Kon sa Unsang Paagi Gitagbaw ang Akong Espirituwal nga Kauhaw

SUMALA SA GIASOY NI LUCIA MOUSSANETT

NAHIMUTANG diha sa kabukiran sa amihanan-kasadpan nga suok sa Italya, duol sa Swiss Alps ug sa iladong Mont Blanc sa Pransiya, mao ang rehiyon sa Valle d’Aosta. Natawo ako didto sa 1941 diha sa gamayng baryo sa Challant St. Anselme.

Ako ang kamagulangan sa lima ka anak; mga lalaki ang akong upat ka manghod. Si Mama trabahante kaayo ug debotadang Katoliko. Si Papa usab naggikan sa relihiyosong pamilya. Duha sa iyang mga igsoong babaye maoy mga madre. Daghang materyal ang gisakripisyo sa akong mga ginikanan alang kanako, lakip na ang pagpaningkamot aron ako makaeskuyla. Walay tunghaan diha sa among gamayng baryo, busa sa dihang nag-edad ako ug 11, gipadala ako sa akong mga ginikanan ngadto sa usa ka eskuylahang may dormitoryo nga gidumala sa mga madre.

Didto nagtuon ako ug Latin ug Pranses, lakip na sa ubang mga leksiyon. Unya, sa dihang ako nag-15 anyos, ako nagsugod sa pagpalandong ug maayo kon sa unsang paagi makaalagad sa Diyos. Ako nangatarongan nga ang pagsulod sa kombento mao ang kinamaayohang paagi sa paghimo niini. Apan, wala kini magustohi sa akong mga ginikanan, sanglit wala na unyay kauban si Mama sa pag-atiman sa akong mga manghod. Ang akong mga ginikanan naglaom nga pinaagi sa akong edukasyon, ako makakita ug maayong trabaho ug makatabang sa akong pamilya sa pinansiyal.

Bisan tuod nakapasubo kanako ang reaksiyon sa akong mga ginikanan, buot nako nga ang akong kinabuhi  dunay tinuod nga katuyoan ug ako nagtuo nga ang Diyos maoy angayng unahon. Busa, niadtong 1961, ako misulod sa usa ka kombento sa Romano Katoliko.

Ang Akong Kinabuhi Ingong Madre

Sa unang pipila ka mga bulan, akong gitun-an ang mga lagda ug mga balaod sa simbahan ug gihatagan akog hago nga trabaho diha sa kombento. Sa Agosto 1961, ako nagsugod sa akong nobisyada ug nagsul-ob sa naandang besti sa mga madre. Ang akong gisugyot nga akong bag-ong ngalan maoy Ines, ang ngalan sa akong inahan. Sa dihang gidawat kini, ako nailhan ingong Sister Ines.

Bisan tuod ang kadaghanang bag-ohan hatagag hago nga trabaho diha sa kombento, ako may igong edukasyon mao nga nakatrabaho ingong magtutudlo sa elementarya. Duha ka tuig sa ulahi, sa Agosto 1963, ako nanumpa ug nahimong madre sa orden sa mga Madre sa San Giuseppe didto sa Aosta, Italya. Sa ulahi, ang kombento maoy naggasto sa akong dugang nga edukasyon pinaagi sa pagpadala kanako sa University of Maria Santissima Assunta didto sa Roma.

Sa pagpauli nako sa Aosta sa 1967 sa dihang natapos ang akong pagtungha sa Roma, ako nagsugod sa pagtudlo sa hayskul. Sa 1976, gitanyag kanako ang posisyon ingong direktor sa tunghaan. Bisan pag nagtudlo gihapon ko ug pipila ka klase, giasayn ako nga prinsipal sa tunghaan ug nahimong membro sa rehiyonal nga hunta sa tunghaan sa Valle d’Aosta.

Ang akong tim-os nga tinguha mao ang pagtabang sa mga kabos. Maluoy kaayo ko nila. Busa nag-organisar ako ug lainlaing katilingbanon nga mga programa, lakip ang usa alang sa pagtabang sa mga tawong masakiton nga gitagalan na lamang ang mga adlaw ug walay pamilya. Nagmugna usab ako ug programa sa pagtudlo sa mga anak sa mga lalin. Dugang pa, akoy nangitag trabaho ug puy-anan alang sa mga kabos ug nalangkit sa pagtaganag medikal nga tabang alang niadtong nanginahanglan. Naningkamot ako sa pagkinabuhi subay sa relihiyosong mga prinsipyo sa simbahan.

