Gikan sa Among mga Magbabasa

Polis Buot ko kamong pasalamatan tungod sa serye nga artikulong “Mga Polis​—Nganong Atong Gikinahanglan Sila?” (Hulyo 8, 2002) Ang akong amahan namatay tulo ka tuig ang miagi tungod sa binanggaay sa awto. Duha ka polis sa among lugar ang mipahibalo sa among pamilya ug mitanyag ug tabang ug pahasubo. Gihalog pa gani sa usa ka polis ang akong inahan samtang siya naghilak. Segurado akong dili sayon alang sa maong mga polis ang pagtuman sa maong mga buluhaton, apan mag-unsa man kita kon wala sila?

D. E., Tinipong Bansa

Ang serye nga artikulo bahin sa mga polis nakatukmod kanako sa pagpangutana. Haom ba alang sa usa sa mga Saksi ni Jehova nga mahimong usa ka polis? Nagtuo ko nga kon may panag-away, basin kinahanglang mohulbot kag pusil ug gamiton kana, nga lagmit makapatay ug tawo.

J. S., Australia

Ang “Pagmata!” nagtubag: Ang among serye nga artikulo yanong nag-ila sa pipila ka mapuslanong buluhaton nga ginahimo sa mga polis sa pagpatunhay sa kahusay ug sa pagtaganag uban pang gikinahanglang mga serbisyo. Kadaghanan sa mga Saksi ni Jehova dili mangitag trabaho nga manginahanglan kanila nga magdala ug armas, kay dili nila buot nga masad-an sa dugo pinaagi sa paghunos ug kinabuhi. (Exodo 20:13; Mateo 26:​51, 52) Apan, angayng matikdan nga dunay daghang tawo nga nagtrabaho diha sa mga ahensiya nga tigpatuman sa balaod nga dili man kinahanglang magdala ug bisan unsang armas, ug diha sa pipila ka nasod kadaghanan sa mga polis walay mga pusil.

Mao pay akong pagkahumag basa sa mga artikulo maylabot sa atong panginahanglan sa mga polis. Maayo kaayo kining pagkasulat ug may simpatiya sa malisod nga trabaho sa mga polis sa pagpaningkamot nga mahuptan ang usa ka sukod sa kahusay niining gubot nga kalibotan. Ang akong asawa ug ako nag-alagad ingong nagabiyaheng mga ministro balik sa katuigan sa 1970, ug nagpuyo kami diha sa usa ka apartment ilalom sa karaang Kingdom Hall samtang nag-alagad ug kongregasyon diha sa sentro sa siyudad. Medyo alimuot ang panahon, busa giablihan namog diyutay ang bentana aron makasulod ang hangin. Pagkaalas-dos sa kadlawon, gipukaw ako sa akong asawa tungod kay may duha ka tawo sa gawas sa bentana. Gipaminaw nako ang ilang giestoryahan. Ang usa miingon nga kasagaran sirado man ang maong bentana. Ang lain miingon nga tingali dunay tawo sa sulod kay may awto mang nagparking sa gawas. Sila mga polis, ug lagmit regular nilang gisusi ang seguridad sa Kingdom Hall. Mas hinanok pa ang among pagkatulog human niadto!

P. S., Tinipong Bansa

Nunot kaayo sa panahon ang mga artikulo bahin sa mga polis​—ug ilabina gayod human sa pag-atake sa mga terorista sa World Trade Center ug sa Pentagon, sa Tinipong Bansa. Hinaot nga naugmad na nato ang mas dakong pagpabili sa mga polis, bombero, ug uban pang mga alagad sa publiko nga may responsabilidad sa pagpanalipod sa mga molupyo ug mga kabtangan dili lang batok sa mga terorista kondili batok usab sa kriminalidad sa katibuk-an.

H. B., Tinipong Bansa

Kauban sa Lawak Dugay na akong nagpaabot ug usa ka artikulo bahin sa mga kauban sa lawak. Sa dihang akong nabasa ang artikulo nga “Mga Batan-on Nangutana . . . Unsaon Ko Pagkakaplag ug Kauban sa Lawak nga Akong Ikasinabot?” (Mayo 22, 2002), nakurat ako sa pagkahibalo nga dunay mga tawo nga dili lang gyod gustong makigsuod sa ilang kauban sa lawak o makigpanuroy kanila bisan asa ug nga normal lang kana. Sa samang higayon, dakog ikatabang ang usa ka kauban sa lawak maylabot sa galastohan maingon man sa mga buluhaton sa balay. Salamat sa pagtudlo kanako ug usa ka balanseng panglantaw.

S. M., Japan

Duha ka semana gikan karon naa na koy kauban sa apartment nga sama nako nga usa ka Saksi nga taga-Dresden. Makaingon ako nga ang maayong tambag diha sa mga artikulo bahin sa mga kauban sa lawak nga gipatik diha sa mga gula sa Abril 22, Mayo 22, ug Hunyo 22, 2002, maoy detalyado kaayo ug miabot sa hustong panahon. Padayona ang pagpatik sa maong mga artikulo!

R. P., Alemanya