Sa Dihang Mibuto ang Usa ka Planta sa Kemika

TINAMPO SA MAGSUSULAT SA PAGMATA! SA PRANSIYA

NIADTONG Septiyembre 21, 2001, napulo lamang ka adlaw human nga giatake ang World Trade Center sa New York, usa ka dakong pagbuto nga aksidenteng nahitabo sa usa ka planta sa kemika nakapayhag sa residensiyal nga mga dapit sa Toulouse, sa habagatan-kasadpan sa Pransiya. Gihubit kini sa Pranses nga magasin sa balita nga Le Point ingong “kinagrabehang kalamidad sa industriya sa Pransiya sukad sa kataposan sa Gubat sa Kalibotan II.”

Mga 300 ka toneladang abono ang mibuto, nga nakalungag sa yuta nga 50 metros ang diyametro ug 15 metros ang giladmon. Ang pagbuto ug ang miresulta nga pag-init sa klima ug pagtaas sa presyon sa hangin nakapatay ug 30 ka tawo ug nakasamad ug kapin sa 2,200. Mga 2,000 ka balay ang nangaguba, ug 27,000 pang ubang balay sulod sa mga otso kilometros nga gilay-on nangadaot. Ang mga tawo natarantar kay nagtuo nga ang terorista maoy nakaingon sa pagbuto ug nga ang panganod sa makahilong gas mihungaw gikan sa planta.

Taliwala sa mga Saksi ni Jehova, ubay-ubay ang nasamdan, ug daghan ang naapektohan sa ubang mga paagi. Tungod sa Kristohanong gugma ang mga isigka-Saksi milihok dayon. (Juan 13:​34, 35) Ang mosunod maoy usa ka asoy sa mga kalihokan sa pagtabang.

“Walay Nahibilin sa Bilding”

Si Khoudir nagtrabaho sa planta sa kemika ug usa sa nabuhi. Tungod sa pagbuto ug sa nanglupad nga kagun-oban siya nawad-an ug panimuot, nga nakabali sa iyang apapangig ug nakalisa sa iyang bukog sa liog. Si Benjamin, nga nagtrabaho sa usa ka bilding tapad sa planta sa kemika, nalagpot ug tulo ka metros ug mibanda sa bungbong. Natusok siya sa nanglupad nga mga bildo diha sa daghang dapit sa iyang lawas ug sa iyang tuong mata, nga nakadaot sa iyang panan-aw. “Maayo na lang kay wala ako diha sa akong lamesa,” matod pa niya. “Mga 600 ka kilong mga tisa ang nahagsa diha sa akong lingkoranan.”

Si Alain, nga usa ka maestro sa eskuylahan nga mga 200 metros ang gilay-on gikan sa planta, naghimog mga kopya diha sa xerox sa dihang nahitabo ang pagbuto. Siya miingon: “Walay nahibilin sa bilding, mga piraso lamang sa mga puthaw. Walay mga bungbong, walay atop, wala bisag unsa. Natusok ako sa buak nga mga bildo. Nahiwahiwa ang akong tibuok nawong. Morag gigarote ang akong nawong.” Ang usa ka mata ni Alain nabuta ug ang usa ka dalunggan nabungol tungod sa pagbuto.

Miabot Dayon ang mga Hinabang

Gikontak dayon sa mga ansiyano sa 11 ka kongregasyon sa mga Saksi ni Jehova nga naapektohan sa aksidente ang matag membro sa kongregasyon aron masusi ang mga samaran o ang kadaot. Ang mga boluntaryo gipadala dayon ngadto sa labing nanginahanglan ug tabang. Wala madugay nahibaloan sa mga boluntaryo nga mga 60 ka balay sa mga Saksi ang naguba, ug ilang gitabangan ang mga napulo ka pamilya sa pagbalhin. Ang mga boluntaryo mitabang usab sa pag-ayo sa duha ka naguba nga mga Kingdom Hall. Dugang pa, sila mitanyag ug praktikal nga tabang aron sila mabayran sa insyurans.

