Ang “Labing Titip nga Kalye”?

◼ Unsay nakapaespesyal sa Baldwin Street, nga anaa sa Dunedin, New Zealand? Dugay nang giangkon sa Dunedin nga kining kalyeha mao ang labing titip nga kalye sa kalibotan. Bisan pag gilalis ang maong pangangkon, usa ka butang ang segurado: Titip kaayo ang Baldwin Street.

Kining iladong kalye nahimong popular nga destinasyon sa mga turista gikan sa tibuok kalibotan. Hinuon, dili kinahanglanon nga ikaw maoy tigkatkat ug bukid aron maabot ang tumoy niini. Ikaw makatungas nga maglakaw niining 359-metros nga kalye, apan wala idasig sa mga motorista nga sulayan ang pagtungas niini nga magdrayb ug sakyanan.

Kuyog Kanamo sa Pagtungas

Sanag ang adlaw samtang ang akong duha ka kauban ug ako mipasiplat sa tibuok gitas-on sa kalye nga diha sa among atubangan. Sa pagsugod pa namo sa pagtungas, taudtaod gikutasan na kami samtang nagtikubo aron makapanimbang. “Sama kinig pagkatkat ug kongkretong paril,” may misulti nga nagkanguhal. Mipatim-aw ang usa ka bangko sa hustong panahon ug kini samag nagpangamay kanamo aron makapahulay.

Mipadayon kami sa pagtungas, ug sa wala madugay didto na kami sa tumoy nga nagtan-aw sa talagsaong talan-awon, nga namahulay aron manormal ang pagginhawa. Diha sa among ubos ang hapsayng mga lumbay sa maayong-pagkaatiman nga kabalayan ug mga tanaman. Ang kapunawpunawan naglakip sa dugom-berde nga ihalas nga mga tanom sikbit sa lunhawng sibsibanan​—nga kanang tanan gipaluyohan sa asul nga kalangitan.

Ang among pagtungas hangtod sa tumoy sa kalye wala makalupig ug bisan unsang talagsaong mga rekord sa katulinon. Pagkatapos sa among paglugsong, mihunong kami aron maletratohan ang kalye nga among natungas ug aron madawat ang among kopya sa Sertipiko sa Kalamposan gikan sa siyudad nga nag-ingon nga kami nakatungas sa “Labing Titip nga Kalye sa Kalibotan.”​—Tinampo.