Gisulayan Nako ang Pag-alagad sa Duha ka Agalon

SUMALA SA GIASOY NI KEN PAYNE

Natawo ako sa 1938 ug gimatuto sa akong apohang lalaki diha sa usa ka ranso sa New Mexico, T.B.A. Kadto maoy 9,700 ka ektarya nga kasapaan ug kasagbotan diin makita sa likod niini ang kabukiran. Ang mga tingog nga akong mahinumdoman mao kadtong iya sa mga karnero, baka, ug kabayo maingon man ang tinagingting sa mga tahod diha sa botas sa mga kawboy. Usahay mamati ako sa paghuros sa hangin diha sa kasagbotan ug mamatikdan ang lahi, kusog nga pag-iyagak sa usa ka matang sa mga langgam nga tohil nga naglibot sa tangke sa tubig.

ANG mga impluwensiya diha sa kinabuhi sa usa ka tawo sa bata pa siya maoy dulot ug dumalayon. Kanunay kaming magkauban ni Lolo, kinsa makaasoy ug mga sugilanon bahin sa Kasadpan. Nakaila gani siya sa mga tawo nga kauban ni Billy the Kid, usa ka batan-ong malinapason sa balaod kinsa nahimong bantogan sa dihang nakapatay siya ug daghang tawo, nga natapos sa dihang namatay siya sa 1881 sa edad nga 21.

Ang akong mga ginikanan maoy mga Saksi ni Jehova, ug ikuyog ko nila sa pagsangyaw ngadto sa mingawng mga ranso ug yanong mga balay nga tisa diha sa walog sa Hondo. Kasagaran mogamit sila ug mga ponograpo ug mga rekording sa Bibliya sa tingog ni J. F. Rutherford, nga sa ngadtongadto natisok sa akong hunahuna. * Patokaron namo ang iyang mga pakigpulong alang sa tanang matang sa mga tawo​—mga ransero, Mexicanong mga mag-uuma, ug Nitibong mga Amerikano, sama sa Apache ug mga Pueblo. Malingaw ako sa buluhatong pagsangyaw sa kadalanan dala ang mga magasin​—pipila lang ka tawo ang mobalibad sa usa ka batang lalaki, bisan panahon sa gubat.

Oo, maayo ang akong pundasyon. Apan, napakyas ako sa pagpatalinghog sa pasidaan ni Jesus: “Walay usa nga mahimong ulipon sa duha ka agalon; kay mahimong dumtan niya ang usa ug higugmaon ang lain, o unongan niya ang usa ug tamayon ang lain. Dili kamo mahimong ulipon sa Diyos ug sa Bahandi.” (Mateo 6:24) Maayo untag makaingon ako nga maanindot ang akong bug-os-panahong ministeryo kaniadto. Apan ang usa ka impluwensiya sa bata pa ako, laing “agalon,” nakapatipas kanako gikan sa maong dalan, nga nagsugod sa dihang ako tres anyos pa. Unsay nahitabo?

Ang Pagpalupad ug Ayroplano Maoy Akong Gikaikagan Pag-ayo

Balik sa 1941 usa ka Piper Cub nga ayroplano milanding duol sa kamalig. Gigamit kadto sa pagpangitag mga coyote nga manukob sa among mga karnero.  Niadtong tungora, sa edad nga tres anyos, nakahukom ko nga gusto kong mahimong piloto. Milabay na ang panahon sa pagkabata, ug sa edad nga 17, mibiya ako sa balay ug nanarbaho diha sa usa ka erport sa Hobbs, New Mexico, nga manilhig sa mga salog sa mga grahean sa ayroplano ug magtrabaho diha sa mga ayroplano kapuli sa mga leksiyon sa pagpalupad ug ayroplano. Ang Kristohanong ministeryo nahimong segundaryo na lamang sa akong kinabuhi.

