Magmalipayon Unta ang Imong Hinapos sa Semana!

HALOS tanan naghinamhinam niini, ug sa dihang moabot na kini, kasagaran kini mao ang labing makaiikag nga bahin sa semana. Ang pipila ka tawo mobiyahe nianang panahona, ang uban magduladula, ang uban manimba, ug ang uban magpabilin sa balay ug matulog nianang panahona.

Atong gihisgotan kanang yugto sa panahon taliwala sa kataposan sa usa ka semana sa pagtrabaho (o pag-eskuyla) ug ang sinugdanan sa sunod nga semana​—ang hinapos sa semana! Diha sa Kasadpang kalibotan, ang hinapos sa semana magsugod sa Biyernes ug matapos sa Dominggo. Apan diin man nagsugod ang ideya sa hinapos sa semana? Ug kon nagpuyo ka sa usa ka dapit diin naandan na ang lima-ka-adlaw nga semana sa pagtrabaho, unsa ang pipila ka mabungahong mga paagi nga mahimong gamiton nimo ang hinapos sa semana?

Ang Adlawng Igpapahulay Kaniadto Nailhang Hinapos sa Semana Karon

Ang mga balaod sa Igpapahulay nga gihatag ngadto sa nasod sa Israel mga 3,500 ka tuig kanhi nagbaod: “Unom ka adlaw nga makabuhat ug buluhaton, apan sa ikapito ka adlaw maoy igpapahulay sa bug-os nga pagpahulay. Butang kini nga balaan kang Jehova. Bisan kinsa nga magabuhat ug buluhaton sa adlaw nga igpapahulay pagapatyon gayod.” (Exodo 31:15) Ang Igpapahulay maoy usa usab ka kahigayonan alang sa Israelinhong mga ginikanan sa pag-atiman sa espirituwal nga mga panginahanglan sa ilang mga pamilya.

Ang Igpapahulay sa mga Hudiyo magsugod gikan sa pagsalop sa adlaw sa Biyernes hangtod sa pagsalop sa adlaw sa Sabado. Apan, sumala sa The World Book Encyclopedia, ang nag-angkong mga Kristohanon “naghimo sa Dominggo nga usa ka adlaw alang sa linaing pagsimba, tungod kay nagtuo sila nga ang pagkabanhaw ni Jesus nahitabo nianang adlawa. Sa mga katuigan sa 300 A.D., ang simbahan ug ang estado opisyal nga nag-ila niana ingong adlaw sa pagpahulay sa Uropa.”

Makaiikag, ang pagdugang ug usa ka adlaw sa yugto sa pagpahulay maoy usa ka bag-ong kaugmaran. Nagsugod sa Britanya sa katuigan sa 1870, ang semana sa pagtrabaho matapos sa tingpaniudto sa Sabado. Ang hapon nga tunga sa adlawng walay trabaho gipuno sa Dominggo nga maoy maglangkob sa hinapos sa semana. Sugdan ang Sabado sa hapon pinaagi sa usa ka pagpangaon sa pamilya, nga “kasagarang sundan sa senemanang pagpangaligo diha sa balay nga kaligoanan sa duol,” matod pa sa magasing Atlantic Monthly.

Sa Tinipong Bansa, ang hinapos sa semana mas gilugwayan pa, hangtod sa duha ka adlaw nga walay trabaho. Sumala sa usa ka tinubdan, ang unang lima-ka-adlaw nga semana sa pagtrabaho gisagop sa usa ka pabrika didto sa New England sa 1908. Ang maong kahikayan dalawaton sa trabahanteng mga Hudiyo ug mga “Kristohanon,” tungod kay ang matag grupo adunay kaugalingong adlaw sa pagpahulay​—Sabado alang sa mga Hudiyo ug Dominggo alang sa “mga Kristohanon.” Ang lima-ka-adlaw nga semana sa pagtrabaho dali rang napopular. Ang tiggamag awto nga si Henry Ford nagdasig niana, tungod kay siya maalamong miingon nga ang mga paglingawlingaw sa pamilya sa hinapos sa semana makapauswag sa panginahanglan ug mga awto.

May Giplano Ka ba sa Hinapos sa Semana?

Karong adlawa, ang duha-ka-adlaw nga hinapos sa semana nahimo nang establisadong bahin sa estilo sa kinabuhi sa mga taga-Kasadpan. Kon nagpuyo ka nianang bahina sa kalibotan, sa kataposan sa bisan unsang semana sa pagtrabaho, ikaw hayan pangutan-on sa imong mga kauban sa trabaho, “Unsa may imong giplano sa hinapos sa semana?” Kanang pangutanaha nagpatunghag pipila ka makaiikag nga mga posibilidad.

Tungod kay ang imong panahon gibut-an man sa imong amo sulod sa tibuok semana, ang hinapos sa  semana mahimong higayon nimo sa pagbaton pag-usab sa pagbati nga ikaw maoy nagbuot sa imong kinabuhi. Kana hayan magtugot kanimo nga malingaw sa kadiyot nga paghunong sa imong senemanang rutina. Mahimong higayon nimo kana sa pagpahulay ug maayo o paggugol ug panahon kauban sa imong mga minahal. O kana mahimong usa lang ka higayon sa paghimo sa usa sa labing popular nga lingawlingaw sa hinapos sa semana​—ang lingawlingaw nga pagpamalit. “Makalingaw ang pagsuroysuroy sa mga tindahan,” matod ni Brigitte, nga taga-Alemanya.

