“Ang Wala Mamatikdi nga Emerhensiya” Hapit Nang Matapos!

“KON itandi sa dili pa kaayo dugayng panahon, kita nagkinabuhi karon sa kadagaya. . . . Nanobra ang pagkaon alang sa tanan . . . apan kini maoy teoriya lamang.” Mao kini ang giingon sa usa ka pagtuon sa World Health Organization (WHO). Kon mao diay kana ang kahimtang, unsa ang tinuod nga problema nga maoy nakapahinabo sa malnutrisyon?

“Ang problema mao nga kulang ang produksiyon ug dili-maayo ang pagkaapod-apod sa pagkaon,” matod sa WHO. Ikasubo nga kasagaran, ang mga pobre diha sa tabunok ug kabos nga mga nasod nagtan-aw lang nga walay makuha​—ug walay sulod ang tiyan​—samtang ang dagayang ani ug daghan kaayong abot ipadala ngadto sa laing mga nasod aron makasapi. Makadiyot nga ganansiya alang sa pipila, malungtarong kapildihan alang sa daghan.” Gipakita sa bag-ong pagtuon nga gihimo sa Food and Agriculture Organization sa Hiniusang Kanasoran (FAO) nga ‘ang kinadatoan nga ikalimang bahin sa mga tawo’ sa planeta ‘mokaon sa 45 porsiyento sa tanang karne ug isda; ang kinapobrehan nga ikalimang bahin makakaon lang ug 5 porsiyento.’

Sa laing bahin, “ang kawalay oportunidad sa pagbaton ug dekalidad nga edukasyon ug hustong impormasyon maoy hinungdan usab sa malnutrisyon,” matod sa United Nations Children’s Fund, nga midugang: “Kon walay mga estratehiya sa pagpakaylap ug impormasyon ug mas maayo ug mas daling mabatonan nga mga programa sa edukasyon, ang kaamgohan, mga katakos ug batasan nga gikinahanglan sa pagbuntog sa malnutrisyon dili maugmad.” Apan ang kakulang sa pagkaon, sa baylo, makapaluya sa panglawas ug katakos sa usa ka tawo sa pagkuhag maayong edukasyon​—laing sunodsunod nga problema na usab.

Hustisya ug Dili-Hakog nga Interes Alang sa Uban

Bisan pa niining makapahigawad nga mga kababagan, ang ubang mga eksperto niining natara malaomon gihapon. Pananglitan, ang direktor-heneral sa FAO, si Jacques Diouf, nagpahayag niini nga paglaom: “Akong gihanduraw ang usa ka kalibotan diin ang matag lalaki, babaye ug bata dunay igong sustansiyado ug luwas nga pagkaon, kada adlaw. Akong gihanduraw nga nakunhoran ang sobrang bahandi ug kakabos. Akong gihanduraw ang kaangayan ug dili pagkamapihigon; pakigdait ug dili sibil nga panag-away; hustong pagpahimulos sa kinaiyanhong mga kahinguhaan ug dili kadaot sa kalikopan; kaylap nga kausbawan ug dili makapaluya nga kawalay-paglaom.”

Apan, sumala sa atong nasabtan, labaw pa ang gikinahanglan kay sa dugang nga produksiyon ug  pag-apod-apod sa pagkaon aron matuman ang maong mga paglaom. Gikinahanglan ang kaylap nga hustisya ug dili-hakog nga interes alang sa uban. Ugaling lang kining hamili nga mga taras dili makita diha sa modernong komersiyalismo.

Posible kaha nga mawagtang ang dagkong mga kababagan sama sa kadalo, kakabos, panag-away, ug kahakog aron sa ingon mawala ang malnutrisyon sa yuta? O kini ba maoy usa ka imposibleng damgo?

Ang Bugtong Tinuod nga Solusyon

Sumala sa Bibliya, dili kita angayng matingala sa nagpahiping mga problema nga moresulta sa malnutrisyon. Ang Pulong sa Diyos nag-ingon: “Sa kataposang mga adlaw moabot ang makuyaw nga mga panahong lisod sagubangon. Kay ang mga tawo unya magmahigugmaon sa ilang kaugalingon, magmahigugmaon sa salapi, . . . walay kinaiyanhong pagbati, dili-ikasabot, . . . walay gugma sa pagkamaayo, . . . nga nagbaton sa dagway sa diyosnong pagkamahinalaron apan nagpanghimakak sa gahom niini.”​—2 Timoteo 3:1-5.

