang nagtuo nga sayop ang doktrina sa Trinidad, ug buot nakong magpedido ug 15 ka kopya niining gulaa aron akong iapod-apod.

A. O., Alemanya

Sagbot Salamat sa artikulong “Sagbot​—Dili kay Basta Berde Lang Diha sa Ilalom sa Imong Tiil.” (Hunyo 8, 2002) Nadugangan ang akong apresasyon alang sa kamatuoran nga si Jehova nga Diyos nagsuportar sa tanang kinabuhi sa yuta pinaagi sa sagbot. Sumala sa giingon sa usa ka botanista, kini maoy “samag usa ka dam nga nanalipod sa katawhan batok sa kagutom.” Si Jehova mao ang Hawod nga Magdidibuho, ug natabangan ako nga makaamgo sa mga hiyas ni Jehova nga gugma, kaalam, hustisya, ug gahom tungod kay kini bug-os nga gipabanaag diha sa pamilya sa sagbot.

K. O., Japan

Gikan sa Usa ka Bata Ako nuybe anyos, ug anaa ako sa kuwarto grado. Gusto nakong pasalamatan kamo sa nindot nga mga artikulo nga inyong giimprenta diha sa inyong mga magasin. Ang usa ka serye nga ilabinang mapuslanon kanako nag-ulohang “Popular nga mga Selebrasyon​—Aduna bay Natagong mga Kapeligrohan?” (Oktubre 8, 2001) Human nako ihatag ang magasin ngadto sa akong maestra sa Ingles, nagamit niya ang impormasyon ilalom sa sub-ulohang “Relihiyosong Panag-indig” alang sa leksiyon sa klase. Nalipay gayod siya tungod kay tukma ang mga impormasyon sa mga artikulo. Salamat sa tanang butang nga inyong ginasulat aron kami madasig ug mapanalipdan.

N. R., Italya

Apresasyon Nalipay gayod ako sa inyong pagpatik ug makaiikag kaayong mga artikulo, sama nianang mahitungod sa mga mananap. Ako lang ang Saksi ni Jehova sa akong pamilya, ug walay usa sa akong pamilya ang hilig mobasa ug bisan unsa sa atong literatura nga may kalabotan sa relihiyon. Apan kining mga artikuloha makaiikag kaayong basahon, ug kini naghulagway sa atong Maglalalang sa paagi nga magustohan sa mga dili-Saksi. Salamat sa talagsaong buluhaton nga inyong ginahimo ug sa nindot nga mga magasin nga inyong ginapatik.

T. C., Tinipong Bansa