Mas Dako ang Iyang Nalampos kay sa Iyang Gidahom
Mas Dako ang Iyang Nalampos kay sa Iyang Gidahom
“NAHIBALO ko nga ang akong magtutudlo sa history wala makaangay sa mga Saksi ni Jehova, bisan pag wala ko masayod kon ngano,” matod sa 17-anyos nga si Rebekka nga taga-Alemanya. Busa, sa dihang nangutana ang magtutudlo kon duna bay moboluntaryo sa paghatag ug pakigpulong atubangan sa klase, nagpanuko si Rebekka. Bisan pa niana, siya nakabaton ug kaisog sa pagpangayo sa iyang pagtugot nga mopakigpulong bahin sa paglutos sa mga Saksi ni Jehova ilalom sa rehimeng Nazi panahon sa Gubat sa Kalibotan II. Nakaangay ang magtutudlo sa maong sugyot.
Nalingaw ang klase sa presentasyon ni Rebekka, ug midawat sila ug 44 ka magasin ug mga pulyeto bahin sa maong ulohan. Human niana, gihatag ni Rebekka ang iyang gidukiduki nga materyal ngadto sa iyang magtutudlo, lakip na ang ubay-ubayng mga libro ug mga video nga sinulat o ginama sa mga dili-Saksi. Ang usa ka video nagtaho bahin sa paglutos sa mga Saksi ni Jehova sa Sidlakang Alemanya panahon sa Bugnawng Gubat. Nakapainteres gayod kini sa magtutudlo, tungod kay wala siya masinati sa maong ulohan.
Niadtong tungora nadiskobrehan ni Rebekka kon nganong ang iyang magtutudlo wala makaangay sa mga Saksi ni Jehova. Siya mipatin-aw nga may klasmet siyang usa sa mga Saksi ni Jehova. Apan ang maong batan-ong lalaki halos walay gisulti bahin sa iyang tinuohan o bahin sa iyang pagka-Saksi. Busa, ang magtutudlo nakahinapos nga ang mga Saksi maoy katingad-an nga mga tawo ug nakahukom nga dili makiglabot kanila. Apan ang presentasyon ni Rebekka nag-usab sa iyang panghunahuna. “Mas suod ako karon sa akong magtutudlo,” matod niya. “Nakat-onan usab nako nga kaming mga batan-on angayng mahimong mas madayganon ngadto sa uban bahin sa among pagtuo.”
Apan wala diha matapos ang estorya. Gisultihan sa magtutudlo ang iyang mga kauban bahin sa maayo kaayong pakigpulong ni Rebekka. Pipila ka adlaw sa ulahi, ang magtutudlo bahin sa maayong pamatasan naghangyo kang Rebekka nga mopakigpulong pag-usab, dili lang atubangan sa klase kondili sa usa ka linain gayod nga okasyon—sa tinuig nga kasaulogan sa eskuylahan sa kagawasan sa kampo konsentrasyon sa Auschwitz pagkahuman sa Gubat sa Kalibotan II. Duolan sa 360 ka estudyante ang mitambong, lakip na sa mga napulo ka magtutudlo. Pagkahuman sa pakigpulong, kadtong nanambong midawat ug 50 ka pulyeto, ug ang eskuylahan mihangyo ug dugang pang 150 ka kopya nga ipanghatag sa ulahi.
Mas dako ang nalampos ni Rebekka kay sa iyang gidahom. Usa ka maayong pamatuod bahin sa iyang pagtuo ang nahatag dili lang ngadto sa iyang klase kondili usab ngadto sa tibuok eskuylahan. Ug nabuntog sa iyang magtutudlo ang iyang mga pagduhaduha sa sinugdanan bahin sa mga Saksi.
[Hulagway sa panid 14]
Si Heinrich Fundis gipunggotan ug ulo sa mga Nazi. Gatosan pa ka ubang mga Saksi ang gipamatay usab
[Hulagway sa panid 14]
Daghang Saksi ni Jehova ang gitanyagan ug kagawasan kon ilang pirmahan kining dokumentoha nga nagsalikway sa iyang pagtuo
[Credit Line]
Courtesy of United States Holocaust Memorial Museum
[Hulagway sa panid 15]
Ang mga bata sama kang Berthold Mewes gipanguha gikan sa ilang mga ginikanan
[Hulagway sa panid 15]
Kining maong video nagsaysay sa pagkamaisogon sa mga Saksi ni Jehova diha sa Nazi nga Alemanya
[Hulagway sa panid 15]
Usa ka purpurang triyanggulo ang gitahi diha sa mga uniporme sa binilanggo aron sa pagpaila sa mga Saksi ni Jehova