Gikan sa Among mga Magbabasa

Mga Batan-on Nangutana Salamat sa artikulong “Mga Batan-on Nangutana . . . Nganong ang Akong Ginikanan Wala Mahigugma Kanako?” (Septiyembre 22, 2002) Ako 16 anyos, ug wala ako makakita sa akong tinuod nga amahan sukad nga ako 4 anyos. Kining artikuloha tukma nga nagpahayag sa akong pagbati. Husto ang giingon niini nga halos walay mas masakit pa kay sa pagkasinalikway sa ginikanan. Salamat niining espirituwal nga pagkaon sa hustong panahon.

J. J., Tinipong Bansa

Ang akong mga ginikanan nakadesisyon sa pagdiborsiyo 13 ka tuig human sa ilang pagbulag. Wala nako kanhi masabti kon nganong nag-antos ako sa hilabihan, tungod kay nagtuo ko nga dugay na nakong nasagubang ang maong kagul-anan. Ang pagkasabot sa hinungdan sa akong dakong kaguol nakatabang kanako sa paghimo sa akong mga pag-ampo nga mas espesipiko ug sa pagtugyan niini nga palas-anon ngadto kang Jehova.

M. D., Italya

Sayis anyos ako sa dihang gibiyaan sa akong amahan ang among pamilya. Sukad niadto siya panagsa na lang makigkontak nako. Sulod sa daghang tuig nakigbisog ako sa pagbati nga sad-an. Tungod niini, naglisod gayod ako sa pagsulti sa akong pagbati ngadto sa uban. Ang mga kasinatian diha sa inyong artikulo nakatandog nako ug nakatabang nako sa pagkaamgo nga wala ako mag-inusara niining kahimtanga. Palihog ayaw hunahunaa nga kaming mga magbabasa gamay rag kaayohan nga mabatonan gikan niining mga artikuloha. Kami mapasalamaton kaayo niini!

A. H., Inglaterra

Ako 16 anyos, ug ang akong amahan bag-o pang nakigdiborsiyo sa akong inahan. Ang akong manghod nga lalaki, magulang nga babaye, ug ako nahugno. Kining artikuloha talagsaon kaayo. Pagsugod pa lang nakog basa, nakahilak na ako. Gihubit niini ang tanan nakong gibati. Ang mga pulong malumo ug mahigugmaon kaayo. Sa nagsige kog basa, labi pa akong natandog. Makadaghan nakong gihunahuna kon takos ba gayod ako sa gugma sa akong amahan. Mao nga nahupay gayod ako niining artikuloha. Pagkamaayo kaayong bation nga bisan pag ako wala higugmaa sa akong tawhanong amahan, ako gihigugma gayod ni Jehova. Ako dili kinahanglang mabalaka nga basin kalit siya nga mausab ug talikdan ako.

A. M., Tinipong Bansa

Ang among pamilya nagdako nga may alkoholikong amahan, ug nag-antos gayod ang akong inahan. Kaming mga anak wala kaayo matagad. Akong gibati nga ako walay pulos ug gusto pa gani nako nga mamatay. Nangayo ako ug tabang diha sa akong mga pag-ampo. Mapasalamaton kaayo ako sa dihang migawas kining artikuloha. Nahupay ako sa ideya nga bisan ang mga tawo nga ingon niinig kahimtang mahimong magmalipayon ug magmalamposon pinaagi sa pagpadapat sa mga prinsipyo sa Bibliya. Ako nakaamgo nga mahimo usab akong magmalipayon!

A. I., Japan

Banilya Medyo nabalaka ako bahin sa artikulong “Banilya​—Usa ka Panimpla nga Taas ug Kasaysayan.” (Septiyembre 22, 2002) Mga tuig kanhi nakabasa ako ug artikulo bahin sa makahilong banilya gikan sa Mexico. Daghang tawo ang mopalit niini ug wala mahibalo nga kini makahilo.

P. D., Tinipong Bansa

Ang “Pagmata!” nagtubag: Ang ubang banilya nga gigama sa Mexico​—maingon man sa ubang mga nasod​—dunay mga liso sa tonka, nga daghan ug coumarin. Kining kemikala gidili sa U.S. Food and Drug Administration tungod sa makahilong mga epekto niini. Tungod kay dili posibleng mamatikdan ang coumarin pinaagi lang sa pagtan-aw o pagsimhot, ang mga pumapalit gitambagan sa pagpalit ug banilya gikan sa kasaligang mga tigbaligya. Dugang pa, sanglit mahal ang puro nga banilya tungod sa gastos sa paggama niini, kinahanglang magbantay sa “barato kaayo” nga “baratilyo.”