Nianang panahona, akong gituohan ang teolohiya sa Katoliko, lakip na ang mga pagtulon-an sa simbahan sama sa Trinidad, pagkadili-mamatay sa kalag, ug ang mga panglantaw sa Katoliko labot sa walay kataposang umaabot sa tawo. Nianang panahona, ang teolohiya sa Katoliko naglakip usab sa mga panglantaw sama sa pagtuo diha sa daghang relihiyon, nga nagpasabot sa pagdawat ug pag-ila sa ubang mga relihiyon.

Mga Butang nga Nakapatugaw Kanako

Apan, ang pipila ka kalihokan sulod sa Iglesya Katolika nakapatugaw kanako. Pananglitan, una pa sa bunyag ug kompirmasyon, ang mga ginikanan ug mga anak gidahom nga magtuon kon unsay kahulogan niining mga lakanga. Apan, ang kadaghanan dili gayod motambong sa mga klase, ug ang uban wala maningkamot sa pagtuon. Dugang pa, ang uban nga wala dawata alang sa bunyag ug kompirmasyon diha sa usa ka parokya moadto lang sa laing parokya ug magpabunyag ug magpakompirma didto. Alang nako, taphaw ug salingkapaw kana.

Usahay akong pangutan-on ang akong kaugalingon ug ang akong kaubang mga madre, “Di ba angay tang magsangyaw sa Ebanghelyo imbes nga magdedikar sa atong kaugalingon sa paghimo sa tanang matang sa ubang mga kalihokan?” “Kita nagsangyaw pinaagi sa pagbuhat ug maayo,” maoy gitubag kanako.

Dugang pa, dili ko makatuo nga kinahanglan kong moadto sa pari sa pagkumpisal sa akong mga sala. Ako nangatarongan nga ako angayng mangumpisal ngadto sa Diyos alang sa maong personal nga mga butang. Lain pa, nalisdan ako sa pagdawat sa ideya nga ang mga pag-ampo sag-ulohon ug sumaysumayon. Dili usab ako makatuo nga ang pari dili masayop. Paglabay sa panahon, ako nangatarongan nga magpadayon ako sa pagtuo sa akong kaugalingong gituohan bahin niining mga butanga ug magpadayon lang sa akong relihiyosong pagkinabuhi.

Tinguha Alang sa Kahibalo sa Bibliya

Ako duna gayoy dakong pagtahod sa Bibliya ug may dakong tinguha sa pagtuon niini. Matag higayon nga ako kinahanglang mohimog desisyon ug mobati nga nagkinahanglan sa tabang sa Diyos, akong basahon ang Bibliya. Bisan tuod wala gayod namo kini tun-i diha sa kombento, ako personal nga nagbasa niini. Ang teksto sa Isaias 43:10-12, diin si Jehova nga Diyos nag-ingong, “Kamo mao ang akong mga saksi,” dugay nang nakapaikag kanako. Apan, niadtong panahona wala nako masabti ang bug-os nga kahulogan nianang mga pulonga.

Sa nagtungha diha sa unibersidad sa Roma sa tungatunga sa katuigan sa 1960, mikuha ako ug upat-ka-tuig nga kurso sa teolohiya nga ang nangabaga sa gastos mao ang Batikano. Apan, wala maapil  ang Bibliya ingong usa sa mga librong pagatun-an. Human makabalik sa Aosta, daghan akog gitambongan nga ekumenikal nga mga komperensiya, bisan kadtong giesponsor sa lainlaing mga denominasyon ug dili-Katolikong mga organisasyon. Kini nga mga komperensiya nakapaikag ug samot kanako nga masayran ang mga pagtulon-an sa Bibliya. Dihay tumang kalibog taliwala sa mga grupo nga nangangkong nagtudlo bahin niining mao ra nga basahon!

Nagtuon ug Dugang Bahin sa Bibliya

Sa 1982, dihay usa ka Saksi ni Jehova nga miadto sa sentro diin ako naghimog buluhaton alang sa katilingban ug naningkamot nga makasugod sa pagpakigsulti kanako bahin sa Bibliya. Bisan pag puliki kaayo ako, ang ideya sa pagkat-on bahin sa Bibliya nakapaikag kanako. Busa miingon ko, “Palihog duawa ko sa akong tunghaan, ug kon libre ko, mag-estorya ta.”

