Ang Tumotumo nga Wala Mahanaw

TINAMPO SA MAGSUSULAT SA PAGMATA! SA PRANSIYA

ANG mga bata sa tibuok kalibotan nagdayeg kaniya. Sa di pa dugayng tuig, ang mga serbisyo sa koreyo sa Pransiya nakadawat ug duolan sa 800,000 ka sulat alang kaniya​—kadaghanan gikan sa mga bata nga nag-edad ug tali sa tres ug otso anyos. Tungod sa iyang baga nga puting bungot ug pulang taas nga kupo nga girebetihan ug puting balhibo, ang mahigalaong Santa Claus morag maoy usa sa labing popular nga pangdani sa selebrasyon sa Pasko. Nan, mahanduraw ba nimo ang pagsunog ug usa ka larawan niya? Mao gayod kanay nahitabo kapin lang sa 50 ka tuig kanhi sa Dijon, Pransiya. Sa Disyembre 23, 1951, si Santa Claus “gipatay” atubangan sa mga 250 ka bata.

Unsay iyang salaod? Ang mantalaang France-Soir nagtaho nga ang maong pagpatay “gidesisyonan uban ang pag-uyon sa klero, kinsa nagsaway kang Santa Claus ingong mangingilog sa kadungganan nga angayng ihatag kang Kristo ug erehes” ug nag-akusar kaniya nga “naghimo sa Pasko nga pagano.” Ang pagpatay maoy “usa ka mahulagwayong lihok,” matod sa usa ka pahibalo. “Ang kabakakan dili makapukaw ug relihiyosong mga pagbati diha sa mga bata ug dili gayod mao ang paagi sa pag-edukar.”

Gibati sa pipila ka klero nga ang mga kostumbre nga nalangkit kang Santa Claus nagpahilayo sa mga tawo gikan “sa matuod nga Kristohanong kahulogan” sa pagkatawo ni Jesus. Gani, sa Marso 1952 nga gula sa Les Temps Modernes (Modernong mga Panahon), ang eksperto labot sa mga rasa sa tawo nga si Claude Lévi-Strauss nagtawag sa pagtuo kang Santa Claus nga “usa sa labing aktibo kaayong mga pugaran sa paganismo taliwala sa modernong katawhan” ug nag-ingon nga ang simbahan napamatud-ang husto sa pagsaway sa maong pagtuo. Nag-ingon usab si Lévi-Strauss nga ang mga sinugdanan ni Santa Claus masubay ngadto sa hari sa Saturnalia. Ang pista sa Saturnalia gisaulog sa karaang Roma gikan sa Disyembre 17 hangtod sa 24. Sulod nianang semanaha, ang mga bilding gidayandayanan ug berdeng mga tanom ug may pagbayloanay ug mga gasa. Sama sa Pasko, ang Saturnalia nailhan pinaagi sa hudyaka.

Karon, kapin sa 50 ka tuig human sunoga ang larawan ni Santa Claus, unsay panglantaw sa mga Katoliko sa Pransiya kang Santa Claus? Kining layo nga manununod sa Saturnalia sa Roma maoy bahin gayod sa Pasko sama ra sa paghulagway kang Jesus diha sa pasungan. Usahay, may pari nga magyagyag kang Santa Claus ingong naghawas sa usa ka matang sa komersiyalismo nga nagkuha kang Kristo gikan sa Pasko. Apan, kasagaran, ang bisan unsang pagduhaduha bahin sa paganong mga sinugdanan ni Santa Claus nangahanaw tungod kay gidawat na kini sa publiko.

[Picture Credit Line sa panid 13]

DR/© Cliché Bibliothèque nationale de France, Paris