Kuhaa ang Tukmang Impormasyon

Lisod ang pagkuha ug tukmang impormasyon maylabot sa nagkalainlaing mga isyu. Ang mga kagamhanan ug mga kompaniya dili motug-an sa bug-os nga kamatuoran. Ang mga palaumagian sa balita kanunayng magpasalig ug dili-madapigong pagbalita apan wala nila tumana kana. Dili kanunayng ipatin-aw pag-ayo sa mga doktor ang segundaryong mga epekto sa tambal nga ilang ireseta kanato. Aduna bay paagi sa pagkuha ug kasaligan nga impormasyon?

Ang pagtungha sa Internet giangkon sa daghan nga usa ka paagi sa pagkuhag kasaligang mga impormasyon gikan sa tibuok kalibotan. Siyempre, posible kana kon mahibalo ka kon asa nimo pangitaon ang impormasyon diha sa imong kompiyuter. “Maylabot sa labing mapuslanong bahin niini, ang Internet mas daling makaedukar sa mas daghang tawo kay sa bisan unsang kahimanan nga gigamit sa palaumagian sa balita. Maylabot sa labing daotang bahin niini, kini mas daling makapahabol sa kinaadman sa mga tawo kay sa bisan unsang kahimanan nga gigamit sa palaumagian sa balita,” nag-ingon ang usa ka editoryal sa The New York Times.

Ang maong editoryal nagpadayon: “Tungod kay nakadayeg ang mga tawo sa Internet gumikan sa ‘teknolohiya’ niini, ang mga dili edukado motuo gayod sa impormasyon nga ipatungha niini. Wala nila maamgohi nga ang labing daotan maylabot sa Internet mao nga kini sama sa usa ka agosanan sa hugaw: usa ka elektronikong galamiton alang sa wala-maproseso, wala-masala nga impormasyon.” Ikasubo, sama sa giingon sa magsusulat, walay programa sa kompiyuter nga makawagtang sa maong basura.

Si bisan kinsa makabutang ug bisan unsa diha sa Internet, sa magasin, o diha sa libro. Busa, angay natong gamiton ang atong katakos sa pag-ila ug edukahon ang atong kaugalingon aron dili kita daling malimbongan sa bisan unsa nga atong ginabasa. Angayng tinoon niadtong buot makabaton ug tukmang impormasyon nga kasaligan ang tinubdan niana. Dugay kining himoon. Apan kon mahimo na nato kana ug makuha ang mas bug-os nga impormasyon, mahimong maayo ang atong panghunahuna, husto ang panghukom, ug masaligon sa dihang mohimog hinungdanong mga desisyon.