Naminyo ako sa edad nga 18, ug ngadtongadto ang akong asawa ug ako nakabaton ug tulo ka anak. Unsay akong panginabuhi? Pagpalupad ug mga ayroplano nga gigamit sa pag-espri ug igpapatayg dangan o agup-op, mga ayroplanong inabangan, ug mga ayroplano nga gigamit sa pagpangitag manunukob nga hayop maingon man ang pagtudlo sa pagpalupad ug ayroplano. Human sa unom ka tuig niana, misugod ako sa pagpalupad sa mga ayroplano sa Texas International Airlines, sa gawas sa Dallas, Texas. Mas milig-on ang akong kinabuhi, ug nag-alagad gani ako ingong ansiyano sa Kongregasyon sa Denton. Nagdumala usab ako ug ubay-ubayng mga panagtuon sa Bibliya, lakip na ang pagtuon uban sa usa ka kapitan sa ayroplano, iyang asawa, ug ilang pamilya, nga ang tanan midawat sa kamatuoran sa Bibliya.

Pagka-1973, nagpalupad ako ug mga propjet (mga ayroplano nga ang mga palabad gipatuyok sa turbina nga gipaandar sa gas) sulod sa tulo ka tuig, apan nag-anam ka wala ang akong interes sa dihang ang DC-3 wala na gamita. Sa pagkatinuod, gihandom gihapon nako ang New Mexico. Apan kon moundang ako sa pagpalupad ug ayroplano, unsay akong panginabuhi?

Ang Arte Maoy Akong Gikaikagan Pag-ayo

Sukad sa 1961, ingong pasatiempo, nagdibuho ako ug mga hulagway sa Amerikanhong Kasadpan, ug maayo ang halin niini. Busa miluwat ako sa kompaniya sa ayroplano ug mibalik sa New Mexico, ang yuta sa kalipay, sumala sa pagtawag niini. Apan, wala ako magpabiling timbang. Gitugotan nako ang hilig sa arte nga makapalinga kanako. Ang pagdibuho ug sa ulahi ang pagkulit, duyog sa partaym nga pagpalupad ug ayroplano, nakahurot sa tanan nakong panahon. Nagtrabaho ako tali sa 12 ug 18 ka oras kada adlaw. Tungod niini napasagdan nako ang akong pamilya ug ang akong Diyos. Unsay sunod nga nahitabo?

Nahugno ang akong kaminyoon, nga misangko sa diborsiyo. Mibalhin ako sa amihanan sa Montana ug naghuboghubog na lang. Ang dili-Kristohanon nga estilo sa kinabuhi nagtukmod kanako sa pagsubay sa binuang nga dalan nga gisubay sa anak nga mausikon sa ilustrasyon ni Jesus. (Lucas 15:11-32) Unya usa ka adlaw niana naamgohan nako nga wala akoy tinuod nga higala. Sa dihang makahimamat ako ug mga tawo nga nagmagul-anon, ako silang ingnon: “Pangitaa ang mga Saksi ni Jehova. Makatabang gayod sila kaninyo.” Ang tubag maoy: “Nan nganong dili man ka Saksi?” Kinahanglan dawaton nako nga ang usa dili mahimong Saksi ug magkinabuhi nga sama sa akong pagkinabuhi.

Sa kataposan, sa 1978, mibalik ako sa New Mexico ngadto sa kongregasyon diin ang mga Saksi nakaila nako. Kadto ang unang pag-adto nako sa Kingdom Hall human sa pipila ka tuig, ug ang akong nahimo mao ang paghilak. Pagkamaluluy-on ni Jehova kanako. Ang mga higala sa kongregasyon maluloton kaayo  ug mitabang kanako sa pagsubay pag-usab sa dalan ni Jehova.

Usa ka Bag-ong Kapikas ug Usa ka Bag-ong Sinugdanan

Sa 1980, naminyo ako kang Karen, usa ka maanyag nga Saksi nga akong nakaila sulod sa ubay-ubayng katuigan. May duha siya ka anak, si Jason ug Jonathan, sa iyang unang kaminyoon. Uban sa iyang dulot nga gugma kang Jehova, milig-on ang akong kinabuhi ug nakabaton kami ug duha pa ka buotan nga mga anak, si Ben ug Phillip. Apan ang kinabuhi dili hayahay. Ang trahedya anaa sa among unahan.

Nagtuon ako bahin sa arte ug migugol ug daghang oras sa pagtuon sa anatomiya sa tawo ug mananap​—ilabina nianang sa mga kabayo​—maingon man ang paghan-ay sa mga parte, proporsiyon, ug anggulo. Nagsugod ako sa pagkulit diha sa yutang-kulonon, ilabina sa mga dagway sa Karaang Kasadpan​—mga kabayo, mga Indian nga nangabayo, kawboy, ug usa pa gani ka karaang doktor nga nagsakay sa karwahe. Misugod ako sa paglampos. Busa nakahukom kami sa pag-abli ug galeriya. Gimugna ni Karen ang ngalang Mountain Trails Gallery.