Bisan tuod giduaw ako sa maong babaye, walay libreng panahon sa akong eskedyul. Dayon nasayran sa akong inahan nga siya dunay kanser, busa nagbakasyon ako sa pagtabang kaniya. Human siya mamatay sa Abril 1983, ako mibalik sa akong trabaho, apan niadtong tungora ako wala nay komunikasyon sa mga Saksi. Apan, wala madugay human niana, dihay laing Saksi, mga 25 anyos, nga miduaw sa paghisgot bahin sa Bibliya. Personal na nakong ginabasa ang basahong Pinadayag sa Bibliya. Busa gipangutana nako siya, “Kinsa ang 144,000 nga gihisgotan dinhi sa Pinadayag kapitulo 14?”

Gitudloan ako nga ang tanang maayong mga tawo moadto sa langit, ug busa dili nako masabtan ang lohika nga didto sa langit ibulag gikan sa uban ang 144,000. Nahibulong ko, ‘Kinsa kining 144,000? Unsay ilang buhaton?’ Nagbalikbalik kining mga pangutanaha diha sa akong hunahuna. Ang maong Saksi padayon nga naningkamot nga maabtan ako, apan kanunay akong wala sa balay mao nga wala gayod niya ako maabti.

Sa ngadtongadto, gihatag sa Saksi ang akong adres ngadto kang Marco, usa ka ansiyano diha sa iyang kongregasyon. Sa kataposan, sa Pebrero 1985, naabtan niya ako. Nag-estoryahanay kami sa pipila lang ka minuto, tungod kay puliki ako, apan nagtakda kami ug panahon nga mag-estorya pag-usab. Sa ulahi siya ug ang iyang asawa, si Lina, regular nga nagduaw kanako, nga nagtabang kanako nga masabtan ang Bibliya. Wala madugay, akong nasabtan nga ang pangunang mga pagtulon-an sa Katoliko sama sa Trinidad, pagkadili-mamatay sa kalag, ug nagkalayong impiyerno tin-aw nga dili binase sa Bibliya.

Nakig-uban sa mga Saksi

Sa dihang mitambong ako sa tigom sa mga Saksi ni Jehova sa ilang Kingdom Hall, dayag nga lahi kaayo ang pamaagi didto kon itandi sa Iglesya Katolika. Dili lang ang koro kondili ang tanan maoy mokanta. Dayon makigbahin sila sa tigom mismo. Nasabtan ko usab nga ang tibuok organisasyon gilangkoban ug “mga igsoong lalaki” ug “mga igsoong babaye.” Silang tanan may kahingawa gayod sa usag usa. Nakadayeg ako niini.

Nianang panahona, nagtambongan ako sa mga tigom nga nagsinina ingong madre. Ang uban klarong natandog sa pagkakita ug madre diha sa Kingdom Hall. Akong gibati ang kalipay ug katagbawan tungod kay gipalibotan ako sa gugma sa usa ka dakong pamilya. Dugang pa, samtang ako nagtuon, akong nasabtan nga ang daghang prinsipyo nga niana akong gibase ang akong kinabuhi dili diay nahiuyon sa Pulong sa Diyos. Pananglitan, ang Bibliya wala maghisgot nga ang mga alagad sa Diyos magsul-ob ug espesyal nga besti. Ang herarkiya ug pagpagawal sa simbahan lahi kaayo kay sa gitudlo sa Bibliya bahin sa mapaubsanong mga ansiyano nga nagapanguna diha sa kongregasyon.

Mora kog nagbarog sa huyonghuyong, nga dili lig-on ang akong gitumban. Daw dili katuohan nga sulod sa 24 ka tuig sayop ang akong gihuptang mga tinuohan. Apan, klaro nakong nailhan nga kining akong nadungog karon mao na ang kamatuoran sa Bibliya. Nahadlok ako sa paghunahuna nga sa edad nga 44, kinahanglang mag-usab ako sa akong kinabuhi ug magsugod na sab sa uno. Apan makaako ba ako nga magpadayon sa paglakaw nga magpiyong karon nga nakita ko na ang tinuod nga ginatudlo sa Bibliya?

Usa ka Hinungdanong Desisyon

Nasayod ko nga ang paghawa sa kombento magpasabot nga wala koy materyal nga kahinguhaan. Apan, nahinumdom ko sa mga pulong ni David nga ang matarong ‘dili gayod biyaan ni ang iyang kaliwat magpakilimos ug tinapay.’ (Salmo 37:25) Nahibalo ko nga mawad-an ko ug usa ka sukod sa pisikal nga seguridad, apan ako may pagsalig sa Diyos ug nangatarongan, ‘Unsa may angay nakong kahadlokan?’