Si Catherine ug Michel nagpuyo atbang lamang sa planta. Si Catherine nagmaneho sa iyang awto panahon sa pagbuto. Siya miasoy: “Sa primero abi namo ug naglinog. Paglabay sa pipila ka gutlo, nakadungog kami ug pagbuto. Dayon nakita namo nga miulbo ang aso. Mipaingon ako sa lugar nga akong gipuy-an; ang dagway sa lugar morag gisangkaan sa gubat. Ang tanang balay nagun-ob ug ang mga bentana sa tindahan nangabuak. Ang mga tawo nanagan sa kadalanan. Ang uban naglingkod o naghigda sa dalan, nga naghilak o naninggit. Diha sa balay, ang among tanang bentana ug bisan ang mga marko nalangkat, ug walay mga pultahang nabilin. Ang among Kristohanong mga igsoong lalaki ug babaye miabot dayon  sa pagtabang kanamo. Sa pagkahapon, usa ka grupo gikan sa kongregasyon miabot nga nagdalag mga balde, silhig, ug plastik nga pangtabon sa bentana.”

Si Alain ug Liliane nagpuyo usab tapad sa planta. Ang ilang apartment nalumpag tungod sa pagbuto. “Ang tanan napulpog,” miingon si Alain. “Ang mga bungbong ug mga baldosa nasiak, ug ang mga bentana, pultahan, ug muwebles tanan naguba. Wala gayoy nahibilin bisag usa. Ang among Kristohanong mga igsoon miabot dihadiha aron sa pagtabang. Ilang gikuha ang mga tinumpag ug mitabang usab sa paghinlo sa ubang mga apartment diha sa bilding. Ang among mga silingan natingala gayod nga nakakitag daghan kaayong tawo nga miabot aron sa pagtabang.” Sa wala pa mahitabo ang pagbuto nianang buntaga, si Alain nakadawat ug tawag sa telepono gikan sa estudyante sa Bibliya nga naghangyo nga siya duawon aron magtuon sa Bibliya. Si Liliane dihay gilakaw. Busa, silang duha wala diha sa balay sa dihang nahitabo ang pagbuto.

Dili lamang mga membro sa kongregasyon ang gitabangan sa mga Saksi. Dayon human sa pagtabang sa usag usa, gitabangan usab nila ang ilang mga silingan, nga nanghawan sa mga tinumpag gikan sa ilang mga apartment ug nanabon ug mga plastik sa mga bentana. Ang mga silingan mapasalamaton kaayo ug natingala nga wala sila mangayog suhol.

Gitabangan usab nila ang lokal nga mga awtoridad, nga nakurat sa dakong kadaot. Ang mga Saksi nanghawan sa mga tinumpag diha sa mga eskuylahan ug mga bilding sa gobyerno. Diha sa usa ka lugar, ang lokal nga awtoridad nagpadalag mga boluntaryong mga Saksi sa balay ug balay aron sa pagsusi sa mga panginahanglan sa mga tawo.

Nagtaganag Espirituwal nga Tabang

Gawas pa sa materyal nga tabang, ang kadaghanan sa mga Saksi sa lugar nga nabuthan nagkinahanglag espirituwal nga tabang. Busa, ang nagapanawng mga magtatan-aw ug ang mga ansiyano miduaw sa tanan nga naapektohan sa aksidente. Kini nga tabang giapresyar pag-ayo. Si Catherine miingon: “Ang mga ansiyano nagkahiusa sa pagtabang kanamo. Sila miabot sa pagdasig kanamo. Kini mao gayod ang among gikinahanglan, nga labaw pa kay sa materyal nga tabang.”

Ang Kristohanong gugma nga gipadayag pinaagi sa buhat pagkahuman sa aksidente nakatukmod sa mga tawo sa paghatag ug makaiikag nga mga komento. Usa ka Saksi nga grabeng nasamdan miingon: “Dili gayod nato mahibaloan kon unsay mahitabo ugma damlag. Kinahanglang moalagad kita kang Jehova kanunay nga morag ato nang kataposang adlaw.” (Santiago 4:13-15) Laing Saksi, miingon: “Kining tanan nakatabang kanamo sa pagkaamgo nga dili nato angayng hatagan ug dakong importansiya ang bisan unsang materyal nga mga butang. Ang tinuod nga bahandi makita taliwala sa katawhan ni Jehova.”

[Hulagway sa panid 14]

Si Benjamin ug Khoudir

[Hulagway sa panid 14]

Si Alain

[Hulagway sa panid 15]

Ang Toulouse sa adlaw human mahitabo ang pagbuto

[Credit Line]

© LE SEGRETAIN PASCAL/CORBIS SYGMA

[Hulagway sa panid 15]

Si Alain ug Liliane