Gipakita sa mga surbi nga daghang tawo mopalabi sa paggugol sa ilang panahon sa paglingawlingaw pinaagi sa pagrelaks lamang. Alang sa mga tawo nga mas gustong magpabilin sa balay sa hinapos sa semana, adunay daghang posibleng mga kalingawan: pag-atiman sa tanaman sa sulod o sa gawas sa balay, pagkolektag mga selyo, pagpatugtog o pagpaminawg musika, pagtan-aw ug mga video, pagluto, pagsulat, pagbasa, pagpanahi, paggansilyo, pag-apil sa mga esport, ug pagpamintal, sa paghisgot lang ug pipila. Ang uban gusto sa mga kalihokan nga magtugot kanila sa pagpakig-uban sa ilang mga anak ug kapikas sa kaminyoon, sama sa pagdula ug mga jigsaw puzzle o mga board game. *

Gisaway ba sa Bibliya ang morag dili-kaayo hinungdanong paggamit sa panahon sa usa ka tawo? Wala man. Si Solomon nagsulat: “Mas maayo pa ang usa ka hakop nga pahulay kay sa duha ka hakop nga kahago ug paggukod sa hangin.” (Ecclesiastes 4:6) Sa kasarangang paagi, ang pagdula, pagpahulay, ug pagrelaks dayag nga may luna diha sa kinabuhi sa usa ka Kristohanon.

Paghinobra

Sa laing bahin, ang paghinobra bisan sa maayong butang mahimong dili mabungahon ug makadaot. Pananglitan, may mga kaayohan ang lawasnong pagbansay. (1 Timoteo 4:8) Apan ang mga nakigbahin sa esport matag hinapos sa semana naggugol halos sa tanan nilang panahon niana. Kay determinadong modaog kanunay pinaagi sa pag-ugmad sa hustong pamaagi, ang uban mogahin ug sobrang panahon ug salapi diha sa mga leksiyon sa pagbansay ug sa mahalong mga kasangkapan sa esport.

Adunay mga risgo usab sa panglawas diha sa pagpugos sa wala mabansay nga mga lawas nga mohimog sobra sa maarangan niini. Usa ka mantalaan nagtaho bahin sa mga edaran nga “madasigong nakigbahin sa mga esport sa hinapos lamang sa semana” kinsa nangaangol, nangapiang, nangasamad, ug nangapangos na hinuon kay determinado laging mahibalik ang ilang pagkabatan-on. Ang uban magpameligro sa ilang kaugalingon nga mahimong moresulta sa kamatayon o grabeng pagkaangol diha sa gitawag ug mga esport nga paukyab o nagpameligro sa kinabuhi. * Busa haom gayod ang tambag sa Bibliya nga “magmakasaranganon.” (Tito 2:2) Ang ehersisyo angayng makapalagsik, dili makapaluya o makapameligro.

Tungod niana, mas gusto sa uban nga mopahimulos sa dili sobra nga lawasnong mga kalihokan. Pananglitan, ang paglakawlakaw ug pagbaktas popular kaayo sa Alemanya. Gani, ang usa ka lingawlingaw nga popular kaayo sa Uropa gitawag ug challenge walking. Sa paghimo niana, makiglumba ka, dili sa ubang tawo, kondili sa oras. Ang ideya mao ang paglakaw diha sa gipiho nga ruta agi sa kabanikahan sulod sa gitakdang oras. Pagkamakapahimuot nga paagi sa pag-ehersisyo ug sa samang panahon malingaw sa maanindot nga talan-awon! Ug kini maoy usa ka butang nga mahimong kalipayan sa tibuok pamilya.

Punog-Kalihokan nga Hinapos sa Semana

Usahay ang mga tawo mag-eskedyul ug daghan kaayong kalihokan sa hinapos sa semana nga tungod niana pipila na lang o wala na gayoy kalihokan nga makalingaw kanila. Sa dihang magsugod na ang bag-ong semana, sila wala mapalagsik, kondili kapoy na kaayo. Ang magasin sa Alemanya nga Focus nagtaho bahin sa usa ka pagtuon diin 27 porsiyento niadtong gipangutana nakakaplag nga ang ilang mga paglingawlingaw nahimong hilabihan ka puliki ug makapit-os.

 “Ang pagpahulay maoy magbalantay sa pagkaepisyente,” nagsulat ang magasin nga Time. Sa samang paagi, nasabtan ni Jesu-Kristo nga kita nagkinahanglan ug pahulay ug pagpahayahay. Ang Marcos 6:31 nagtaho nga giingnan ni Jesus ang iyang mga tinun-an: “‘Pangadto kamo nga kamokamo ra sa usa ka mingaw nga dapit ug pahulay makadiyot.’ Kay daghan ang nangabot ug nanglakaw, ug wala silay higayon bisan sa pagpangaon.” Busa bisan tuod may hustong dapit ang pag-ehersisyo, pagpamalit, ug uban pang susamang mga kalihokan, ang pag-eskedyul ug pipila ka panahon alang sa lingawlingaw nga pagbasa, pagpahulay, o pagkatulog dakog ikatabang aron ka mapalagsik. Hinunoa, duna pay usa ka butang nga makadugang sa kalipayan sa bisan unsang hinapos sa semana.

