Praktikal nga Tambag Alang sa mga Batan-on

Samtang nagtanyag ug mga magasin duol sa usa ka bilding sa korte sa California, T.B.A., si Bill, nga usa sa mga Saksi ni Jehova, giduol sa usa ka lalaki nga gustong motan-aw sa tanang magasing Pagmata! nga dala ni Bill. Si Bill nag-asoy: “Sayo pa niana gihatagan akog daang mga magasin sa mga igsoon sa kongregasyon, busa nakapakita kog daghang nagkalainlaing isyu sa Pagmata! sa maong lalaki.

“Gilain dayon sa lalaki ang mga magasin nga wala pa niya mabasa. Nangutana siya kon mahimo bang mabatonan ang maong mga magasin. Nagpailaila siya sa iyang kaugalingon nga usa ka empleyado sa korte sa probinsiya ug miingon nga siya mao ang natudlo sa pagtambag sa mga batan-on nga may mga suliran. Iyang gipatin-aw nga mokuha siyag Pagmata! aron pakopyahan ang mga artikulong ‘Mga Batan-on Nangutana.’ Dayon iyang ipayl ang mga artikulo sumala sa ulohan ug ipanghatag kana ngadto sa mga batan-on nga iyang tambagan. Ang lalaki miingon: ‘Ang mga ulohan nga gihisgotan maoy kasagarang mga problema nga nagahasol karon sa mga batan-on.’ Iyang gidayeg ang mga Saksi ni Jehova tungod sa pagpatik ug mapuslanong impormasyon aron sa pagtabang sa mga batan-on. Siya miingon usab nga iya akong pangitaon sa sunod aron sa pagkuhag bag-ong mga magasin nga Pagmata!”

Daghan sa impormasyon nga gipatik sa serye sa “Mga Batan-on Nangutana” makita diha sa librong Mga Pangutanang Gisukna sa mga Batan-on​—Mga Tubag nga Mosaler. Makahangyo kag kopya niining 320-panid nga libro pinaagi sa pagpil-ap sa nagaubang kupon ug ipadala kini sa adres nga gipakita sa kupon o sa nahiangay nga adres nga gilista sa panid 5 niining magasina.

□ Interesado ako nga makadawat ug kopya sa librong Mga Pangutanang Gisukna sa mga Batan-on​—Mga Tubag nga Mosaler.

□ Palihog kontaka ako mahitungod sa usa ka libreng pagtuon sa Bibliya sa balay.