Ang akong pamilya nagtuo nga nabuang ako. Bisan pag nakatugaw kana kanako, akong nahinumdoman  ang mga pulong ni Jesus: ‘Kadtong dunay labawng pagmahal sa amahan o sa inahan kay kanako dili-takos kanako.’ (Mateo 10:37) Sa samang higayon, ang yanong mga aksiyon sa mga Saksi nakapadasig ug nakapalig-on kanako. Samtang naglakaw ko sa dalan nga nagsinina sa besti sa madre, moduol gayod sila aron motimbaya nako. Kini nakapabati kanako nga mas nasuod sa panagsoonay ug nga ako bahin sa ilang pamilya.

Sa ulahi akong giduol ang Madre Superyora ug gipatin-aw kon nganong nakadesisyon ko nga mohawa sa kombento. Bisan pag mitanyag ako sa pagpakita kaniya diha sa Bibliya kon nganong mao kini ang akong desisyon, dili siya maminaw, nga nag-ingon: “Kon duna man ugaling koy gustong masabtan diha sa Bibliya, ang akong pangutan-on mao ang eksperto sa Bibliya!”

Ang Iglesya Katolika nakurat sa akong desisyon. Ila akong giingnan nga imoral ug nalisoag pangisip. Apan, kadtong nakaila kanako nahibalo nga bakak ang maong mga akusasyon. Ang mga tawong akong nakauban sa trabaho lainlain ug reaksiyon. Gitan-aw sa pipila ang akong gihimo ingong usa ka buhat sa kaisog. Ang uban nasakitan, nga nagtuo nga sayop ang akong gipiling dalan. Ang uban naluoy pa gani nako.

Sa Hulyo 4, 1985, ako mihawa sa Iglesya Katolika. Kay nahibalo kon giunsa pagtratar kadtong uban nga mihawa, nabalaka ang mga Saksi sa akong seguridad ug ila akong gitagoan sa mga usa ka bulan. Ila akong hapiton alang sa mga tigom ug dayon ihatod ngadto sa akong gipuy-an. Wala ako magpakita hangtod nga mikalma ang mga kahimtang. Dayon, sa Agosto 1, 1985, ako nagsugod sa pagpakigbahin diha sa ministeryo uban sa mga Saksi ni Jehova.

Sa dihang mitambong ako ug Distritong Kombensiyon sa mga Saksi ni Jehova sa ulahing bahin sa maong bulan sa Agosto, nahibaloan sa mga tigbalita nga mihawa na ako sa simbahan ug ilang gipatik ang akong estorya. Sa nabawtismohan ako sa ulahi sa Disyembre 14, 1985, ang lokal nga estasyon sa telebisyon ug mantalaan nagtuo nga talagsaon kaayo kini mao nga gipatik na sab nila ang estorya, nga gipanegurong ang tanan nahibalo sa akong gihimo.

Paghawa nako sa kombento, wala koy bisag usa ka dako. Ako walay trabaho, walay balay, ug walay pensiyon. Busa sulod sa mga usa ka tuig, ang akong trabaho maoy pag-atiman sa usa ka tawong paralisado. Sa Hulyo 1986, nagpayunir ako, nga maoy pagtawag sa bug-os-panahong mga ministro sa  mga Saksi ni Jehova. Mibalhin ako ngadto sa usa ka lugar diin dihay gamay, bag-o pang natukod nga kongregasyon. Nagtudlo ako didto ug mga leksiyon sa pinulongan ug uban pang mga leksiyon sa pribadong paagi, sa ingon akong napahimuslan ang akong edukasyon. Tungod niini nakapailin-ilin ako sa akong eskedyul.

Pag-alagad Diha sa Langyawng Teritoryo

Karon nga nakakat-on na ako sa kamatuoran sa Bibliya, buot nakong ipaambit kini sa daghang tawo kutob sa mahimo. Kay makasulti man akog Pranses, naghunahuna ako sa pag-alagad sa usa ka nasod sa Aprika diin Pranses ang pinulongan. Apan niadtong 1992, ang mga Saksi ni Jehova legal nga giila diha sa silingang nasod sa Albania. Sa hinapos nianang tuiga, usa ka gamayng grupo sa mga payunir gikan sa Italya ang giasayn didto. Apil kanila mao si Mario ug Cristina Fazio gikan sa akong kongregasyon. Ila akong gidapit sa pagduaw kanila ug sa pagkonsiderar sa posibilidad nga mag-alagad sa Albania. Busa human sa pagpamalandong ug maayo ug pag-ampo, sa edad nga 52 anyos, gibiyaan na usab nako ang medyo may-seguridad nako nga kahimtang ug nahiadto sa lahi kaayong palibot.

