Butang nga Dili Mabanlas sa Bagyo

TINAMPO SA MAGSUSULAT SA PAGMATA! SA ALEMANYA, AUSTRIA, MEXICO, UG KOREA

SA TUIG 2002, nakaagom ang daghang nasod ug mga katalagman labot sa panahon. Ang Uropa naapektohan sa nagsunodsunod nga mga baha nga nakahatag ug kadaot. Sa ubang mga bahin sa yuta, ang Mexico gihampak sa kusog kaayong unos, ug ang Korea gibatibati sa bagyo. Bisan pag makapaguol kanang mga panghitaboa, kana nakapalig-on sa talikala sa gugma nga nagbugkos sa matuod nga mga Kristohanon.

Pagkatapos sa mga baha sa 2002 sa Uropa, ang chancellor kaniadto sa Kasadpang Alemanya nga si Helmut Schmidt gipangutana kon unsang matanga sa tabang ang gikinahanglan sa mga biktima. Siya mitubag: “Ang katawhan nagkinahanglag pagkaon ug puy-anan, sila nagkinahanglag kuwarta, ug sila nagkinahanglag espirituwal nga pag-atiman.” May dakong bahin ang mga Saksi ni Jehova sa paghatag sa pisikal ug espirituwal nga hinabang ngadto sa mga biktima sa bagyo. Tagda ang hinabang nga ilang gihimo sa Alemanya, Austria, Mexico, ug Korea.

Mga Tawong Nanabang sa Alemanya

Sa dihang nasayran ang kapeligrohan sa umaabot nga baha, daghang Saksi ni Jehova sa Alemanya miduyog sa mga paningkamot sa katawhan sa pagpalihay sa tubig sa baha. Matod sa 19-anyos nga si Kathleen, kinsa nagpuyo sa Dresden: “Dili mahimong ako maglingkod lang ug walay buhaton. Sa nadunggan ko nga ang pipila ka tawo nameligro nga mawad-an sa tanang butang, akong gibati nga kinahanglang mogawas ug motabang ko.”

Ang Alemang mga Saksi misugod sa pag-organisar sa ilang kaugalingon aron makahatag ug dinalian ug mapuslanong tabang. Kay mga Kristohanon, sila mibati nga obligado sa pagtabang ilabina sa ilang espirituwal nga mga igsoon. Apan sila nagpakita usab ug gugma sa ilang mga silingan. (Marcos 12:31) Busa ang kapin ug 2,000 ka boluntaryo gigrupo nga tag 8 ngadto sa 12 ka tawo, nga ang matag grupo giasayn sa usa ka espesipikong trabaho diha sa dapit nga apektado sa kalamidad. Sa sangang buhatan sa mga Saksi ni Jehova sa Selters, Alemanya, gireserba ang 13 ka linya sa telepono sa pagdawat sa libolibong tawag gikan sa mga tawong nangutana bahin sa kalamidad ug mitanyag ug hinabang.

Si Ronnie ug Dina maoy bug-os-panahong mga ministro sa mga Saksi ni Jehova, kinsa nagagugol  sa ilang panahon sa pagtabang sa mga higala ug mga silingan nga makakat-on sa mga kamatuoran sa Bibliya. Sa dihang nasayran nila ang nagsingabot nga tubig sa baha, miadto una sila sa sentro sa siyudad sa Dresden aron sa pagtabang sa dinaliang buluhaton sa pagpreserbar sa makasaysayanhong mga bilding niini. Pagkahubas sa baha, si Ronnie ug Dina miduyog sa ubang mga Saksi sa paghinlo sa Kingdom Hall sa Freital, nga gibahaan sa hugawng tubig. Unya ang grupo misugod sa pagtabang sa ilang mga silingan. Ang tag-iya sa usa ka restawran nga atbang sa tigomanan nakaginhawa ug luag sa dihang gikuha sa mga Saksi ang mga bato ug lapok gikan sa iyang silong nga kuwarto ug hawanan sa restawran.

Si Siegfried ug Hannelore nagpuyo sa Colmnitz, usa ka baryo nga mga 40 kilometros pahabagatan-silangan sa Dresden. Ang sapa nga naandang nag-agos sa baryo mitubo nga nahimong dakong baha, nga nagbanlas sa ilang balay ug tanaman. Pagkahubas sa tubig, ang mga silingan natingala sa pagkakita ug mga 30 ka Saksi, nga mga estranghero niadtong dapita, nga nangabot sa pagtabang sa paghinlo sa balay ni Siegfried ug Hannelore. Dayon, ang grupo misugod sa paghinlo sa mga tanaman sa silingan. Daghang tagabaryo nangutana kon unsay nagtukmod kanila sa pagbiyaheg 100 kilometros aron sa pagtabang sa mga tawo nga dili gayod nila kaila. Busa ang mga Saksi nakahatag ug espirituwal nga pagpalig-on sa mga biktima sa Colmnitz.

