Usa ka Open House nga Nakatandog sa mga Kasingkasing

TINAMPO SA MAGSUSULAT SA PAGMATA! SA ALEMANYA

“PAGKANINDOT! Talagsaon kaayo!” “Salamat sa inyong pagkamaabiabihon ug sa matahom nga mga eksibit. Narelaks kaayo kami.” Unsa ang nakatukmod sa daghang bisita sa pagpahayag sa apresasyong sama niini? Ang open house sa hinapos sa semana nga gipahigayon sa sangang buhatan sa mga Saksi ni Jehova sa Alemanya. Sa tulo ka adlaw, gikan sa Biyernes, Mayo 24, hangtod sa Dominggo, Mayo 26, 2002, giabiabi ang mga bisita didto sa mga pasilidad sa Selters-Taunus aron moduyog sa kapin sa 1,000 ka boluntaryo sa sangang buhatan sa pagpaila sa ika-100 nga anibersaryo sa sangang buhatan sa Alemanya.

Maikagong nakigbahin ang mga kongregasyon sa mga Saksi ni Jehova nga duol sa sangang buhatan sa linaing kampanya sa pag-imbitar. Duha ka semana sa wala pa ang maong dakong okasyon, kapin sa 100,000 ka imbitasyon ang gihatag sa mga tawo o gibilin sa ilang kabalayan. Kadto nga kampanya giabagan sa mga anunsiyo ug sa tag-as nga mga artikulo sa mga mantalaan ug sa mga pagsibya sa radyo. Gihatag ang personal nga mga imbitasyon ngadto sa mga negosyanteng tigsuplay ug sa mga opisyales. Midawat ang kapin sa 7,000​—nga daghan kanila dili Saksi.

Gisuroy sa mga bisita ang imprentahan, gam-anan ug libro, shipping department, mga talyer, ug labhanan, ingon man ang mga bahin sa opisina sa administrasyon. Ang mga eksibit nagpahibalo sa katawhan mahitungod sa malig-ong pagbarog sa mga Saksi ni Jehova sa Alemanya dapig sa mga prinsipyo sa Bibliya panahon sa mga pagmando sa Nazi ug sa mga Komunista. Ug ang pasundayag bahin sa Bibliya nga may kapin sa 700 ka eksibit nasentro sa paggamit sa balaang ngalan, ang Jehova. Imposibleng ipahayag dinhi ang tanang komento sa apresasyon nga nabatian, apan aniay pipila ka komento.

“Mahigalaon kaayo ang tanan dinhi. Hinlo ug hapsay kaayo ang mga butang. Magkabagay ang tanan​—ang mga tawong nagpuyo dinhi ug ang palibot. Hinaot matakdan kami ug diyutay sa inyong kamahigalaon.”​—Usa ka tigulang nga magtiayon.

“Salamat sa lamiang pagkaon ug sa pag-atiman kanamo sa maayo, mahigalaong paagi. Nalingaw kaayo kami, ug gusto namo nga makabalik dinhi. Maayo kaayo ang mga tawo dinhi!”​—Gisulat diha sa pirmahanan sa mga bisita nga gipahayag sa usa ka grupo gikan sa kolehiyo sa teknolohiya sa bildo.

“Salamat kaayo sa mainitong pag-abiabi diha sa inyong pasilidad. Makaiikag kaayo ang [among] pagbisita. Dalayegon kaayo ang mga tawo nga nagdumala sa mga departamento sa labhanan ug dry-cleaning, kay wala pa gayod kami makabisita ug sama ka hapsay ug hinlong pasilidad.”​—E-mail gikan sa hawas sa usa ka kompaniya sa sabon ug kasangkapan sa panglaba.

Si Eva, kinsa nagsilbing giya sa mga bisita, mitaho: “Sa matag usa ka pagsuroy nga ako ang naggiya, kanunay nga may mokomento bahin sa mga kuwartong puy-anan: ‘Gusto namong mopuyo dinhi!’”

Samtang ang babayeng naggamit ug wheelchair nagtan-aw sa usa ka dibuho sa mga pasilidad, usa ka boluntaryo nangutana kaniya kon nagkinahanglan ba siyag tabang.  “Dili man!” mitubag ang babaye. Miingon siya nga lima ka oras na siyang didto sa pasilidad ug dili na gani siya makalingkod ug tarong. Sagad maghigda lang siya, ug niadtong panahona mibati siyag kasakit. Bisan pa niana, siya misaysay: “Makahigda ra bitaw ko sa balay, apan ang open house kausa ra!” Siya midugang: “Makaiikag kaayo ang tanan mao nga paneguroon ko nga ang tanan akong makita!”

Ang batang si Georg, mga singko anyos, gisukna kon unsa ang labing nagustohan niya. Kay nalingaw sa mga makina sa imprenta, siya mitubag: “Ang mga rolyo sa papel! Kana ilang ibutang sa usa ka tumoy, ug mogawas sa laing tumoy ingong mga magasin. Talagsaon kaayo!”