Sa 1987 nakapalit kami ug galeriya sa Sedona, Arizona, ug mao kanay gingalan. Samtang si Karen nagdumala sa galeriya, nagpabilin ako sa balay nga nagtrabaho sa estudio ug nag-atiman sa mga anak. Apan, ang mga bata nangasakit, ug hinay ang kita. Nakahukom kami nga magbaylo ug puwesto aron si Karen makaatiman sa mga bata diha sa balay. Akong gidala ang akong yutang-kulonon ngadto sa tindahan ug misugod sa pagkulit atubangan gayod sa mga kliyente. Pagkadakong kausaban ang gipahinabo niana sa among negosyo!

Ang mga tawo nagsugod sa pagpangutana kanako bahin sa akong mga kinulit nga gihulma sa tumbaga. Samtang akong ipatin-aw kanila ang akong trabaho ug suginlan sila bahin sa karaang mga butang nga akong gigamit ingong sumbanan sa akong mga disenyo, ako silang hatagan ug leksiyon bahin sa kasaysayan sa Karaang Kasadpan uban ang mga ngalan, dapit, ug mga hitabo nga akong nakat-onan gikan sa akong pagsigeg basa. Ang mga tawo nagpakitag tinuod nga kaikag sa mga modelo nga akong gikulit, ug ang uban gustong magdeposito diha sa butang nga ilang nakita nga gikulit pa, sa tuyo nga bayran ang kulang sa dihang gihulma na kini sa tumbaga. Busa namugna ang ekspresyong “pagbaligya una pa mahulma.” Dihadiha ang kalamposan. Ang akong negosyo midako hangtod sa punto nga diha na kamiy tulo ka galeriya ug usa ka dakong tunawanan ug metal nga may 32 ka empleyado. Apan dakong bahin sa akong kusog ang nagugol diha niana! Naghunahuna mi ni Karen kon unsaon namo pagkalingkawas nianang maong walay-kataposang rutina. Nag-ampo kami bahin niana. Niining tungora ako ansiyano na sa kongregasyon ug nahibalo nga may mahimo pa ako alang kang Jehova.

Pag-alagad Pag-usab sa Usa ka Agalon

Sa 1996 ang among nagaduaw nga magtatan-aw sa sirkito miadto sa among kongregasyon ug mihangyo kanamo sa pagpaniudto uban kaniya. Sa wala pa gani kami mangaon, iya nang gipatungha ang wala gayod damha nga pangutana​—mahimo ba namong palandongon ang pagbalhin ngadto sa Navajo nga reserbasyon sa Indian aron sa pagtabang sa pagtukod sa bag-ong kongregasyon sa Chinle? Pagkadako nga hagit! Nakaduaw kami sa reserbasyon sa ubay-ubayng higayon ug nakatabang sa pagsangyaw diha sa pipila nianang hilit nga teritoryo, ug naghatag kini kanamo karon ug bag-ong tumong. Higayon na kini nga kami makalingkawas sa walay-kataposang rutina sa materyalismo ug makagugol ug dugang panahon alang kang Jehova ug sa iyang katawhan. Nahibalik kami sa pag-alagad sa usa ka agalon!

Laing ansiyano ug iyang pamilya, ang pamilyang Carusetta, nga suod namong mga higala, gidapit sa pagduyog kanamo niining buluhatona. Parehong gibaligya namo ang among haruhay nga mga balay ug mipalit ug mobile home nga among ikaparada diha sa reserbasyon. Gibaligya nako ang mga galeriya ug sa kataposan ang tunawanan ug metal. Gipayano namo ang among kinabuhi, ug may kahigayonan na kami sa pagpauswag sa among Kristohanong ministeryo.

Sa Oktubre 1996, ang bag-ong Kongregasyon sa Chinle nagpahigayon sa unang tigom. Sukad niadto, ang buluhatong pagsangyaw miuswag taliwala sa mga tawong Navajo, ug ang among kongregasyon dunay maayo kaayong mga payunir nga Navajo kinsa makasulti sa ilang pinulongan. Hinayhinay kaming nagtuon niining malisod nga pinulongan aron dawaton kami bisan pag dili kami Navajo. Nakakuha kami ug yuta ubos sa pagtugot sa Indian nga mga awtoridad ug nakatukod ug Kingdom Hall sa Chinle, nga gipahinungod sa Hunyo nianang tuiga.

