Gikan sa Among mga Magbabasa
Gikan sa Among mga Magbabasa
Pagpanugal Mao pay pagkahuman nakog basa sa mga seryeng “Pagpanugal—Kini ba Maoy Dili-Makadaot nga Lingawlingaw?” (Hulyo 22, 2002) Nagpasalamat ako kang Jehova sa paggamit kaninyo sa pagpatik niining nunot-sa-panahong impormasyon. Nahibulong ako sa pagkakita nako sa gilistang mga batasan sa mga tawong sugarol. Mora bag ang akong kapikas ang inyong gihulagway! Ikasubo, kining makasasalang buhat mitultol sa laing grabeng mga sala. Ang pagsugal maoy usa ka hampak. Ako hugot nga naglaom nga mahinumdoman unta sa tanan nga kini maoy makadaot nga lingawlingaw.
M. G., Tinipong Bansa
Mga Alibangbang Diyes anyos na ako, ug nalipay gayod ako sa pagbasa sa artikulong “Pag-ani sa Produkto nga Dunay mga Pako.” (Hulyo 22, 2002) Dihay among proyekto bahin sa alibangbang sa among eskuylahan sa miaging tuig. Kada bata gihatagag hantatawo aron atimanon. Kinahanglang pakan-on namo ang hantatawo kada adlaw ug hinloan ang gisudlan niini. Nakita pa gani nako ang upat ka hantatawo nga nagluno. Sa dihang nahimo na kining pupa, giuli namo kini didto sa lugar nga tun-anan namog biolohiya. Dayon among giduaw ang miguho nga mga alibangbang sa misunod nga tingpamulak. Palihog ipadayon ang pagsulat sa maong makaiikag nga mga artikulo.
B. P., Alemanya
Nagdako ako sa balay nga duol sa kabalilihan, ug naanad na ako sa pagkakitag daghang alibangbang sa among tugkaran. Makadayeg gayod ako kanunay sa ilang katahom. Karon nga dako na ako, kining huyang nga mga linalang nakatabang kanako sa pagsabot sa mga hiyas ni Jehova. (Roma 1:20) Mahanduraw ninyo ang akong kalipay sa pagkakita nako sa mga hulagway sa nagkadaiyag-kolor nga mga alibangbang diha sa Pagmata! Salamat sa inyong ekselenteng basahon.
D. G., Slovakia
“Postpartum Depression” Akong nasabtan nga ang impormasyon sa artikulong “Nabuntog Nako ang Akong Pagpakigbisog sa ‘Postpartum Depression’” (Hulyo 22, 2002) nagtumong pag-ayo sa bisan unsang matang sa depresyon. Kanunay akong nakigbisog sa depresyon. Makapadasig gayod ang pagkahibalo nga ako wala mag-inusara ug nga ang depresyon, sama sa ubang mga sakit, mahanaw ubos sa Gingharian sa Diyos.
C. H., Tinipong Bansa
Napulo ka bulan kanhi, human nakog panganak ug usa ka batang babaye, nagsugod ako pag-antos tungod sa postpartum psychosis. Nawad-an akog gana sa akong anak. Ang pagtambal ug ang mahigugmaong pagsuportar sa akong pamilya ug sa kongregasyon nakatabang kanakog dako. Ako naglaom nga kining artikuloha makatabang sa ubang mga babaye ug sa ilang mga pamilya nga masabtan kining sakita. Nagplano ako nga hatagan nakog kopya ang akong doktor.
S. Z., Habagatang Aprika
Human matawo ang akong ikaduhang anak, naagoman ko ang grabeng depresyon. Kinahanglan pang pugson ako sa akong mga higala ug pamilya aron ako magpadoktor. Mapasalamaton ako nga ang organisasyon ni Jehova nagataganag espirituwal nga pagkaon sa hustong panahon pinaagi sa mga publikasyon nga sama sa Pagmata!
C. O., Tinipong Bansa
Buhok Gusto kong pasalamatan kamo sa tim-os tungod sa artikulong “Nabalaka Ka ba sa Imong Buhok?” (Agosto 8, 2002) Nag-edad na akog 36 anyos, ug dugaydugay na akong nabalaka bahin sa inanayng pagpanglarot ug pagnipis sa akong buhok. Ang artikulo nakatabang kanako sa pagsabot nga natural ra man diay nga mangalarot ang pipila ka buhok kada adlaw. Mas relaks na ako karon. Padayona ninyo pagpatik ang mga artikulong sama niini!
V. G., Slovakia
Nadawat nako kining artikuloha sa hustong panahon. Sobra akong natensiyon tungod sa pagpanglarot sa akong buhok. Ang artikulo nakapakalma kanako, ilabina ang giingon nga “ang uban kasagaran dili sama kanimo ka mabalak-on bahin sa imong buhok.” Nakatabang usab kanako ang pagkakat-on nga bisan pag ang usa ka tawo walay problema sa iyang buhok, mga 70 ngadto sa 100 ka buhok ang mangalarot kada adlaw!
E. L., Tinipong Bansa