Usa ka Pagbiyahe sa Kinatas-ang Ruta sa Trolleybus sa Kalibotan

TINAMPO SA MAGSUSULAT SA PAGMATA! SA UKRAINE

Ang pipila ba ka sensilyo makapalit ug dili-hikalimtang eksperyensiya? Oo, kon mopalit kag tiket sa kinatas-ang ruta sa trolleybus sa kalibotan. Mobiyaheg mga 95 ka kilometros ang trolleybus, gikan sa Simferopol, nga sentro sa Crimean Peninsula sa habagatang Ukraine, ngadto sa Yalta, sa may kainit sa adlaw nga kabaybayonan sa amihanan sa Itom nga Dagat. Gusto mo bang mokuyog kanamo sa usa ka makalingawng biyahe?

SA MGA opisina sa Transportasyon sa Simferopol, nahimamat namo si Slavnyi Giorgi Mihailovich​—si Gn. Slavnyi, sa pinamubong pagtawag. Siya nagtrabaho na dinhi sukad sa 1959, ug eksperyensiyado na kaayo siya sa iyang trabaho. Sa sinugdan giubanan kami ni Gn. Slavnyi sa museyo labot sa transportasyon, diin gipasundayag ang mga letrato sa mga lalaki ug mga babaye nga nagtukod niadtong ruta sa trolley. “Dili lang aspaltadong karsada ang gikinahanglan sa trolleybus,” siya misaysay. “Gitukod sa mga obrero sa konstruksiyon ang ginatos ka torre aron masab-itan sa kilokilometrong kable sa elektrisidad sa ibabaw. Gidisenyo sa mga inhenyero ang mga estasyon sa elektrisidad aron motagana sa koryente.”

“Nganong ang dekoryenteng mga trolleybus ang gamiton sa pagbiyahe sa layong ruta ibabaw sa kabukiran imbes ang mga bus nga may makinang gipaandar sa gasolina?” kami nangutana.

“Ang mga trolleybus menos ug polusyon kay sa mga bus nga gipaandar sa gasolina,” matod niya. “Among panalipdan ang among panulondon sa wala-maupaw nga kabukiran ug wala-mahugawing kabaybayonan.”

“Apan ang pipila lang ka bus makadaot ba gayod?” nangutana kami.

“Pipila lang diay ka bus!” mitubag siya. “Ay, panahon sa ilang kabantogan pipila ka tuig kanhi, kon panahon sa ting-init, ang mga trolleybus molarga kada duha ngadto tulo ka minutos ug mobiyahe sa katibuk-ang 400 ka biyahe kada adlaw.”

Uban sa maong kasayoran sa hunahuna, naikag kami nga sugdan ang among biyahe.

Ang Biyahe Nagsugod

Ang among biyahe nagsukad sa Simferopol Central Station. Ang dosedosenang mga kable sa elektrisidad sa ibabaw maoy sama sa salapion nga gumon. Gipangita namo ang palitanag tiket ug gipalit ang among mga tiket. Unya nanakay kami sa No. 52 nga trolleybus. Kami milarga na gayod!

Pagkabiyahe ug 29 ka kilometros, nagsugod na ang among pagtungas sa kabukiran. Sa taudtaod kami nalandongan na sa nagbuntaog nga kabukiran diin mabugnaw na. Ang titip nga mga bakilid nga naputos sa mga evergreen ug gahion-ug-tabla nga mga kahoy, sa ubos nakig-usa sa giliminan-ug-niyebe nga mga walog. Pagkaabot sa tuktok, nahingangha kaayo kami sa matahom usab nga padulhog nga agianan. Didto sa among atubangan ang nag-ekis-ekis nga dalan nga nakigtagbo sa kapunawpunawan. Ang kusog nga mga  preno sa trolleybus nakapahinay sa among nag-uswag nga katulinon. Ang among tsuper nagdala kanamo nga luwas sa ubos!

Didto sa tiilan sa bukid kami misulod sa lungsod sa Alushta, miliko patuo, ug mibiyahe paingon sa habagatan sa dalan nga ubay sa baybay. Sa wala sa among trolleybus didto ang Itom nga Dagat. Sa tuo, ang habog Crimean nga Kabukiran nahisamag salipod nga paril.

Sa distansiyag diyutay sa dalan, nga layo na sa balangay sa Pushkino, nasiklapan namo ang Oso nga Bukid. Sumala sa pagpatin-aw sa mga molupyo bahin sa kasugiran, usa ka higanteng oso nahimong bato samtang naningkamot nga lamyon ang Itom nga Dagat. Ang ulo niini, matod nila, anaa pa sa ilalom sa tubig nga nagainom pag daghang tubig. Gisukna ko ang akong kaugalingon, ‘Nganong dili moingon ang mga tagabalangay nga nahulog ang oso sa tubig kay nakainom ug sobra ka daghang bino? Total, naagian namo ang daghang umahan sa ubas.’ Kini maoy dapit nga tigbuhat ug bino ug ania dinhi ang Massandra nga Kaparasan, ang mananaog sa internasyonal nga mga bangga sa bino.

