Gikan sa Among mga Magbabasa

Buhok Nalingaw ako sa artikulong “Nabalaka Ka ba sa Imong Buhok?” (Agosto 8, 2002) Usa ako ka tigpatahom sulod na sa 14 ka tuig. Ang inyong giingon nga paagi sa pagbras sa nadaot nga buhok mao ang paagi sa pagbuhat namo niana. Nakadayeg ako sa dihang akong nakita nga maayo kaayong pagkasulat ang inyong mga artikulo.

K. K., Japan

Ingong himasa kaayo sa Pagmata! kinahanglang magpasalamat ako tungod niining artikuloha. Giuban na ako sukad pa sa unang bahin sa akong pagkatin-edyer. Sa dihang hapit na akong mag-20 anyos, ang mga uban klaro kaayo bisan sa layo. Nabalaka gayod ako niini. Kining artikuloha nakatabang kanako sa pagbaton ug makasaranganong panglantaw sa akong panagway samtang maghatag ug dakong pagtagad sa pag-ugmad ug diyosnong mga hiyas.

E. J., Nigeria

Kaibog Salamat sa taho diha sa “Pagpaniid sa Kalibotan” nga nag-ulohang “Nahubog sa Gugma.” (Agosto 8, 2002) Kining artikuloha nakatabang kanako sa pagkaamgo nga bisan sa usa ka situwasyon diin nagpadayon ang kaibog, dili buot ingnon nga kini maoy lig-ong pundasyon sa usa ka malipayong kaminyoon. Ang tambag nga sama niini makaluwas gayod sa usa ka tawo gikan sa binuang nga dalan!

P. L., Rusya

Mga Luau Nalingaw ako sa pagbasa sa inyong artikulo nga “Atong Tagamtamon ang Hawaiianong ‘Luau.’” (Hunyo 8, 2002) Pipila ka tuig kanhi nakatambong ako sa usa ka luau sa Hawaii. Gibati nako nga nalangkit gayod kadto sa relihiyon ug espiritismo. Bisan pag ang mga luau karon walay kalangkitan sa relihiyon o espiritismo, unsay kalainan niini sa ubang mga selebrasyon nga dunay paganong mga sinugdanan apan gisagop lang sa modernong mga kultura ingong kalingawan alang sa pamilya?

L. F., Tinipong Bansa

Ang “Pagmata!” nagtubag: Sumala sa giingon didto sa among potnot sa panid 24, bisan tuod ang luau kaniadto dunay koneksiyon sa bakak nga relihiyosong mga tulumanon, ang pulong luau karon nagtumong na lamang sa usa ka Hawaiianong bangkete. Ang usa ka espesipikong salosalo nga gitawag ug “luau” mahimo o mahimong dili angayng tambongan sa usa ka Kristohanon. Sama diha sa tanang bahin sa kinabuhi, ang mga Kristohanon kinahanglang mohimog mga desisyon nga maghatag kanila ug hinlong tanlag atubangan kang Jehova nga Diyos.​—1 Timoteo 1:​5, 19; tan-awa usab ang Enero 8, 2000, nga gula sa “Pagmata!” mga panid 26-7.

“Postpartum Depression” Daghang salamat sa artikulong “Nabuntog Nako ang Akong Pagpakigbisog sa ‘Postpartum Depression.’” (Hulyo 22, 2002) Gibati nako nga daw kining artikuloha gisulat alang kanako. Bisan tuod wala ako mag-antos sa postpartum depression​—ang akong bana ug ako walay anak​—nakigbugno ako sa depresyon ug kabalaka sulod na sa usa ka tuig ug tunga. Kanunay akong kapoyon ug maglibog, nga mibating dili takos nga mohimog yanong mga desisyon. Mahadlok kong makig-uban sa mga tawo. Dili gani ako makaadto sa groseriya kon wala ang akong bana. Miarang-arang nag diyutay ang akong gibati, ug nagtomar ako ug tambal. Masabtan nako niining artikuloha nga dako pa ang akong mahimo. Nabasa usab sa akong bana kining artikuloha, ug nasabtan niya kon sa unsang paagi siya labi pang makatabang.

J. R., Tinipong Bansa

Pagkadako sa akong pasalamat sa artikulo bahin sa postpartum depression! Maoy sa pagkatawo sa akong ikatulong anak nga giingnan ko sa mga doktor nga ako nag-antos sa grabeng depresyon human sa pagpanganak. Una pa niana, nagtuo ko nga nabuang na ako. Kadto maoy makalilisang, makapaguol nga panahon alang kanako ug sa akong pamilya. Ako nagtomar ug mga hilba ug bitamina ug kanunayng nag-ehersisyo, kanang tanan nakatabang kanako sa pagsagubang kutob sa akong mahimo. Palihog pasalamati si Janelle sa pagpaambit kanamo sa iyang sugilanon.

J. C., Tinipong Bansa