Nahibalo Ka Ba?

(Ang mga tubag niini nga pasulit makaplagan diha sa mga teksto sa Bibliya nga gihatag, ug ang bug-os nga listahan sa mga tubag gipatik sa panid 27. Alang sa dugang impormasyon, susiha ang publikasyong “Insight on the Scriptures,” nga gipatik sa mga Saksi ni Jehova.)

1. Unsang gingharian ang gimandoan nila ni Ciro, Dario, Ahasuero, ug Artajerjes? (Esdras 4:​5-7)

2. Sa pag-ilustrar sa dako kaayong gahom sa dila sa pagkontrol sa tibuok lawas, gitandi ni Santiago ang dila sa unsa? (Santiago 3:​3, 4)

3. Kinsa ang gikataho nga unang tawong migamit sa ngalan sa Diyos? (Genesis 4:1)

4. Diin nahisulat ang mga ngalan niadtong nagpamatuod sa ilang kaugalingon nga matinumanon ug maunongon ngadto kang Jehova? (Pinadayag 20:12)

5. Ang kahubitan sa Leviatan diha sa Job 41:​1-​34 mohaom gayod sa unsang mananap?

6. Unsay gihimo ni Rayna Vasti nga nakapasuko kang Haring Ahasuero, nga maoy hinungdan nga siya gitangtang sa pagkarayna? (Ester 1:​12, 19)

7. Sa 12 ka tawo nga gisugo ni Moises sa pag-espiya sa yuta sa Canaan, kinsa ang mibalik uban ang maayong taho? (Numeros 14:​6-8)

8. Unsa ka dugay bilanggoon si Satanas sa kahiladman? (Pinadayag 20:​1-3)

9. Unsay gigamit ni Elias sa pagtudlo kang Eliseo ingong iyang manununod? (1 Hari 19:​16, 19)

10. Sa dihang gihagit ang awtoridad ni Moises ug Aaron, sa unsang paagi gipakita ni Jehova nga si Aaron ug ang iyang panimalay mao ang napili sa paghupot sa katungdanan sa pagkasaserdote? (Numeros 17:​1-​11)

11. Kinsa ang unang gisaad ni Saul nga ihatag kang David ingong asawa? (1 Samuel 18:17-​19)

12. Unsang matang sa tubag ang “makapahilayo sa kaaligutgot”? (Proverbio 15:1)

13. Ingon sa gipunting ni Jesus, kinsay miingon nga ang usa ka lalaki ug ang iyang asawa “mahimong usa ka unod”? (Mateo 19:​4-6)

14. Sa dihang giakusar sa mga Hudiyo si Pablo nga nagdanig mga tawo ngadto sa laing tinuohan diha sa pagsimba sa Diyos, kinsay mihukom nga dili na angay ipadayon ang kaso tungod kay kadto dili paglapas sa Romanhong Balaod? (Buhat 18:12-​16)

15. Sa ilustrasyon ni Jesus sa usa ka tawong hamili nga mibiya sa balay “aron makahupot ug harianong gahom,” unsay gihatag ngadto sa mga ulipon? (Lucas 19:12-​24)

16. Sa unsang bulan nahuman ni Solomon ang pagtukod sa templo sa Jerusalem? (1 Hari 6:38)

 Tubag sa Pasulit

1. Persia

2. Usa ka gamayng timon sa dakong barko

3. Eva

4. “Ang linukot nga basahon sa kinabuhi”

5. Buaya

6. Midumili siya sa pag-atubang sa hari

7. Josue ug Caleb

8. 1,000 ka tuig

9. Iyang opisyal nga besti

10. Sa tanang sungkod sa mga lider sa 12 ka tribo, ang sungkod lang ni Aaron ang namutot ug namungag hinog nga mga almendras

11. Iyang kamagulangang anak nga babaye, si Merab

12. Malumo

13. Ang Diyos

14. Galio, prokonsul sa Acaya

15. Usa ka mina

16. Bul, ang ikawalo nga bulan sa sagradong kalendaryo