Gikan sa Among mga Magbabasa

Usay-Ginikanan nga mga Pamilya Dili ko igong ikapahayag ang kadako sa akong kahimuot sa pagbasa sa mga artikulo sa hapin nga “Usay-Ginikanan nga mga Pamilya Mahimong Molampos.” (Oktubre 8, 2002) Buot kong balikbalikon ang pagbasa niini! Ako maoy nag-inusarang ginikanan nga duha ug anak. Matag basa nako sa maong mga artikulo, pasaligan ko ang akong kaugalingon nga ako mahimong molampos ug nga ako wala mag-inusara. Daghan kaayong salamat!

C. B., Tinipong Bansa

Ako diborsiyada. Ang kinabuhi lisod kaayo sa dihang ako nag-inusara uban sa duha ka anak. Nagpasalamat ako kang Jehova nga siya mamati sa atong mga pagtuaw ug motubag pinaagi sa maong mahigugmaong mga artikulo. Niining paagiha siya nagpasalig kanato nga siya nagahunahuna kanato ug nga siya nahigugma kanato.

L. T., Czech Republic

Daghang salamat tungod sa pagpatik sa maong mga artikulo. Nagsugod pa ako sa pagbati nga nabug-atan sa akong kahimtang karon kay nag-inusarang ginikanan ug mibalik sa pagtrabaho human sa pagpuyo lang sa balay isip inahan sa daghang katuigan. Bisan pa niana, ang mga artikulo mihatag kanakog paglaom ug pagdasig nga maoy akong gikinahanglan aron makapadayon. Nagplano ko nga ipadapat ang mga sugyot, sama sa pagkahimong organisado kaayo ug pagdumalag regular nga pagtuon sa Bibliya uban sa pamilya. Ibutang ko sa duol kining magasina ug basahon kini matag higayong mobati ako nga nabug-atan na usab.

B. A., Tinipong Bansa

Ako nahimong usa ka nag-inusarang ginikanan alang sa akong anak lalaki ug babaye 14 ka tuig kanhi. Salamat sa paningkamot nga inyong gihimo diha sa inyong mga basahon; bisan pa niana ako nahiubos sa pipila ka bahin sa maong mga artikulo. Pananglitan, ang pulong “malamposon” gibalikbalik sa paggamit. Akong gibati nga napadapat ko ang mga sugyot sa panid 11, apan wala ko mabatoni ang samang kalamposan sama sa ginikanan nga gihulagway sa maong panid. Seguradong ang kalamposan wala lang magpasabot nga ang imong anak mahimong bug-os-panahong magwawali o misyonaryo.

M. S., Japan

Ang “Pagmata!” nagtubag: Nahibalo kami nga ang kalamposan masukod sa nagkalainlaing mga paagi. Ang among tuyo mao ang paghatag ug praktikal nga mga sugyot sa pagtabang sa nag-inusarang mga ginikanan aron makasagubang sa makapaguol nga mga suliran sa kinabuhi ug sa pagpasalig nga ang ilang mga paningkamot wala makawang. Ang mga panig-ingnan sa mga batan-on diha sa bug-os-panahong pag-alagad gigamit aron ipakita nga ang nag-inusarang mga ginikanan milampos sa pagmatuto sa mahinadlokon sa Diyos nga mga anak. Naglaom kami nga ang tanang ginikanan​—nag-inusara man o minyo​—mopadayon sa pag-atiman sa espirituwal, emosyonal, ug pisikal nga mga panginahanglan sa ilang mga anak.

Kagutom sa Irlandia Salamat tungod sa matulon-anong artikulong “Ang Grabeng Kagutom sa Irlandia​—Usa ka Asoy sa Kamatayon ug Paglalin.” (Oktubre 8, 2002) Sa panahon sa maong kagutom, daghang Irlandes nga mga imigrante ang nangadto sa Canada sakay sa barko. Daghan ang namatay gumikan sa kolera, tipos, ug ubang mga sakit. Daghang bata ang nailo, ug ang pipila gisagop sa nagsultig-Pranses nga mga pamilya ug gihatagan ug Pranses nga mga apelyido. Busa, sa lakat sa panahon, ang Irlandes nga kagikan sa daghang tawo wala na hisayri.

K. S., Canada

Mga Batan-on Nangutana Buot kong mokomento bahin sa inyong artikulong “Mga Batan-on Nangutana . . . Nganong ang Akong Ginikanan Wala Mahigugma Kanako?” (Septiyembre 22, 2002) Human sa diborsiyo sa akong mga ginikanan, nagsugod ang akong grabeng depresyon. May mga panahon nga maorag walay makatabang kanako. Ako nakabaton ug labing talagsaong inahan ug igsoong lalaki nga buot mabatonan ni bisan kinsa, apan bation ko usahay nga nawad-an ako sa akong kinasulorang pagbati​—ang pagbati nga gikuha sa akong amahan. Miampo ako kang Jehova nga unta may butang nga moabot nga makapalig-on kanako. Kana gayod ang gibuhat sa maong artikulo. Nakatabang kini kanako sa pagbaton ug mas positibong mga pagbati, ug nakakat-on ako sa pagsagubang. Ang nakapatandog gayod kanako mao ang Salmo 27:10. Nakatabang kana kanako sa pagkaamgo nga si Jehova nahigugma kanako bisan pag daw wala nay lain nga nahigugma kanako.

D. B., Tinipong Bansa