Ang kasikbit nga mga dapit sa lungsod sa Wittenberg giagian usab sa baha. Usa ka magtiayong Saksi nga ginganlag Frank ug Elfriede nagtrabaho ug pipila ka adlaw kauban sa ilang mga silingan  sa wala pa ang baha, nga gipuno ug balas ang mga sako ug dayon gitapok aron palig-onon ang mga tampi sa suba. Sa paghubas sa baha, si Frank ug Elfriede miduaw sa mga biktima, nga nagdalag pagkaon ug naghupay kanila. Si Frank nahinumdom: “Usa ka babaye nga among giduaw dili makatuo nga kami, nga mga estranghero, nagdalag pagkaon kaniya nga wala magpabayad. Siya miingon kanamo nga walay usa gikan sa iyang simbahan ang miduaw kaniya. Ug ang organisasyong nagdalag mga pagkaon kaniya nagpabayad kaniya sa matag higayon. Ang mga tawo natingala sa pagkakita sa mga Saksi ni Jehova nga nagdalag init nga pagkaon inay literatura sa Bibliya.”

Austria​—Milihok Dayon Human sa Katalagman

Gidaot usab sa tubig sa baha ang kasikbit nga Austria. Tulo ka komite ang gitukod sa pagdumala sa mga hinabang. Giuna ang pag-ayo sa tulo ka Kingdom Hall nga grabe ang pagkaguba. Gawas pa, taliwala sa mga Saksi, duolag 100 ka pamilya ang naapektohan sa baha, ug 50 ka balay ang gilunopan. Ang pipila nawad-an sa tanang butang gawas lang sa sinina nga tapot sa ilang lawas. Ang sangang buhatan sa Austria nagpahibalo sa lokal nga mga kongregasyon bahin sa maong kahimtang, ug naghikay sa usa ka pondo alang sa hinabang. Pagka-Septiyembre kapin ug $34,000 ang naamot.

Usa ka inahan misulat: “Ang akong otso-anyos nga anak lalaki daginotan kaayo ug nakatigom ug mga $14. Bisan pa niana, sa dihang siya nakadungog nga ang pipila sa atong mga igsoon nawad-an sa tanan nilang butang, siya kinabubut-ong miamot sa tanan niyang tinigom ngadto sa pondo alang sa katalagman.”

Ubos sa pagdumala sa mga Regional Building Committee (RBC), nga kasagarang nagdumala sa pagpanukod ug mga Kingdom Hall sa mga Saksi ni Jehova, ang mga tem giorganisar aron makatabang sa pag-ayo sa mga balay nga naguba gumikan sa baha. “Angayng ibalita sa mga mantalaan ang inyong ginabuhat dinhi,” miingon ang usa ka tumatan-aw. Nausab ang panglantaw sa pipila ka tawo bahin sa mga Saksi ni Jehova. “Kaniadto,” matod sa usa ka inahang Saksi, “ang akong mga anak, kinsa dili mga Saksi, dili gayod mamati kanako sa dihang mosulay ako sa pagpadayag kanila sa akong pagtuo. Apan sa pagkakaron sila mamati na sa unang higayon!”

Dihay gihimo usab aron matabangan ang daghang dili mga Saksi. Pananglitan, usa ka babaye  natandog gayod sa dihang usa sa mga Saksi miadto sa iyang balay sa alas 7:30 s.b. ug nangutana kon siya nagkinahanglan ba ug tabang. Ang babaye kinahanglang ibakwet, kay ang tubig nagsugod na sa pagsulod sa iyang balay. Sa iyang pagbalik, hinunoa, nakakita siyag mubong sulat gikan sa mga Saksi diha sa ganghaan sa iyang tanaman. Kini ang mabasa: “Kon nagkinahanglan ka ug tabang, pahibaloa dayon kami.” Gitabangan siya sa mga Saksi sa pagkuha sa lapok ug mga hugaw gikan sa iyang balay ug propiedad.