Espirituwal nga mga Panginahanglan

Si Jesus nag-ingon diha sa iyang Wali sa Bukid: “Malipayon kadtong mahunahunaon sa ilang espirituwal nga panginahanglan.” (Mateo 5:3) Usa sa mga katuyoan sa orihinal nga adlawng Igpapahulay mao ang paghatag ug higayon sa mga tawo sa pag-atiman sa ilang espirituwal nga mga panginahanglan. Magamit ba ang mga hinapos sa semana alang sa maong susamang katuyoan karong adlawa? Tagda ang mga Saksi ni Jehova. Kadaghanan sa ilang mga kongregasyon nagpahigayon sa panguna nilang Kristohanong mga tigom sa Sabado o kaha sa Dominggo. Ang mga hinapos sa semana gigamit usab alang sa mas dagkong mga panagkatigom, sama sa mga asembliya ug mga kombensiyon. Daghang Saksi ni Jehova sagad naggugol ug panahon sa mga hinapos sa semana sa pagpamalaybalay nga makighisgot bahin sa Bibliya uban sa ilang mga silingan.

Siyempre, sama sa uban, ang mga Saksi ni Jehova may mga trabaho, panimalay, ug mga pamilya nga kinahanglang atimanon. Busa kon mahimo, nagplano usab sila ug mga lingawlingaw alang sa ilang kaugalingon ug sa ilang mga pamilya. Apan ilang giuna ang espirituwal nga mga butang. Nakapabug-at ba kanila ang pag-una sa espirituwal nga mga butang? Tagda ang mga eksperyensiya sa mosunod nga mga tawo.

Sa wala pa mahimong mga Saksi, usa ka magtiayong Aleman nga ginganlag Jürgen ug Doris naggugol sa ilang mga hinapos sa semana sa pag-ehersisyo diha sa usa ka sports club. Si Melle ug Helena naggugol sa ilang panahon sa pag-adto sa mga galeriya sa arte. Alang sa usa ka lalaki nga ginganlag Helmut, ang mga hinapos sa semana maoy panahon sa pagsuroysuroy sa gawas aron malingaw sa kinaiyahan. Ug ang usa ka babaye nga ginganlag Silvia naggugol sa iyang mga hinapos sa semana sa diskohan. Apan, sukad nahimong mga Saksi ni Jehova, nausab pag-ayo ang ilang mga batasan sa paglingawlingaw.

Si Jürgen ug Doris mipatin-aw: “Ang among mga paglingawlingaw gigamit aron mawala ang kalaay, apan dili ka makaingon nga kini nakapauswag sa among mga kinabuhi. Karong mga adlawa, ang pagtabang ug mga tawo sa pagsabot sa Bibliya makadugang ug kahulogan ug katuyoan sa ilang mga kinabuhi ug sa among mga kinabuhi usab.” Komosta si Melle ug Helena? “Ang Bibliya naghatag ug mga lagda alang sa labing maayong paagi sa pagkinabuhi, ug ang pagpakig-estorya sa ubang mga tawo bahin niana makahatag ug dakong kalipay.” Nganong nakabaton si Helmut ug mas matagbawong kinabuhi karon? “Ako nahibalo nga ang akong gibuhat diha sa publikong ministeryo hinungdanon kang Jehova,” siya nag-ingon. Ug si Silvia mikomento: “Ang pagwali nagkahulogan nga duawon ang mga tawo ug mohimog makaiikag nga mga panagkabildo, ug malingaw ako niana.”

Nganong dili makigsulti sa mga Saksi ni Jehova sa sunod higayon nga sila moduaw? Ang usa ka mubong panaghisgot uban kanila mahimong una nga lakang sa pagkaplag ug dugang katuyoan sa kinabuhi, dili lang sa usa ka hinapos sa semana kondili kada adlaw sa semana!

Bisag unsa pay imong gusto sa paglingawlingaw, himoa ang imong hinapos sa semana nga makapalig-on ug makalingaw. Kon nagpuyo ka sa Aleman-ug-sinultihan nga kalibotan, kami nanghinaot “schönes Wochenende.” Kon Kinatsila ang imong pinulongan, nan, “¡Buen fin de semana!” Kon ikaw taga-Ukraine, kami moingon, “Бажаю вам приємно провести вихідні.” Bisan asa ka nagpuyo ug bisan unsay imong ginabuhat, magmalipayon unta ang imong hinapos sa semana!

[Mga footnote]

[Blurb sa panid 13]

Ang usa ka makapahimuot nga semana mao ang maayong kombinasyon sa pagpahulay, paglingawlingaw, ug espirituwal nga kalihokan