Haduol Na​—Usa ka Walay-Droga nga Kalibotan

Mahanduraw mo ba ang usa ka kalibotan nga walay nag-abuso ug droga?

GIAWHAG sa Sekretaryo-Heneral sa Hiniusang Kanasoran nga si Kofi Annan ang tanang nasod nga maningkamot padulong nianang matanga sa kalibotan. Siya mipahayag: “Kinahanglang himoon nato ang bag-o ug maisogong mga lakang sa pagbugno sa maong kadaotan; kini maoy hampak nga nakalit-ag sa atong daghan kaayong mga anak.”

Bisan pag magkauyon tingali ang mga pangulo nga kunhoran ang tibuok-kalibotang paggama ug pagpanagtag sa ilegal nga mga droga, ang maong tahas maoy labihan ka dako. Si Hennadiy Udovenko sa Ukraine, nga nag-alagad nga presidente sa usa ka espesyal nga sesyon sa Heneral nga Asembliya sa HK, miingon nga “tungod kay ang gikalkulo nga bili maoy kapig $400 ka bilyon sa usa ka tuig, ang patigayon sa narkotiko maoy usa sa labing dakog-ganansiya nga ilegal nga mga negosyo, . . . nga makaarang sa pagdaot o pagpahunong sa kalihokan sa ekonomiya sa tibuok kalibotan.” Midugang siya nga ang suliran sa droga “nahimong katingalahang hitabo sa tibuok kalibotan ug walay nasod ang mahimong mobati nga dili maapektahan sa maong kapeligrohan.”

Lisod mahanduraw ang usa ka kalibotan nga walay peligrosong mga droga. Sa pagkatinuod ang tawhanong mga gobyerno wala makawagtang niana. Hinuon, walay makapugong sa Labing Gamhanang Diyos sa pagtuman sa iyang katuyoan nga magpatungha ug usa ka yutan-ong paraiso diin tagbawon ang matag emosyonal, pisikal, ug espirituwal nga panginahanglan. (Salmo 145:16; Lucas 23:43; 2 Pedro 3:13) Sumala sa propetang Isaias, ang pulong sa Diyos ‘dili mobalik kaniya nga walay sangpotanan, apan kini tinong magbuhat nianang iyang gikahimut-an, ug kini tinong magpalampos sa butang nga tungod niana kini iyang gipadala.’​—Isaias 55:11.

Ang paglaom nianang mga saara makahatag ug talagsaong mga kaayohan bisan karon. Pananglitan, si Edmundo maoy tiggamit ug droga kanhi. Apan tungod sa pagdawat sa saad sa Bibliya bahin sa usa ka matarong nga bag-ong kalibotan, iyang gitimbangtimbang pag-usab ang iyang kinabuhi. Si Edmundo karon nag-ingon: “Pagkahungog nako tungod sa pag-usik sa akong panahon.” Kay matinguhaon nga padayong mauyonan sa Diyos, siya karon natukmod nga magpabiling nahigawas sa droga. Oo, ang kahibalo bahin sa Diyos ug sa iyang mga saad makatukmod kanato karon nga “magsul-ob sa bag-ong pagkatawo nga gilalang sumala sa kabubut-on sa Diyos sa matuod nga pagkamatarong ug pagkamaunongon.”​—Efeso 4:24.

Ang di-maihap nga uban pang kanhi nag-abuso ug droga nakapahimulos na usab ug suod nga relasyon uban sa ilang Maglalalang. Alang kanila ang mga pulong sa salmista adunay linaing kahulogan: “Oh ayaw hinumdomi ang mga sala sa akong pagkabatan-on ug ang akong mga kalapasan. Sumala sa imong mahigugmaong-kalulot hinumdomi ako, tungod sa imong pagkamaayo, Oh Jehova. Maayo ug matul-id si Jehova. Mao nga tudloan niya sa dalan ang mga makasasala.” (Salmo 25:​7, 8) Pagkamakahupay sa mga ginikanan sa masukihong mga anak ang pagkahibalo nga ang ilang mga anak mahimong magbag-o! Uban ang makugihong paningkamot, ang mga ginikanan makatabang sa ilang mga batan-on nga suklan ang hampak sa pag-abuso sa droga ug “makapangupot pag-ayo sa tinuod nga kinabuhi,” nga maangkon didto sa bag-ong kalibotan sa Diyos.​—1 Timoteo 6:19.

[Mga hulagway sa panid 10]

Ang paglaom sa pagkinabuhi diha sa bag-ong kalibotan sa Diyos nakatukmod sa daghang tiggamit ug droga nga magbag-o sa ilang mga kinabuhi