Usa ka Saksi nasorpresa. Ang iyang bana, nga dili Saksi nga nakatambong ug usa lang ka Kristohanong tigom, misugot nga mouban sa pagbisita sa open house sa Sabado. Sa Dominggo sa pagkauli sa iyang asawa gikan sa tigom sa kongregasyon, siya nag-ilis na ug andam mogawas. “Unsa bay nahitabo?” nangutana ang iyang asawa. “Aw, kulang ang akong panahon sa pagtan-aw pag-ayo sa tanan gahapon,” mitubag siya. “Busa  kon makaandam ka na, mangadto ta sa Selters. Gusto ko nga tan-awon ang tanan.”

Sa eksibit bahin sa Bibliya, ang usa ka tigulang, maayog-pamesti nga babaye maulawong nangutana kon asa ang telepono, kay duna siyay kinahanglang tawgon. Ang tinuod, ang iyang bana tiggamag libro, nga naghanas sa pagpang-ayo ug daang mga libro. Siya ug iyang bana regular nga nakigtagbo sa usa ka grupo sa ubang mahigugmaon ug libro, nga usa kanila maoy pastor sa Protestante, nga mainitong kolektor ug Bibliya. Siya ang gusto kaayo niyang tawgon. Sanglit wala siya sa balay, nagbilin siyag mensahe diha sa iyang answering machine: “Ari gayod diri karong adlawa kon posible. Segurado ko nga wala ka pa makakita ug sama niini. Ayaw gayod sipyata!”

Usa ka magtiayon uban sa ilang batang babaye mibisita gikan sa duol nga lungsod sa Limburg. Wala pa sila makadungog sukad bahin sa mga Saksi ni Jehova hangtod nga nakadawat silag imbitasyon didto sa ilang balay. Ang magtiayon mihukom sa pag-adto ug pagtan-aw sa maong dagkong mga pasilidad sa Selters. Si Marlon ug Leila, mga boluntaryo sa sangang buhatan sa Alemanya, nakahimamat kanila ug dugang nagsaysay bahin sa mga Saksi ni Jehova ug sa kinabuhi didto sa sangang buhatan. Ang pamilya nahingangha kaayo nga ang mga ginikanan mihangyo nga may moduaw kanila alang sa regular nga pagtuon sa Bibliya sa balay.

“Makapahimuot ug makalingaw gayod dinhi. Ang imprentahan lang ang akong nakita, apan kadto nindot kaayo. Kamo maoy talagsaon, mahigalaon nga katawhan, ug kana ang akong gusto.”​—Stefanie (12 anyos), gisulat kini diha sa pirmahanan sa mga bisita.

Usa ka babaye gikan sa kanait nga balangay miingon: “May isulti ako kaninyo. Ako Muslim, apan gusto ko kaayong motan-aw kon unsay kahimtang dinhi. Kamong tanan maayohon ug relaks. Inyong gipabati kami [mga langyaw] nga dinawat sa Alemanya. Interesado kamo sa mga tawo. Kahibulongan kana! Mobalik ako ugma uban sa akong bana.” Sa pirmahanan sa mga bisita, siya misulat: “Talagsaon kaayo! Samag anaa ako sa Paraiso.”

Ang drayber sa usa sa mga bus nga nagngadto-nganhi tali sa parkingan ug sa mga entrada nakadungog nga nagsultiay ang duha ka pasahero: “Pagkamahigalaon nila! Ug ngani ako walay ideya kaniadto kon unsa ang gigama dinhi. Mao pay akong pagkahibalo kon unsay ginabuhat niining mga tawhana dinhi. Tan-awa ra god ang ilang pamatasan. Tungod gayod kana sa ilang relihiyosong pagkamatuto ug edukasyon.”

Duha ka oras pagkatapos manirado, usa ka lalaki nagpasopaso sa tugkaran atubangan sa opisina sa administrasyon. Siya mapamalandongon kaayo ug naglingolingo ug milingi sa tinukod. Unya iyang giduol ang usa ka boluntaryo sa sangang buhatan, nga miingon: “Dayag nga ang tanan gibuhat tungod sa gugma. Ako dili usa sa mga Saksi ni Jehova, apan hinaot panalanginan kamo ni Jehova.”

Ug usa ka Saksi misulat: “Uban niining mubong sulat, dawata ang akong kinasingkasing nga pasalamat. Kamo naningkamot gayod nga mahimong kahimut-anan kutob sa mahimo ang mga adlaw sa open house. . . . Sa katibuk-an, kadto maoy pasiunang talan-awon sa panahon nga ang tanang tawo magkahiusa na sa pagpuyo! . . . Ang mga adlaw sa open house tinong nakahatag ug kahimayaan sa atong Diyos, si Jehova.”​—Sandra.

[Hulagway sa panid 23]

Serbisyo sa transportasyon alang niadtong tigulang na, baldado, o gikapoy lang

[Hulagway sa panid 23]

Usa ka pasundayag sa mga paagi sa pagsangyaw kanhi

[Hulagway sa panid 23]

Maayong pag-abot alang sa among open house

[Hulagway sa panid 24]

Usa ka boluntaryo nagpatin-aw sa teknolohiya diha sa yanong mga pulong

[Hulagway sa panid 24]

Pasundayag bahin sa Bibliya