Kadto maoy Marso 1993. Pag-abot nako nakita dayon nako nga bisag dili ako layo gikan sa akong yutang natawhan, ako naa sa lahi kaayong kalibotan. Ang mga tawo magbaktas bisag asa sila moadto, ug ang ilang sinultihan maoy Albanian, usa ka pinulongan nga dili gayod nako masabtan. Ang nasod naghimog dagko kaayong mga kausaban, nga gisulayan ang lainlaing politikanhong mga sistema. Apan, ang mga tawo giuhaw sa kamatuoran sa Bibliya, ug gusto gayod nilang magbasa ug magtuon. Ang mga estudyante sa Bibliya kusog kaayong miuswag sa espirituwal, ug nakapalipay kini sa akong kasingkasing, nga nakatabang kanako nga makapasibo ngadto niining bag-ong palibot.

Sa pag-abot nako sa Tiranë, ang kaulohang siyudad, sa 1993, usa lang ang kongregasyon sa Albania ug diha ray kapig diyutay sa 100 ka Saksi nga nagkatag sa nasod. Nianang bulana, sa unang espesyal nga adlaw nga asembliya nga gihimo sa Tiranë, 585 ang mitambong ug 42 ang nabawtismohan. Bisan tuod wala koy nasabtan, makapatandog ang pagpaminaw sa pag-awit sa mga Saksi ug ang pagkakita nga sila namati pag-ayo. Sa Abril gisaulog ang Memoryal sa kamatayon ni Jesu-Kristo, ug 1,318 ang mitambong! Sukad niadto, kusog kaayo ang pag-uswag sa Kristohanong kalihokan sa Albania.

Kaniadto dungawon nako ang Tiranë gikan sa akong balkonahe diha sa ikaupat nga andana ug maghunahuna, ‘Kanus-a kaha namo maabot kining tanang tawo?’ Giseguro ni Jehova nga Diyos nga mahitabo kana. Karon duna nay 23 ka kongregasyon sa mga Saksi ni Jehova sa Tiranë. Sa tibuok nasod, dunay 68 ka kongregasyon ug mga 22 ka grupo, nga may 2,846 ka Saksi. Kusog kaayo ang pag-uswag sulod lang sa pipila ka tuig! Ug dihay 12,795 nga mitambong sa Memoryal sa 2002!

Niining milabayng napulo ka tuig sa Albania, usa ka dakong pribilehiyo nako nga makatabang sa labing menos 40 ka tawo nga mabawtismohan. Daghan kanila nag-alagad karon ingong mga payunir ug diha sa ubang mga natad sa bug-os-panahong pag-alagad. Latas sa katuigan, unom ka grupo sa Italyanong mga payunir ang giasayn sa pagtabang sa buluhaton sa Albania. Tulo ka bulan nga kurso sa pagtuon sa pinulongan ang gitakda alang sa matag grupo, ug nakadawat ako ug imbitasyon nga maoy magtudlo sa kataposang upat ka klase.

Sa dihang nasayran sa akong mga higala ang akong desisyon nga mohawa sa simbahan, grabe kaayo ang ilang reaksiyon. Apan, sa paglabay sa daghang tuig nalukmay sila, tungod kay ilang nakita nga ako kalmado ug malinawon. Makapalipay, ang akong pamilya, lakip na ang akong 93-anyos nga iyaan nga madre gihapon, mas mapaluyohon na usab.

Sukad nga akong nailhan si Jehova, siya nag-atiman kanako latas sa daghan kaayong lainlain nga mga kahimtang! Iya akong gitultolan ngadto sa iyang organisasyon. Kon akong hunahunaon ang nangagi, akong mahinumdoman ang akong tinguha sa pagtabang sa mga kabos, hinikawan, ug mga pobre ug ang akong pangandoy nga bug-os nga magmapuliki sa pag-alagad sa Diyos. Mao nga nagpasalamat ako kang Jehova, kay gipaneguro niya nga matagbaw ang akong espirituwal nga kauhaw.

[Hulagway sa panid 21]

Ang pamilyang taga-Albania nga akong gitun-an sa Bibliya. Onse ang nabawtismohan

[Hulagway sa panid 21]

Kadaghanan niining mga kababayen-an nga akong gitun-an sa Bibliya sa Albania nag-alagad na karon diha sa bug-os-panahong ministeryo