Mawagtang ba sa tawo ang maong nakagamot pag-ayong mga tinamdan nga walay tabang sa Diyos? Mopatim-awng dili, dili ba? Tingali ikaw nakamatikod nga usahay ang mga tawong may awtoridad dunay maayong mga tuyo maylabot sa katilingbanong mga problema sa tawo, apan ang kahakog, gugma sa salapi, ug pagkadili-hingpit sa uban nakabalda ug nakadaot bisan sa kinatim-osang mga paningkamot.​—Jeremias 10:23.

Apan, ang solusyon dili usa ka imposibleng damgo. Ang Bibliya nagsaad nga taposon sa Gingharian sa Diyos ang problema sa inhustisya maingon man ang tanang uban pang mga kasakitan nga naghampak sa mga tawo karon.

Ang Isaias 9:​6, 7 naghatag niining maanindot nga paglaom: “Adunay usa ka bata nga natawo alang kanato, adunay usa ka anak nga lalaki nga gihatag kanato; ug ang prinsipenhong pagmando mahipatong sa iyang abaga. Ug ang iyang ngalan pagatawgon nga Kahibulongang Magtatambag, Diyos nga Gamhanan, Amahang Walay Kataposan, Prinsipe sa Pakigdait. Sa kadagaya sa prinsipenhong pagmando ug sa pakigdait walay kataposan, ibabaw sa trono ni David ug ibabaw sa iyang gingharian aron kini matukod nga lig-on ug mapatunhay kini pinaagi sa hustisya ug pinaagi sa pagkamatarong, sukad karon ug hangtod sa panahong walay tino. Ang kasibot mismo ni Jehova sa mga panon ang mobuhat niini.”

Mao usab kini ang Ginghariang giampo sa mga tawo sa dihang litokon nila ang Pag-ampo sa Ginoo ug moingon sa Diyos, “Paanhia ang imong gingharian.” (Mateo 6:​9, 10) Matikdi nga si Isaias nag-ingon nga “ang kasibot mismo ni Jehova sa mga panon ang mobuhat niini.” Oo, dugay nang interesado kaayo si Jehova nga Diyos sa pagtagana sa panginahanglan sa mga tawo. Siya nagdisenyo niining yutaa sa pagpatungha ug dagayang pagkaon alang sa tanan.

Ang Salmo 65:9-13 nag-ingon bahin kaniya: “Giliso mo ang imong pagtagad sa yuta, aron kahatagan mo kini ug kadagaya; gibuhong mo kini pag-ayo. Ang sapa nga gikan sa Diyos napuno ug tubig. Giandam mo ang ilang mga lugas, kay ingon niana ang imong pag-andam sa yuta. Ginabasa pag-ayo ang mga tudling niini, ginapatag ang mga bugon niini; pinaagi sa dagayang mga taligsik ginapahumok mo kini; ginapanalanginan mo ang mga nanurok niini. . . . Ang mga sibsibanan nabestihan sa mga panon sa kahayopan, ug natabonan sa mga tanom nga lugason ang ubos nga kapatagan.”

Oo, ang Maglalalang, si Jehova, mao ang kinamaayohang magtatagana sa katawhan. Siya “ang Usa nga nagahatag ug pagkaon sa tanan nga unod: kay ang iyang mahigugmaong-kalulot maoy hangtod sa panahong walay tino.”​—Salmo 136:25.

Makasalig kita nga ang tanang tawo atimanon sa Gingharian sa Diyos ilalom ni Kristo. “Aduna unyay dagayang lugas sa ibabaw sa yuta; sa tumoy sa kabukiran adunay pagsugwak,” matod pa sa Bibliya. Apan duna usay maayong pagpang-apod-apod, tungod kay “pagaluwason [ni Jesu-Kristo] ang kabos nga nagatuaw alang sa tabang, ingon man ang sinakit ug si bisan kinsa nga walay magtatabang. . . . Pagaluwason niya ang mga kalag sa mga kabos.” (Salmo 72:​12, 13, 16) Busa ayawg kaluya! Kining “wala mamatikdi nga emerhensiya” hapit nang masulbad sa permanenteng paagi.

[Blurb sa panid 11]

“Sa teoriya, posibleng mawala ang gutom ug malnutrisyon. Anaa ang mga kahinguhaan. Ang problema anaa sa . . . paghimog hiniusang aksiyon sa tibuok nasod ug sa tibuok kalibotan.”​—World Health Organization

 [Tibuok-panid nga hulagway sa panid 10]