Ang Hunahuna sa Bibliya

Ang Hipnotismo ba Alang sa mga Kristohanon?

“Walay makaplagan diha kanimo nga bisan kinsang . . . tigpangdaot.”​—DEUTERONOMIO 18:​10, 11.

ANG hipnotismo maoy ulohan nga gilantugian pag-ayo. * Bisan ang mga eksperto sa maong natad nalisdan sa pagpatin-aw niini. Kasagaran ang hypnosis gisabot ingong nabag-o nga kahimtang sa kaamgohan, o pagkapunaw. Apan, mas interesado ang kadaghanang tawo sa mahimo sa hipnotismo kay sa kon unsa kini.

Sa di pa dugayng katuigan kasagaran na nga ang mga propesyonal labot sa panglawas diha sa pipila ka nasod morekomendar sa hipnotismo ingong tambal. Pananglitan, ang magasing Psychology Today nag-ingon: “Ang pagtambal sa sakit pinaagi sa hipnotismo makaayo sa mga labad sa ulo, makapahupay sa kasakit sa pagbati, makatabang kanimo sa pag-undang sa pagtabako, makapuli sa anestesya, ug makapaarang-arang sa mga batasan sa pagtuon​—nga ang tanan walay segundaryong mga epekto.” Sa laing bahin, daghan ang naglangkit sa hipnotismo sa espiritismo ug sa okulto.

Unsay panglantaw sa Bibliya? Siyempre, ang Bibliya dili teksbok labot sa panglawas, ug wala kini magkomento nga direkta bahin sa hipnotismo. Apan ang mga prinsipyo nga makita diha sa Pulong sa Diyos makatabang kanato sa pagtino sa panglantaw sa Diyos.

Hipnotismo ug Okultismo​—Duna bay Kalabotan?

Ang pangangkon ba nga ang hipnotismo nalangkit sa okulto usa lamang ka mugna sa handurawan sa  usa? Ang dili tinuod nga mga sugilanon diha sa mga salida sa sine ug mga nobela mahimong nagpalambo sa maong ideya, apan ang kalabotan tali sa hipnotismo ug espiritismo dunay tinuod nga pasukaranan. Mahitungod sa hipnotismo, ang Encyclopedia of Occultism and Parapsychology nagsaysay: “Ang kasaysayan niini nalambigit pag-ayo sa okultismo.” Ang relihiyosong pagkapunaw, nga nahimo nang bahin sa pamarang ug salamangka latas sa kasaysayan, kasagarang gilantaw ingong matang sa hypnosis. Dugang pa, ang mga pari sa karaang Ehipto ug Gresya nagpahinabo ug usa ka matang sa gilamat nga kahimtang sa dihang misulay sa pagtambal sa mga balatian sa ngalan sa ilang bakak nga mga diyos.

Ang gikutlo sa ibabaw nga ensiklopedia nag-ingon: “Bisan karon kadaghanan sa panglamat giisip ingong ‘Espirituwalismo.’” Bisan tuod lisod ang pagtino kon sa unsang gilapdon ang lainlaing matang sa hipnotismo nalangkit sa okulto, ang kamatuoran mao nga ang Diyos klarong nagsaway sa tanang matang sa espiritismo. (Deuteronomio 18:9-12; Pinadayag 21:8) Busa, dili mahimong ibalewala sa mga Kristohanon ang dili-kasulatanhong kinaiyahan sa hipnotismo.

Ang Epekto Diha sa Panggawi

Komosta ang epekto sa hypnosis diha sa hunahuna ug panggawi sa usa ka tawo? Duna bay mga kapeligrohan nga nalangkit? Ang usa ka tinuod nga gikabalak-an mao nga samtang gilamat ang usa ka tawo dili kaayo siya makakontrolar sa iyang panggawi. Ang mga maglalamat sa entablado naggamit niining kinaiyaha, nga nagpugos sa mga boluntaryo sa pagbuhat sa mga butang nga dili nila kasagarang buhaton, nga mora pa ganig hubog tan-awon.

Ang The Encyclopedia Americana nag-ingon bahin niining publikong mga pagpasundayag sa hypnosis: “Ang tawo nga gilamat basin dali rang madala bisan sa dili direktang mga sugyot, siya basin dali rang madala sa kasagarang gitago pag-ayong mga agda sa kinaiya nga nagpahipi sa bahin sa kaisipan sa tawo nga wala maamgohi, ug samtang gilamat mobati tingali siya nga ang tanang katilingbanon ug personal nga mga limitasyon sa iyang panggawi gikuha na.” Ang Collier’s Encyclopedia nag-ingon: “Ang tawong gilamat bug-os nga magtagad sa iyang mga katakos, nga tungod niana mamati siya pag-ayo sa mga sugyot sa maglalamat ug mokooperar sa pagtuman sa maong mga sugyot.”

Kini ba dili-makadaot paminawon? Maalamon ba alang sa usa ka matuod nga Kristohanon nga tugotan ang uban nga moimpluwensiya sa iyang hunahuna pinaagi sa malamatong mga sugyot? Supak kini sa tambag ni apostol Pablo: “Itugyan ang inyong mga lawas nga usa ka halad nga buhi, balaan, dalawaton sa Diyos, usa ka sagradong pag-alagad uban sa inyong gahom sa pagpangatarongan. Ug hunong na sa pagpaumol sumala niining sistemaha sa mga butang, kondili mag-usab kamo pinaagi sa pagbag-o sa inyong hunahuna, aron inyong ikapamatuod sa inyong kaugalingon ang maayo ug dalawaton ug hingpit nga kabubut-on sa Diyos.”​—Roma 12:​1, 2.

Ang usa ba ka Kristohanon ‘makahupot ug maayong tanlag,’ kon tugotan niya ang iyang kaugalingon nga mahimutang sa kahimtang diin dili niya bug-os nga makontrolar ang iyang mga hunahuna o mga tinguha o bisan ang iyang mga lihok? (1 Pedro 3:16) Ang Bibliya nagtambag: “Ang matag usa kaninyo kinahanglang mahibalo kon unsaon paghupot sa iyang kaugalingong sudlanan diha sa kabalaan ug kadungganan.” (1 Tesalonica 4:4) Klaro nga ang panglamat makababag sa katakos sa usa sa pagsunod sa maong tambag.

Paglaom Alang sa Hingpit nga Panglawas

Tungod sa gihisgotan sa ibabaw nga mga prinsipyo sa Bibliya, ang mga Saksi ni Jehova maglikay sa mga pamaagi nga naglangkit sa panglamat o paglamat sa kaugalingon. Ilang gisunod ang sugo diha sa Deuteronomio 18:​10, 11: “Walay makaplagan diha kanimo nga bisan kinsang . . . tigpangdaot.” Alang niadtong mga masakiton, dunay daghang ubang mga paagi sa pagtambal diin dili maladlad ang usa sa mga kapeligrohan sa okultismo o dili magtugot sa hunahuna sa usa nga maniobrahon sa uban.

Pinaagi sa paglikay sa mga buhat nga supak sa mga prinsipyo sa Bibliya, ang mga Kristohanon may paglaom nga mabuhi sa walay kataposan diha sa matarong nga bag-ong kalibotan sa Diyos. Unya ang katawhan makapahimulos ug hingpit nga kahimsog sa panglawas ug hunahuna nga dili mogamit ug hipnotismo.​—Pinadayag 21:​3, 4.

[Footnote]