Gikan sa Among mga Magbabasa

Luwas ba ang Pagsakay ug Ayroplano? Ako 10 anyos ug nagpuyo sa California, T.B.A. Mapasalamaton ako sa Pagmata! tungod sa ulohang “Luwas Pa ba Gihapon ang Pagsakay ug Ayroplano?” (Disyembre 8, 2002) Adunay 47 ka tawo gikan sa akong tunghaan nga mobiyahe gikan sa San Diego paingon sa Sacramento. Nabalaka ako nga basin ang ayroplano mahagsa o ma-hijack. Apan ang maong artikulo nagpalig-on kanako, ug tungod sa impormasyon bahin sa gibag-ong mga metodo alang sa kaluwasan, ako mas masaligon. Sulayan ko nga makaabot kining gulaa sa tanan kong klasmet nga nahadlok o kulbaan nga mosakayg ayroplano.

V. M., Tinipong Bansa

Makamatay nga Misyon Natandog ako sa kasinatian ni Toshiaki Niwa sumala sa giasoy diha sa artikulong “Ang Makamatay nga Misyon nga Napulihan ug Makigdaitong Buluhaton.” (Disyembre 8, 2002) Natawo ako sa Pilipinas pipila ka tuig human sa Gubat sa Kalibotan II. Ang daghang estorya sa gubat nga gisugilon sa akong pamilya naglakip sa kapintasan sa mga sundalo. Sa dihang bata pa, ako mangutana, “Nganong makahimo man sila niana?” Ang kasinatian ni Brader Niwa naghatag ug dakong kalamdagan sa maong pangutana. Salamat sa pagpatik ug mga artikulo nga sama niini. Ang ingong pagbag-o sa kinabuhi maoy laing pamatuod sa talagsaong gahom ni Jehova.

A. C., Tinipong Bansa

Mga “Stem Cell” Ako magbabasa sa Pagmata! sulod na sa 20 anyos, ug sa tabang sa mga artikulo niini, nakabaton ako ug paninugdang kahibalo bahin sa daghang ulohan. Sa dihang ang mga tawo misugod paghisgot bahin sa cloning ug mga stem cell, wala ko hisabti kon sa unsang paagi ang pipila ka tisyu magama sa gawas sa lawas sa tawo. Tungod sa seryeng “Mga ‘Stem Cell’​—Naghinobra na ba ang Siyensiya?” (Nobyembre 22, 2002), nasabtan ko na karon kon sa unsang paagi kini posible ug kon nganong ang maong ulohan kontrobersiyal.

F. M., Italya

Samtang nagbasa ako sa maong mga artikulo, ako nahadlok tungod sa mga metodo nga gigamit sa mga tawo sa pag-ayo sa grabeng mga sakit. Salamat kaayo sa inyong paningkamot sa pagtuki ug pagpatik niining mga artikuloha ug paghatag kanamo sa mga kamatuoran bahin niining mga butanga. Mas ikag kong gipaabot karon ang adlaw sa dihang ayohon sa Diyos ang tanan natong mga sakit.

T. F., Pilipinas

Pagpakita ug Gugma Ang artikulong “Pagpakita ug Gugma​—Usa ka Dugay ug Lisod nga Pagtaganag Hinabang” (Nobyembre 22, 2002) nakapahingangha kaayo kanako! Ang maayong mga resulta nga nahimo sa mga boluntaryo sa Houston niadtong daghang bulan maoy lig-ong ebidensiya nga ang tinuod nga gugma ginapakita taliwala sa katawhan sa Diyos ug ang atong Maglalalang dagayang nagapanalangin sa paningkamot sa iyang mga alagad.

C. T., Alemanya

Sa pagbasa sa maong artikulo, wala ko mapugngi ang akong mga luha. Sa dihang miawas ang Suba sa Elbe, 44 ka tawo gikan sa among kongregasyon ang giebakwet. Ang akong bana ug ako mahigugmaong gipapuyo sa usa ka pamilya sa among kongregasyon, ug ang among duha ka dagko nang mga anak lalaki gipapuyo sa laing pamilya. Sukad sa maong katalagman, ang among kongregasyon labi pang nasuod. Ingong usa ka pamilya, gipabilhan gayod namo ang panghinabang panahon sa mga katalagman sama niadtong nahitabo sa Houston.

S. R., Alemanya

Kalayo Gibasa ko nga maikagon ang artikulong “Ang Duha ka Dagway sa Kalayo.” (Septiyembre 22, 2002) Ugaling lang, supak ako sa kapsiyon nga nag-uban sa hulagway sa panid 25, nga nag-ingon: “Nakurat nga osa milikay sa sunog nga mikaylap sa Bitterroot River nga walog sa Montana.” Aduna koy gipadak-an nga samang hulagway, ug ang osa daw wala man makurat. Ang mga tigparasyut nga bombero sagad makakitag mga osa sa kadaplinan sa mga sunog nga ilang ginapalong, ug kining mga hayopa nagatilap sa minerales o nagaligidligid diha sa abo. Bisan sa dagkong mga sunog, kini nahibalo kon unsay buhaton. Kini sila daw dili maapektohan niana.

B. D., Tinipong Bansa

Ang “Pagmata!” nagtubag: Salamat sa komento. Hinuon, walay usa ang tinong makasulti kon unsa gayod ang bation sa mga hayop sa maong mga kahimtang, kon ugaling mobati man sila.