Gikan sa Among mga Magbabasa

Paghatag ug mga Hinabang Usa kini ka mubong sulat sa pagpahibalo kaninyo nga nalingaw kaayo ako sa artikulong “Pagpakita ug Gugma​—Usa ka Dugay ug Lisod nga Pagtaganag Hinabang.” (Nobyembre 22, 2002) Sa dihang misugod ang pagbaha sa Houston, Texas, sa Hunyo 2002, ang akong magulang nga lalaki didto sa ospital nakoma gumikan sa sakit sa kasingkasing. Ang iyang balay halos bug-os nga naguba sa baha. Apan ang among Kristohanong mga igsoon misugod sa pag-ayo sa iyang balay samtang nakoma pa siya​—nga nagtangtang sa nasuphan nga alpombra ug bungbong ug naghinlo sa iyang balay gikan sa mga kagaw. Ang ilang tabang nagtugot kanako sa pag-apong sa akong igsoon didto sa ospital. Sa ngadtongadto siya naulian sa panimuot. Ang gugma ug pagkamapasalamaton nga akong gibati alang kang Jehova ug sa iyang kahibulongang organisasyon dili gayod ikapahayag pinaagig usa ka mubong sulat.

P. H., Tinipong Bansa

Natukmod ako sa pagpahayag sa akong pasalamat alang sa talagsaong pribilehiyo nga makapakig-uban sa usa ka mahangawaon, mahigugmaon nga panag-igsoonay. Makaiikag kaayo ang pagkahibalo kon giunsa paghatag sa mga boluntaryo ang ilang panahon ug mga kahinguhaan aron sa pagtabang sa mga biktima sa baha. Usa gayod kana ka pagpasundayag sa Kristohanong gugma.

A. M., New Zealand

Relihiyosong Kagawasan May naghatag nako ug kopya sa Hunyo 22, 2002, nga gula sa Pagmata! nga may artikulong “Usa ka Dili-Mapihigong Gingharian sa Mapihigong Panahon.” Sanglit nakahibalo siya nga ako usa ka Unitarian, gibati niya nga interesado ako niana. Husto siya. Mieskuyla akog kolehiyo sa Tinipong Bansa ug personal kong nailaila si Dr. Earl Morse Wilbur (kinsa gikutlo diha sa artikulo). Nakatambong usab akog daghang pakigpulong bahin sa kasaysayan sa mga Unitarian. Apan dili gayod ako mangahas nga mosulay pagpatik ug usa ka malukpanon nga artikulo nga sama sa inyoha!

M. M., Czech Republic

Peligrong Matuk-an Diha sa “Gikan sa Among mga Magbabasa” nga seksiyon sa Nobyembre 22, 2002, nga gula, nakurat ako sa pagkabasa sa tubag ngadto sa magbabasa kinsa misulat nga ang mga bata peligrong matuk-an sa mga hot dog. Ang mga bata nameligro usab nga matuk-an sa mga karot!

A. R., Tinipong Bansa

Ang “Pagmata!” nagtubag: Mapasalamaton kami niini nga magbabasa tungod sa maong mga komento. Usa ka sulat-balita bahin sa pag-atiman sa bata nag-ingon: “Bisan tuod nasayran nga ang mga bata matuk-an sa hiniwa nga mansanas, hilaw nga mga karot, biskuwit ug popcorn, ang upat ka pagkaon nga nakaingon sa kadaghanang kamatayon mao ang mga hot dog, nut, gahing mga kendi ug ubas.” Bisan pa niana, nagpasidaan ang mga kawani sa pag-atiman sa panglawas nga ang mga karot mahimong peligroso gayod alang sa mga bata nga wala pay usa ka tuig ang edad.

Pag-imprenta ug Bibliya Salamat sa artikulong “Usa ka Dalangpanan Alang sa Pag-imprenta ug Bibliya.” (Septiyembre 8, 2002) Karong adlawa sayon ra kaayo alang kanato ang pagbaton ug Bibliya sa atong kaugalingong pinulongan nga malimtan nato ang mga sakripisyo nga gihimo kanhi sa mga tawo aron mabatonan kini. Ang pagbasa niining artikuloha nagpauswag sa akong pagpabili sa atong mahigugmaong langitnong Amahan ug sa iyang kahingawa nga mabatonan ang Bibliya sa tanang matinud-anog-kasingkasing nga mga tawo.

E. S., Brazil

Postpartum Depression Kinahanglan kong mosulat agig sanong sa artikulong “Nabuntog Nako ang Akong Pagpakigbisog sa ‘Postpartum Depression.’” (Hulyo 22, 2002) Lain usab ang akong gibati human matawo ang akong anak ug anaa kanako ang tanang pagbati nga gihubit sa inyong artikulo. Naulaw akong makig-estorya bahin niana sa uban. Nahadlok pa gani ako nga dili makasabot ang akong bana. Busa giluom ko na lang kini, nga wala gayod mahibalo kon unsay akong diperensiya. Pagkadako sa akong pasalamat kang Jehova ug kaninyo tungod niining maong tabang! Bisan tuod padayon tingali akong makasinatig depresyon matag karon ug unya, mas masayon na lang unya kanako ang pagsagubang niini.

F. L., Belarus

[Picture Credit Line sa panid 30]

Photo: Houston Chronicle