Nahitabo ang Trahedya!

Sa Disyembre 1996, gidala ni Karen ang among mga anak nga lalaki sa Ruidoso, New Mexico, alang sa mubo nga pagduaw. Kinahanglang magpabilin ako sa Chinle. Handurawa ang among kakurat ug kasubo sa dihang ang among 14-anyos nga anak, si Ben, nabangga sa usa ka dakong bato samtang nag-eski ug namatay! Usa kini ka makapasubo kaayo nga pagsulay alang kanamong tanan. Ang paglaom sa pagkabanhaw nga anaa sa Bibliya ang nagpalig-on kanamo  latas niining maong trahedya. Dako usab nga tabang ang pagpaluyo sa among Kristohanong mga igsoon. Sa dihang gihimo namo ang pakigpulong sa serbisyo sa paglubong didto sa Kingdom Hall sa Sedona, diin kami nagpuyo sulod sa ubay-ubayng katuigan, ang mga silingan nakakita ug mas daghang tawo nga Navajo kay sa ilang nakita sukad. Ang mga igsoong lalaki ug babaye gikan sa reserbasyon nangadto sa habagatan aron sa pagpaluyo kanamo, nga 300 kilometros ang gilay-on.

Usa ka panalangin nga makita ang espirituwal nga pag-uswag sa manghod ni Ben nga si Phillip. Siya adunay maayong espirituwal nga mga tumong ug nakahatag kanamog dakong kalipay. Nakadumala siya ug ubay-ubayng mga pagtuon sa Bibliya, lakip na nianang sa usa ka magtutudlo. Apan kaming tanan nangandoy nga makita pag-usab si Ben sa bag-ong kalibotan nga gisaad ni Jehova.​—Job 14:​14, 15; Juan 5:​28, 29; Pinadayag 21:1-4.

Gipanalanginan kami ug mahigugmaon, matinabangon nga pamilya. Ang akong sinagop nga si Jonathan nag-alagad kang Jehova uban sa iyang asawa nga si Kenna, mao man usab ang akong kinamanghorang anak sa akong unang kaminyoon, si Chris, uban sa iyang asawa nga si Lorie. Ang among mga apo nga si Woodrow ug Jonah nagahatag ug mga pakigpulong ingong estudyante sa Teokratikanhong Tunghaan sa Ministeryo. Ang akong amahan namatay sa 1987, apan sa edad nga 84 ang akong inahan aktibo gihapong nag-alagad kang Jehova, maingon man ang akong igsoong si John, ug ang iyang asawa nga si Cherry.

Akong nakat-onan gikan sa kasinatian nga tinuod ang giingon ni Jesus: “Walay usa nga mahimong ulipon sa duha ka agalon . . . Dili kamo mahimong ulipon sa Diyos ug sa Bahandi.” Bisan karon ang arte nagkinahanglan ug dakong panahon ug pagtagad. Mao nga nakakat-on ako sa kahinungdanon sa pagpabiling timbang ug mabinantayon, aron nga ang akong arte dili na usab mahimong akong prioridad. Mas maayong buhaton ang gitambag ni apostol Pablo: “Akong hinigugmang mga igsoon, magmalig-on, dili matarog, nga kanunayng puliki diha sa buluhaton sa Ginoo, nga nahibalo nga ang inyong paghago dili makawang may kalabotan sa Ginoo.”​—1 Corinto 15:58.

[Footnote]

[Hulagway sa panid 18, 19]

Ang akong ayroplano sa 1996 sa Chinle

[Hulagway sa panid 19]

Usa ka kinulit nga gihulma sa tumbaga nga gitawag ug “Walay Panahon sa Paglangan”

[Hulagway sa panid 21]

Panagkatigom alang sa pagtuon sa Bibliya diin gitukod ang among Kingdom Hall

[Hulagway sa panid 21]

Uban sa akong asawa nga si Karen

[Hulagway sa panid 21]

Pagsangyaw diha sa kasagarang puy-anan sa Navajo