Ang Hunahuna sa Bibliya

Sa Unsang Paagi Gamiton Nato ang Atong Kagawasan sa Pagpili?

ANG Diyos naghatag sa unang mga tawo, si Adan ug Eva, ug katakos sa pagpili. Si Adan maoy iyang gipadumala sa tanaman sa Eden. Lakip sa mga trabaho ni Adan mao ang pagpilig mga ngalan alang sa mga hayop. (Genesis 2:​15, 19) Labaw pang hinungdanon, si Adan ug Eva makahukom kon ila bang sugton ang Diyos o dili.​—Genesis 2:​17, 18.

Sukad niadto, ang mga tawo nakahimog binilyong desisyon​—kadaghanan niini maayo, ang pipila dili maayo, ug ang uban tuman ka daotan. Ang dili maayong mga pagpili sa tawo misangpot ug daotang mga resulta. Bisan pa niana, ang Diyos wala gayod mosalga sa atong katungod sa pagpili. Ingong usa ka mahigugmaong Amahan, ang Diyos naghatag kanato ug tabang sa paghimog maayong mga desisyon pinaagi sa mga panid sa Bibliya. Siya nagpasidaan usab kanato bahin sa mga resulta sa paghimog sayop nga mga pagpili. Ang Bibliya nag-ingon nga atong anihon ang atong ipugas.​—Galacia 6:7.

Mga Desisyon Labot sa Personal nga mga Butang

Bahin sa pipila ka butang ang Diyos klarong nagpadayag sa iyang kabubut-on, nga naghatag kanato ug espesipikong giya. Apan, bahin sa kadaghanang butang, ang Bibliya wala maghatag ug lagda aron but-an ang tanan natong personal nga mga kalihokan. Hinunoa, kini naghatag ug daghang giya nga nagtugot sa mga tawo sa pagsunod sa ilang tagsatagsang mga kagustohan ug tinguha.  Pananglitan, matikdi kon unsay giingon niini bahin sa lulinghayaw.

Gitawag sa Kasulatan si Jehova nga “malipayong Diyos.” (1 Timoteo 1:11) Ang iyang Pulong naghisgot bahin sa “panahon sa pagkatawa” ug “panahon sa paglukso.” (Ecclesiastes 3:​1, 4) Ang Bibliya nag-ingon kanato nga si Haring David nagtugtog ug musika aron malingaw ang uban. (1 Samuel 16:16-18, 23) Si Jesus mitambong ug kombira sa kasal, ug may gihimo pa siyang talagsaon alang sa okasyon nga mao ang paghimo sa tubig nga bino.​—Juan 2:1-10.

Apan, ang Bibliya tukmang nagpasidaan: “Siya nga nagalakaw uban sa mga tawong maalamon mahimong maalamon, apan siya nga may pakiglabot sa mga hungog mahisugamak sa kadaot.” (Proverbio 13:20) “Ang malaw-ay nga pagpanistis” ug imoral nga buhat makapasuko sa Diyos ug makadaot sa atong relasyon kaniya. (Efeso 5:3-5) Kon dunay idalit nga alkoholikong mga ilimnon sa mga salosalo nga walay kutokuto, moresulta kini ug mabug-at nga mga problema. (Proverbio 23:29-35; Isaias 5:​11, 12) Si Jehova nga Diyos nagdumot usab sa kapintasan.​—Salmo 11:5; Proverbio 3:31.

Kining maong mga bersikulo sa Bibliya motabang kanato sa paglantaw sa lingawlingaw sumala sa paglantaw sa Diyos. Sa dihang magpili, ginatagad sa mga Kristohanon ang Bibliya. Siyempre, atubangon natong tanan ang maayo o ang daotang mga resulta sa atong kaugalingong mga pagpili.​—Galacia 6:7-10.

Sa samang paagi, ang mga Kristohanon gidasig sa paghimog maalamong mga desisyon nga nahiuyon sa mga prinsipyo sa Bibliya sama sa mga butang may kalabotan sa pamiste, kaminyoon, pagkaginikanan, ug mga pagpakigsabot sa negosyo. Naglakip kini sa mga butang nga sa espesipiko wala hisgoti sa Kasulatan, apan ang mga prinsipyo nga makita niana makatabang kanila sa paghimog mga desisyon sumala sa diktar sa konsensiya. (Roma 2:​14, 15) Ang mosunod nga sukdanan aplikado sa tanang personal nga mga desisyon nga himoon sa mga Kristohanon: “Kon kamo magakaon o magainom o magabuhat sa bisan unsa, himoa ang tanang butang alang sa kahimayaan sa Diyos.”​—1 Corinto 10:31.

