Luwason Pinaagi sa Iyang Tiyan!

HINAY kining molangoy. Alang sa kadaghanang tawo ngil-ad kinig dagway. Apan, ang tiyan niini talagsaon kaayo! Unsay among gihisgotan? Ang tunokong tagutongan, nga gitawag usab ug butete, ug ang taas-ug-bukobuko nga duto. Kon mameligro, “mobag-o ang dagway” niining maong linalang, nag-ingon ang magasing Natural History. Ang iyang lawas, nga motubo ug mga 20 pulgadas ang gitas-on, moburot “hangtod nga ang isda motriple sa iyang naandang gidak-on ug mogahi, nga lingin kaayog porma nga naputos sa panagang nga mga tunoktunok​—dili usa ka maayong disenyo sa paglangoy apan makapaatras sa mga manunukob.”

Paburoton sa isda ang iyang kaugalingon pinaagi sa pagbomba ug tubig diha sa iyang tiyan nga moburot halos usa ka gatos ka pilo sa normal nga gidak-on! Mahimo sa tagutongan kining talagsaong kalaki tungod sa usa ka yano, maayong ideya​—mga pligis!

Sa aktuwal, ang tiyan sa tagutongan dunay mga pligis sulod sa mga pligis, matod pa sa Natural History. Ang kinadak-ang pligis maoy 3 milimetros ang gilapdon nga “duna pay laing mas gagmayng mga pligis sa sulod sa matag usa niini, ug sa sulod pa, hangtod sa kinagamyang pligis nga hilabihan na kaayo ka gamay nga kini makita lamang diha sa mikroskopyo,” nag-ingon ang artikulo.

Siyempre ang panit sa tagutongan kinahanglang mobukad sa dihang mobukad ang tiyan niini. Aron kini mahimo, ang panit, nga dunay duha ka lut-od, naggamit ug duha ka lahi nga mga prinsipyo. Sama sa tiyan, ang sulod nga lut-od dunay pligis, apan ang gawas nga lut-od moinat-inat. Kining moinat-inat nga sapaw magpugong sa pagkunot sa panit, ug busa makasabal sa kusog nga paglangoy, sa dihang ang tagutongan mohiyos.

Apan aron molagiw ang mga manunukob, duna pay himoon ang tagutongan gawas nga magpaburot. Sa dihang moinat ang iyang panit, ang panagang nga tunoktunok manindog ug kalit. Busa kon makakita ka ug tagutongan samtang mag-snorkel, ayaw siyag hikapa! Ug pagbantay usab sa iyang baba; kini mopaak nga modulot sa bukog!

Sa dihang gipangutana sa Diyos si Job bahin sa Iyang mga kalalangan, si Job mitubag: “Nahibaloan ko na nga ikaw makahimo sa tanang butang, ug walay hunahuna nga dili nimo makab-ot.” (Job 42:2) Oo, bisan ang tambok gamayng tunokon nga tagutongan, nga dili gayod makadaog ug lumba o indigay sa kaanyag, naghatag ug daghang pamatuod sa gahom ug sa kaalam sa Diyos sa paglalang.​—Roma 1:20.

[Picture Credit Lines sa panid 31]

Top: Photo by John E. Randall; bottom: © Jeff Rotman