Ang usa ka tem sa 100 ka Saksi miadto sa lungsod sa Au sa pagtabang sa mga Saksi didto ug sa ilang mga silingan. Ang mga lider sa tem miduaw sa mga balay nga nangutana sa mga molupyo kon nagkinahanglan ba silag tabang. Ang mga tawo natingala sa pagkakita nga ang mga Saksi nangabot nga nagdalag mga gamit sa pagkuha sa tubig ug paghinlo, sama sa mga bomba, mga silhig, ug mga pala. Ang trabaho nga kasagarang humanon ug usa ka semana sa mga tag-iya sa balay nahuman sa pipila lang ka oras. Nagtan-aw ang mga tawo nga may luha nga nanglugmaw sa ilang mga mata.

Mga 400 ka Saksi nga tagadidto miduyog sa pagpanghinabang​—nga kasagarang walay hunong sa pagtrabaho adlaw ug gabii. Alang sa mga tumatan-aw, kadto maoy usa ka dakong pamatuod sa gahom sa matuod nga Kristiyanidad.

Gibatibati sa Bagyong Isidore ang Mexico

Si Isidore misugod ingong tropikanhong bagyo sa amihanan sa Venezuela. Sa Septiyembre 22, 2002, si Isidore midabodabo sa Yucatán Peninsula sa Mexico isip kategoriya 3 nga bagyo. Uban sa hangin nga 190 kilometros kada oras ug sa kusog nga ulan, kadto nagpahinabog usa sa kinagrabehang kadaot sa kasaysayan sa mga estado sa Yucatán ug Campeche sa Mexico ingon man diyutayng kadaot sa estado sa Quintana Roo. Sa Yucatán lamang, grabe ang pagkaguba sa mga 95,000 ka balay, nga apektado ang mga 500,000 ka tawo.

Dako kaayo ug nahimo ang mga Saksi ni Jehova sa pagpanghinabang sa Yucatán nga ang usa ka ulohan sa mantalaan sa amihanang Mexico nagpahayag: “Mga Saksi ni Jehova Mitabang.” Ang usa ka komite sa panghinabang giporma nga abante sa pag-abot sa bagyo. Ang emerhensiyang mga kahikayan gihimo aron may mapuy-an ang ginatos ka Saksi nga tagadidto. Ang mga kongregasyon sa duol mihatag ug salapi alang sa emerhensiya. Ang mga besti, tambal, ug kapin sa 22 ka toneladang pagkaon giapod-apod ngadto sa mga naluwas sa bagyo, apil sa daghang dili-Saksi. Ang lokal nga mga ansiyano giasayn sa pagduaw ug pagpalig-on sa mga biktima sa bagyong Isidore.

Sa paghapak sa bagyo, ang lokal nga mga komite sa pagpanghinabang giporma sa pagtabang sa pagpangita sa nangawalang mga Saksi.  Ang ubay-ubay nakit-an nga didto sa lasang ug sa ubang mga dapit sulod sa tulo ka adlaw nga walay pagkaon o tubig nga mainom. Sa pipila ka dapit ang tubig mitubo pag-ayo nga kadto milapaw sa mga poste sa suga! Busa, dihay nakuhang demotor nga mga bangka ug kini gigamit sa pagpangita sa mga biktima, sa pagpakaon, ug pagdala kanila ngadto sa dili peligrosong mga dapit.

Ang lokal nga mga opisyales nagpahulam ug mga bangka ug ubang kasangkapan ngadto sa mga Saksi, kinsa mitanyag nga manghatag ug hinabang didto sa mga dapit nga pipila lang ang gustong moadto. Sa sinugdan, usa ka opisyal sa kasundalohan dili mosugot nga ang mga Saksi mohimo sa peligrosong pagpangita. Apan, sa iyang nakita nga desidido gayod sila, siya miingon: “Kombinsido ako nga kamo moadto pinaagig mga helikopter, kon gikinahanglan, aron sa pagluwas sa inyong katawhan. Gamita ang among mga sakyanan aron makaadto kamo bisan diin ninyo gusto.”

Usa ka tag-iyag tindahan natingala kon nganong ang pipila ka Saksi namalit ug daghan kaayong binotelyang tubig. Gipatin-aw nila nga alang kadto sa ilang espirituwal nga kaigsoonan nga nagkinahanglan niadto. Ang lalaki midesidir sa paghatag kanila sa tanang binotelyang tubig nga diha kaniya​—nga libre. Pagkasunod adlaw siya midonar ug dugang tubig​—nga ubay-ubay gayod. Sa laing tindahan, usa ka pumapalit nangutana sa mga Saksi kon nganong namalit silag daghan kaayong pagkaon. Sa dihang iyang nadunggan nga alang kadto sa mga biktima sa baha, siya mihatag ug amot aron makapalit ug dugang pa.

