Gikan sa Among mga Magbabasa

Basura Daghan kaayong salamat sa nunot-sa-panahon nga pangunang mga artikulong “Basura​—Matabonan Kaha Kita Niini?” (Agosto 22, 2002) Kon nagpuyo ka sa industriyalisado kaayong nasod, dali ka rang maapektohan sa kaisipan nga ang mga butang ilabay ra dayon. Ang inyong artikulo nakapahinuklog kanako bahin sa mga kapeligrohan niini. Mag-amping na ako bahin sa akong rason sa paglabay ug mga butang sukad karon!

J. B., Tinipong Bansa

Giganahan gayod ako sa mga artikulo bahin sa problema sa basura. Sulod na sa dugayng panahon, ako nagpuyo sa usa ka dakong apartment nga may dagkong basurahan sa maong propiedad. Usa ka higayon niana ako naglakaw sa gawas ug akong nakita nga sa ibabaw sa puno nga basurahan, didtoy bag-o ug sinaw nga coffeemaker. Di pa dugay, duha ka lalaking tin-edyer miingon nga nakakaplag sila didto ug usa ka bulawang relo. Nakurat ako kon unsa pa kahay among makaplagan sa maong mga basurahan. Karon aduna nay karatula nga nag-ingon, “Gidili ang pagpangukay sa mga basurahan.”

B. Q., Tinipong Bansa

“Cosmetic Surgery” Ako tim-os nga nagpasalamat kaninyo sa artikulong “Mga Batan-on Nangutana . . . Angay ba Akong Magpailalom sa ‘Cosmetic Surgery?’” (Agosto 22, 2002) Ako 14 anyos, ug sa eskuylahan dunay pipila ka estudyante nga motamay sa usa ka bahin sa akong nawong. Ako nakombinsir nga kinahanglang iparitoke ko kadto. Kining artikuloha nakatabang kanako sa pagsusi sa akong tinuod nga mga motibo ug sa pagsabot nga ako nasayop gayod diay. Ang importante kang Jehova mao ang atong pangsulod nga katahom.

C. T., Pransiya

Duha ka bulan kanhi, sa dihang nakigsulti ako sa usa ka kaubang trabahante, among nahisgotan ang bahin sa cosmetic surgery. Siya mibati nga dili kini angay kay kini wala magpakitag pagtahod sa Maglalalang. Sa maong panahon, wala akoy nakaplagang espesipikong punto diha sa atong mga publikasyon. Bisan pa niana, giingnan nako siya kon unsang mga prinsipyoha sa Bibliya ang mapadapat, nga sa ulahi akong nakaplagan niining artikuloha. Sa dihang gipakita nako ang artikulo kaniya, siya nahinam pag-ayo.

M. R., Tinipong Bansa

Kolor Nahimong mas sayon ang akong desisyon sa pagpintal sa akong balay human nako mabasa ang artikulong “Pintali Pag-usab ang Imong Balay.” (Agosto 22, 2002) Ako nagpasalamat dili lamang tungod sa artikulo kondili sa pagtabang usab kanako sa pagdaginot!

R. M., Tinipong Bansa

Pagkamadanihon Ako 21 anyos, ug nakigbisog ako sa pagbati nga ako dili madanihon. Ang akong kasinatian maayong pagkahubit ni Tyler diha sa artikulong “Mga Batan-on Nangutana . . . Unsay Mahimo Ko Aron Mahimong Mas Madanihon?” (Hulyo 22, 2002) Ang praktikal, binase-sa-Bibliya nga tambag niining artikuloha mao gayod ang akong gikinahanglan. Salamat niini ug sa ubang mga publikasyon nga padayong nagtabang sa mga batan-on nga nagsagubang sa daghang problema niining daotang kalibotan. Ang mahimo lamang nako mao ang pagpadapat niining tambaga.

P. L., Zambia

Pag-ampo Dawata ang akong tim-os nga pasalamat sa artikulong “Ang Hunahuna sa Bibliya: Mga Pag-ampo nga Dunggon sa Diyos.” (Septiyembre 8, 2002) Sa adlaw sa akong pagbasa niadto, ako nagmagul-anon pag-ayo. Nakapalig-on gayod kanako ang pagbasa sa mga pulong sa Isaias 41:10. Pagkamalipayon nako nga si Jehova nagpalig-on dili lamang kanako kondili sa ubang tawo usab ug nga siya nagpatalinghog sa tanan natong mga pag-ampo, bisan sa atong mga hunahuna! Nagpuyo ako diha sa nabahin sa relihiyon nga pamilya sulod sa 20 ka tuig. Dili kini sayon kay nag-antos usab ako sa usa ka laygay nga balatian sulod na sa 30 ka tuig. Daghan kaayong salamat niining talagsaong mga magasin. Ako padayon nga gidasig niini uban ang kusog sa paglahutay.

D. G., Alemanya