Unya, sa balangay sa Nikita, nanaog kami sa trolleybus didto sa Nikitskyi Botanical Garden. Ang maong tanaman maoy internasyonal kaayo, kay adunay libolibong tanom gikan sa tibuok kalibotan. Uban sa among daghag-kahibalo nga giyang si Tamara, among napahimuslan ang kahumot sa dagkong evergreen nga mga punoan duol sa entrada. “Kini maoy mga sedro sa Lebanon,” mipatin-aw siya. “Gigamit ni Solomon kining makapahinganghang mga kahoy sa pagtukod sa iyang templo.” Husto  ang among giya, kay ang Bibliya nagtaho nga ang mga sedro gigamit pag-ayo sa maong dako kaayong proyekto sa pagpanukod ni Solomon.​—1 Hari 5:6-18.

Samtang hinay nga nagsubay sa nabantok nga kadalanan sa graba, among namatikdan ang pundok sa tunokong mga tanom. “Mga rosas,” mipahayag si Tamara. “Kining tanamana adunay 200 ka klase ug bug-os nga mamulak sa hinapos sa Mayo ug sa sinugdan sa Hunyo.” Sa ulahi nagtindog na kami atubangan sa yanohong tanom nga mga duha ka metros ug tunga ang gihabogon. “Iron tree kini,” gisultihan kami ni Tamara, nga dayag nahimuot sa tanom. “Ang humokon nga tabla, nga kapuli sa metal, madukdok samag lansang. Motundag gani kini sa tubig.” Ang usa ka trolleybus sa taudtaod miabot, ug nalipay kaming makalingkod na usab ug makapahulay ang among gikapoyng mga batiis panahon sa mubong biyahe paingon sa Yalta, ang kataposang destinasyon sa trolley. Daghan ang mahinumdom sa Yalta sa panguna tungod sa makasaysayanhong komperensiya labot sa Gubat sa Kalibotan II nga gipahigayon sa Livadia nga Palasyo sa 1945. Niining maong komperensiya ang mga pangulo sa tulo ka pangunang Alyadong mga Estado nagtagbo aron sa pagplano sa kataposang pag-atake ug pagsakop sa Nazi nga Alemanya.

Pauli nga Biyahe

Nagsingabot ang kagabhion, ug panahon na nga mosakayg trolleybus alang sa pauli nga biyahe. Ubay sa dalan, ang mga bata namaligyag mga pungpong sa sarisaring mga bulak. Kay kalit nga nanganaog aron makapalit, gialirongan dayon kamig usa ka grupo sa mga bata nga mahunahunaon sa pagnegosyo. “Unsa ba nang daw perlas nga puting mga bulak?” gisukna ko si Yana, 15-anyos nga batang babaye nga bulagawon ug buhok. “Mga snowdrop,” siya mitubag nga mapasigarbohon. Nga giyango ang ulo tunong sa bungtod sa pikas sa karsada, midugang siya: “Pangutloon namo kana sa bungtod sayo sa kabuntagon inigsugod pagkatunaw sa ngilit sa niyebe.”

Sa wala madugay misakay na usab kami sa trolleybus, nga nag-ulpot-ulpot samtang nagbiyahe hangtod nakaabot kami sa tumoy sa among biyahe. Ingon sa mga batang nakahuman pagsakay sa roller coaster sa unang higayon, kami buot mobalik ug mosakay na usab!

[Mga mapa sa panid 22, 23]

(Alang sa aktuwal nga pagkahan-ay, tan-awa ang publikasyon)

UKRAINE

CRIMEA

Itom nga Dagat

SIMFEROPOL

↓ Chatyr-Dag nga Bukid

Alushta

↓

Pushkino

↓ Oso nga Bukid

Nikita

↓ Massandra

Yalta

Livadia

Ai Petri nga Bukid

Alupka

[Hulagway sa panid 22, 23]

Ai Petri nga Bukid

[Mga hulagway sa panid 23]

Vorontsov nga Palasyo, Alupka

[Hulagway sa panid 23]

Marmol nga Langob, Chatyr-Dag nga Bukid

[Hulagway sa panid 23]

Oso nga Bukid

[Hulagway sa panid 24]

‘Salag sa Sayaw’ nga Kastilyo, Yalta

[Hulagway sa panid 24]

Pondohan sa bino sa Massandra, Yalta, nga may mga botelya sa sherry nga sukad pa sa 1775

[Hulagway sa panid 24]

Uchansu nga Busay, Yalta, sa gihabogon nga kapin sa 320 ka piye, ang kinahabogan sa Crimea

[Hulagway sa panid 24]

Makasaysayanhong Livadia nga Palasyo, Yalta