Bisan pag halos 3,500 ka pamilyang Saksi ang napildihan ug materyal nga mga butang gumikan kang Isidore, wala gayoy usa ka Saksi ni Jehova ang nawala o namatay. Bisan pa niana, tungod kay 331 ka balay sa mga Saksi ang naguba o nadaot, gikinahanglan ang programa sa pagpanukod pag-usab. Ang mga Saksi nga may kasinatian sa pagpanukod miduaw sa matag balay ug Kingdom Hall aron mabanabana ang kadaot. Sa pagkakaron, mga 258 ka balay ang naayo ug 172 ka balay ang natukod isip kapuli. Gawas pa, ang 19 ka naguba nga mga Kingdom Hall ginaayo pa.

Usa ka ansiyano sa usa ka kongregasyon sa estado sa Yucatán natandog sa pag-ingon: “Nabasahan nako sa atong mga basahon ang bahin sa panghinabang nga gihimo diha sa ubang mga nasod. Apan, lahi gayod kaayo nga makasinati niini mismo. Ang akong pagtuo ingon man ang pagtuo sa daghang igsoon napalig-on sa pagkakita kon unsa ka dali ug mahunahunaon sa organisasyon ni Jehova ug sa atong minahal nga mga igsoon sa pagtabang kanamo.”

Usa ka babaye miingon: “Malipay unta ako kon ang akong simbahan naghatag ug tabang sama sa gibuhat ninyong mga Saksi.” Ug ang laing babaye, kinsa giluwas sa mga Saksi, miingon: “Tungod sa mga Saksi ni Jehova, kami naluwas. Ila kaming gipakitaan ug gugma, nga nagtahan sa ilang kinabuhi sa pagluwas kanamo sa dihang gibahaan ang among balay.”

Giagian ug Bagyo ang Korea

Sa Agosto 31 ug Septiyembre 1, 2002, ang Bagyong Rusa nakahatag ug dakong kadaot sa dakong bahin sa Korea. Si Song-pil Cho, nga usa ka ansiyano sa kongregasyon miingon: “Mora kag naligo sa shower. Ug walay hunong ang pagbunok sa ulan.” Kapin sa 34 pulgadas nga ulan ang mibundak nga walay 24 oras​—ang kinakusgang pag-ulan sa usa ka adlaw nga nahitabo sukad didto.

Sumala pa sa The Korea Herald, sa tibuok nasod 28,100 ka balay ug 85,000 ka ektaryang kaumahan ang nalubog sa tubig. Duolan sa 70,000 ka tawo ang napugos sa pagbakwet. Ang bagyo nakakalas ug 301,000 ka binuhi, nakalunod ug 126 ka barko, ug nakatumba ug ginatos ka poste sa koryente. Kapin sa 180 ka tawo ang gikataho nga namatay o nangawala. Lakip kanila mao ang duha ka Saksi ni Jehova.

Sama sa Uropa ug Mexico, ang mga Saksi ni Jehova milihok dayon. Ang mga kontribusyon sa mga Saksi miabot gikan sa tibuok nasod. Lakip niini mao ang mga besti, habol, ug ubang mga kinahanglanon. Bisan pa, may pipila ka sakop sa kongregasyon ang nagpuyo sa mga dapit nga dili kaadtoan ug nahilit. Ang mga dalan ug mga taytayan nangaguba. Walay serbisyo sa koryente o telepono. Busa giorganisar ang mga grupo sa pagbaktas ug sa paghatod sa gikinahanglang tabang. Si Song-pil Cho, nga nagtrabaho apil sa usa sa mga grupo nga nanghinabang, naghubit sa usa ka lugar nga ilang gitabangan: “Pito ka taytayan ug dakong seksiyon sa dalan ang nabanlas. Sa dihang miabot kami sa lungsod sa kataposan, nagkatag ang nadaot ug nangagubang mga balay. Baho kaayo ang palibot, ug nagpasad ang patayng mga mananap. Apan nalipay kaayo kami sa dihang nahibalag namo ang among unom ka Kristohanong mga igsoon!  Napildihan sila sa ilang materyal nga mga kabtangan, apan silang tanan wala maunsa.”

