Gikan sa Among mga Magbabasa

Terorismo Ako 15 anyos, ug nagpasalamat ako kaninyo alang sa serye sa Oktubre 22, 2002, nga isyu, “Mga Pag-ampo Alang sa Pakigdait​—Makapahunong ba Kini sa Terorismo?” Sukad sa pag-atake sa World Trade Center niadtong Septiyembre 11, 2001, ako naguol. Kadto maoy samag usa ka mangil-ad nga damgo. Nagpaabot ako sa panahon nga si Jesus, ang Prinsipe sa Pakigdait, manalipod kanatong tanan. Kana makapahupay gayod kanato.

A. M., Tinipong Bansa

Mga Zeppelin Ang artikulong “Mga Zeppelin​—Talagsaong Higanteng mga Airship,” sa Oktubre 22, 2002, nga isyu, nakadani gayod sa akong pagtagad tungod kay kini nakapahinumdom kanako sa panahong bata pa ako. Nag-eskuyla ako sa sidlakang bahin nga duol sa baybayon sa Inglaterra. Usa ka adlaw niana sa dihang diyes anyos pa ako, mitan-aw ako sa bentana ug nakakitag usa niining dagkong mga airship diha sa itaas nga hinayng naglupad. Ang tanang estudyante migawas ngadto sa tugkaran sa eskuylahan aron sa pagtan-aw niining talagsaong talan-awon. Usa kadto ka hitabo nga wala gayod nako malimti, ug ang inyong artikulo nakapahinumdom ug balik niadtong hitaboa.

R. W., Inglaterra

Ang akong amahan maoy usa ka piloto sa usa sa dagkong mga nonrigid airship nga nagama sukad. Kaduha na ko nakasakayg blimp ug interesado gayod ako sa kasaysayan sa mga dirigible. Nalipay ako nga husto ang inyong paghubit sa mga pulong “blimp,” “zeppelin,” ug “dirigible,” tungod kay kining mga pulonga kanunayng sayop pagkagamit.

R. P., Tinipong Bansa

Mga Penguin Wala mosugot ang akong bana nga magtuon ug Bibliya ang akong mga anak nga lalaki. Tungod niini, dili interesado ang akong mga anak niana. Apan sa tabang sa inyong matulon-anong mga artikulo, makatudlo gihapon ako kanila sa espirituwal nga paagi. Mopili ako ug mga artikulo nga wala maghisgot sa espesipiko sa Bibliya o sa Diyos apan makapainteres sa akong mga anak. Pananglitan, akong gipaseroks ang artikulong “Ania Miabot na ang Parada sa Gagmayng mga Penguin” (Oktubre 22, 2002) ug gibutang kana sa usa ka gamayng polder nga akong gihimo alang kanila nga gitawag ug Ang mga Kahibulongan sa Kinaiyahan. Nanghinaot ako nga gantihan ni Jehova ang akong mga paningkamot nga makabig ang akong mga minahal.

J. G., Pransiya

Mga Cellphone Ang artikulong “Mga Batan-on Nangutana . . . Nagkinahanglan ba Ako ug Cellphone?” (Oktubre 22, 2002) nakatabang ug dako kanako. Sa wala pa nako kini mabasa, dili ko makatulog kon dili matubag ang akong mga text message. Apan natabangan ako ninyo nga makita ang mga bentaha ug disbentaha niining maong galamiton.

C. A., Pilipinas

Ang kadaghanan sa mga batan-on sa akong eskuylahan dunay mga cellphone, busa nangandoy ko nga makabaton ug cellphone. Karon nga nabasa na nako ang artikulo, palandongon nakog maayo ang mga epekto sa paggamit niini ug kon magamit gayod nako kini sa maalamong paagi. Nagtuo ako nga gitagana ni Jehova kining maong artikulo para nako.

M. F., Japan

Nakig-estorya ako sa usa ka lalaki pinaagig E-mail ginamit ang akong cellphone. Naghisgot kami bahin sa personal nga mga problema, ug nalipay ako nga dunay kasumbongan. Sa kadugayan, wala na siya mag-E-mail nako, ug nalagot ako. Apan ang artikulo nakatabang nako sa pagsabot nga ang pagpakig-estorya pinaagig E-mail maoy usa ka matang usab sa pagpakigdeyt. Ug nagtuo ako nga mao usab kanay naamgohan sa lalaki. Karon ihatag lamang nako ang akong E-mail nga adres sa mga tawong kinahanglang mahibalo niana.

Y. M., Japan

Depresyon sa Tin-edyer Ako 17 anyos ug ganahan kaayo ko sa inyong mga magasin. Kas-a sa dihang didto ako sa ospital, nakakita kog mga magasing Pagmata! sa estante sa magasin diha sa koridor. Nahibaloan nako nga ang Labing Gamhanang Diyos adunay ngalan​—Jehova. Nalingaw ako ilabina sa seryeng “Tabang Alang sa Magul-anong mga Tin-edyer.” (Septiyembre 8, 2001) Kini maoy mapuslanong basahon ug nakatabang kanako nga makasagubang, sanglit niadtong tungora ako nag-antos sa depresyon. Salamat sa maong talagsaon ug matulon-anong mga magasin. Mapasalamaton ako nga dunay mga tawong sama ninyo.

G. Z., Rusya