Bahin niining ulohana, maayong atong palandongon usab ang prinsipyo bahin sa ‘pagtagad sa atong kaugalingong kalihokan.’ (1 Tesalonica 4:11) Ang mga Kristohanon kasagarang makaatubang ug mga pagpili nga dili magkasumpaki sa kabubut-on sa Diyos. Busa, ang kagustohan sa usa ka Kristohanon tingalig lahi sa uban. Ang Diyos dili mahimuot nga magtan-aw sa iyang mga alagad nga maghinukmanay sa usag usa. (Santiago 4:​11, 12) Ang Bibliya maalamong nagtambag: “Ayaw tugoti nga aduna kaninyoy mag-antos ingong . . . usa ka hilabtanon sa mga butang sa uban.”​—1 Pedro 4:15.

Ang Desisyon nga Moalagad sa Diyos

Gipasiugda sa Bibliya ang mga kaayohan sa pagsugot sa Diyos. Bisan pa niana, ang Diyos dili mamugos sa mga tawo nga siya pagasimbahon. Hinunoa, iyang gidapit ang iyang tawhanong mga linalang nga mahimong iyang mga magsisimba. Pananglitan, ang Bibliya nag-ingon: “Oh dali kamo, mosimba kita ug moyukbo; moluhod kita sa atubangan ni Jehova nga atong Magbubuhat.”​—Salmo 95:6.

Kini ang imbitasyon nga gihatag ngadto sa karaang Israel. Kapin sa 3,500 ka tuig kanhi, ang nasod sa Israel nagtindog atubangan sa Bukid sa Sinai, ug gipaila sa Diyos ngadto sa minilyong tawo ang sistema sa tinuod nga relihiyon nga nalangkob diha sa Moisesnong Balaod. Sila karon kinahanglang mopili: Moalagad ba sila sa Diyos o dili? Unsay ilang pagsanong? Sila nagkahiusa sa pag-ingon: “Kami andam nga mobuhat ug magmasinugtanon sa tanang gisulti ni Jehova.” (Exodo 24:7) Sila mismo ang midesisyon sa pagsimba kang Jehova.

Sa unang siglo, gisugdan ni Jesus ang pagsangyaw sa maayong balita sa Gingharian sa Diyos. (Mateo 4:17; 24:14) Wala gayod siya mamugos kang bisan kinsa sa pagpakigbahin niining buluhatona. Hinunoa, iyang malulotong gidapit ang uban, nga nag-ingon: “Mahimong akong sumusunod.” (Marcos 2:14; 10:21) Daghan ang midawat niining imbitasyona ug nagsugod sa pagsangyaw uban kaniya. (Lucas 10:1-9) Paglabay sa panahon, ang uban mipili sa pagbiya kang Jesus. Si Judas mipili sa pagbudhi kaniya. (Juan 6:66; Buhat 1:25) Sa ulahi, ilalom sa pagtultol sa mga apostoles, daghan pang mga tawo ang nahimong mga disipulo nga wala tioni ug espada, kondili pinaagi sa paggamit sa ilang kagawasan sa pagpili. Sila “hustong nakiling” ug “nahimong mga magtutuo.” (Buhat 13:48; 17:34) Karon usab, ang tinuod nga mga Kristohanon andam sa pagtuman sa Pulong sa Diyos ug pagsunod sa mga pagtulon-an ni Jesus.

Matin-aw, ang Diyos nagtinguha nga gamiton nato ang atong katakos sa pagpili. Siya nagtagana usab ug giya diha sa Bibliya nga motabang kanato sa paghimog maalamong mga desisyon. (Salmo 25:12) Sa panahong maghimog personal nga mga desisyon, angayng palandongon ug maayo sa matag Kristohanon ang mga prinsipyo sa Diyos. Nianang paagiha lamang kita makahatag sa Diyos ug ‘balaang pag-alagad uban sa atong gahom sa pagpangatarongan.’​—Roma 12:1.