Sa pagkatinuod, andam ang mga Saksi ni Jehova alang niini nga kalamidad. Sanglit sa ting-ulan naandan na man ang pagbaha, ang ilang RBC sa dapit sa Seoul nakahikay na ug mga pagpanghinabang sa umaabot nga mga kalamidad. Sugod sa 1997, kini naghimo ug tinuig nga mga sesyon aron ang mga boluntaryo andam sa pagtabang kon may motunghang emerhensiya.

Sa Septiyembre 2, ang RBC nga mga boluntaryo sa pagpanghinabang miabot sa sidlakang siyudad sa Kangnŭng ug gihimong hedkuwarter ang lokal nga Assembly Hall sa mga Saksi ni Jehova. Unsa ang unang gihatagan ug pagtagad? Paghatod ug hinlong tubig ngadto sa mga naluwas. Kon may mga pagbaha, ang mga tubo sa tubig kasagaran nga madaot; ang tubig sa baha hugaw kaayo. Ang RBC nag-andam ug dagkong mga trak nga may tangke nga punog tubig aron ikapadala ngadto sa mga dapit nga naapektohan.

Sa dihang mihunob na ang tubig, ang tanan natabonan sa baho ug baga nga lapok. Bisan pa niana, usa ka epektibong pamaagi sa paghinlo gihimo. Sanglit gama man sa semento ang halos tanang balay sa maong dapit, kini gilimpiyohan pinaagi sa pagtangtang sa mga wall paper ug linolyum ug sa pagpasirit ug tubig.

Tungod sa baha halos tanang kasangkapan nga dekoryente dili magamit. Apan, kon sulod sa pipila ka adlaw ang kasangkapan sama sa repridyeretor ug mga boiler bungkagon sa kuwalipikadong elektrisyan, ug dayon limpiyohan pag-ayo, paughon, ug iasembol pag-usab, sa kadaghanang kaso kini miandar pag-usab. Ang RBC giorganisar nga maoy mohimo sa trabaho. Ang mga boiler nga dili na kinahanglang ilisan gigamit sa pagpauga sa balay. Kana nga proseso moabot ug duha ngadto sa tulo ka semana.

Ang mga besti ug mga habol nga nabasa sa baha kinahanglang labhan ug maayo sulod sa pipila ka adlaw aron magamit pag-usab. Ang mga boluntaryo gikan sa usa ka lokal nga kongregasyon sa mga Saksi ni Jehova mitabang sa pagkuha sa nagkalapok nga mga gamit sa ilang Kristohanong mga igsoon. Ang lapok nga misuhop sa mga besti lisod labhan​—ug kinahanglang labhan nga kinamot diha sa bugnaw kaayong sapa. Human nga nahibaloan sa usa ka reporter sa mantalaan kining trabaho sa gugma, usa ka dakong hulagway sa mga Saksi nga nanglaba ang migula sa lokal nga mantalaan.

Ang mga baha nga nakahatag ug dakong kapildihan sa Uropa, Amerika del Norte, ug Asia nakaanod ug mga balay, propiedad, ug daghan kaayong inosenteng mga kinabuhi. Bisan pag dako kaayo kini nga kalamidad, kining mga hitaboa komon sa “kataposang mga adlaw” niining sistema sa mga butang, nga mailhan tungod sa “mga panahong lisod sagubangon.” (2 Timoteo 3:1) Ang mga kalamidad nga sama niana tingali magsilbi usab nga usa ka tin-awng pahinumdom niini nga kamatuoran: Ang matuod nga mga Kristohanon adunay gugma sa usag usa ug sa ilang mga silingan. Ang ingon niini nga dili-mahakogon nga gugma maoy butang nga dili mabanlas sa bagyo.

[Hulagway sa panid 10]

ALEMANYA—Usa ka balay nga naguba sa bagyo

[Mga hulagway sa panid 11]

ALEMANYA—Kapin sa 2,000 ka boluntaryo mitabang dihadiha

[Mga hulagway sa panid 12]

AUSTRIA—Nag-ayo sa ilang Kingdom Hall sa Ottensheim

Wala: Usa ka tem sa mga boluntaryo gikan sa Au, diin ilang gitabangan ang lokal nga mga Saksi ug mga silingan

[Mga hulagway sa panid 13]

MEXICO—Tuo: Usa ka komite sa pagpanghinabang nanghatag ug tubig nga mainom alang niadtong naluwas sa bagyo

Ubos: Nagtukod ug balay isip kapuli

[Mga hulagway sa panid 15]

KOREA—Gikan sa wala ngadto sa tuo: Gibahaan nga bahin sa siyudad; nagpasirit ug tubig aron sa paghinlo sa balay; nanglaba sa sapa sa duol