Wala nay Daotang mga Panahon!

“ANG modernong tawo nawad-an ug pagtahod sa yuta tungod sa iyang kahakog alang sa kahayahay, katulin ug komersiyal nga ganansiya.” Kana ang mabasa diha sa hapin sa librong 5000 Days to Save the Planet. Nagkinabuhi kita karon uban sa mga resulta sa kadalo sa tawo. Ug kon tinuod ba o dili ang mga teoriya bahin sa pag-init sa temperatura sa yuta, ang usa ka butang segurado​—ginadaot sa tawo ang atong matahom nga planeta. Ang atong bugtong paglaom mao ang katumanan sa saad sa Bibliya nga ang Diyos ‘maglaglag sa mga nagalaglag sa yuta.’​—Pinadayag 11:18.

Pulihan sa Diyos ang hiwing sistema sa tawhanong pagmando ug bag-ong sistema. Sa dili pa isalikway ang maong ideya ingong relihiyosong binuang, tagda kini: Kinsay mas nahibalo bahin sa mga panginahanglan sa kalikopan sa yuta kay sa Maglalalang niini? Dili ba siya may katungod kon unsay mahitabo niining planetaha isip tag-iya niini? Gitin-aw sa Bibliya nga siya may katungod, nga nag-ingon sa Isaias 45:18 nga si Jehova mao “ang matuod nga Diyos, ang Mag-uumol sa yuta ug ang Magbubuhat niini, Siya nga mao ang Usa nga lig-ong nagtukod niini, nga wala maglalang niini sa wala lamay kapuslanan, nga nag-umol niini aron pagapuy-an.” Aron matuman ang maong katuyoan, ang Diyos makabalda ug mobalda.

Himoon kini sa Diyos pinaagi sa pagpasulod sa usa ka bag-ong kagamhanan, o gingharian, aron magdumala sa yuta. Sa dihang ang mga Kristohanon moampo sa ginganlag Pag-ampo sa Ginoo ug moingon, “Paanhia ang imong gingharian,” ilang gipangayo nga ang maong kagamhanan maoy mopuli sa pagmando. (Mateo 6:​9, 10) Ang Gingharian o kagamhanan sa Diyos molihok nga nakasabot sa makutihong mga siklo sa kinaiyahan sa yuta. Busa kini makapasig-uli sa mga luna sa yuta nga gidaot sa polusyon ug sa pag-abuso sa kalikopan. Ang Isaias 35:​1, 6 nag-ingon: “Ang desyertong kapatagan . . . mamulak sama sa safron. . . . Kay sa kamingawan ang mga tubig mobugwak, ug ang mga sapa sa desyertong kapatagan.”

Hangtod ang Diyos Mobalda

Human sa mga baha sa 2002, si Helmut Schmidt, kanhi kansilyer sa Kasadpang Alemanya, misulat: “Walay makapugong nga maguba ang mga dike tungod sa mga elemento sa kinaiyahan. Ang mga katalagman padayong nagkahitabo.” Matuod. Ug kon mohugpa ang daotang mga panahon, ang mahimo lamang sa mga tawo mao ang pagsagubang niana kutob sa mahimo. Apan, bisan pa sa tanang kasakitang gipahinabo sa maong mga katalagman, kini mahimong adunay mapuslanong epekto. Kana makapalihok sa mga tawo sa  pagpasundayag sa gugma ug pagkamahunahunaon alang sa ilang mga silingan. (Marcos 12:31) Pananglitan, ang mga baha sa Uropa daw may ingong epekto diha sa pipila ka tawo. Usa ka mantalaan misulat: “Ang maikagong mga boluntaryo naggikan sa tibuok Alemanya sa paghimo sa trabaho [sa panghinabang]. Kini ang kinadak-ang pagboluntaryo sukad sa Gubat sa Kalibotan II.”

Nalakip sa maong mga boluntaryo ang daghang Saksi ni Jehova. Ang sunod artikulo maghisgot sa panghinabang nga gihimo sa mga Saksi sa upat ka lainlaing nasod nga naapektohan sa mabangis nga mga bagyo. Ang panggawi sa maong mga Kristohanon maoy pasiuna sa pagkinabuhi ubos sa pagmando sa umaabot nga kagamhanan sa Diyos, diin ang gugma ug inigsoong pagkamahunahunaon​—dili ang kadalo ug kahakog​—maoy molungtad.​—Isaias 11:9. *

Ang mga Kristohanon mahimong magkalipay sa saad sa Diyos nga gipahayag ngadto sa karaang mga Israelinhon: “Ako usab magahatag ug ulan alang sa inyong yuta sa tinudlong panahon niini, ulan sa tinghunlak ug ulan sa tingpamulak.” (Deuteronomio 11:14) Kana nga saad matuman usab alang sa mga mabulahan nga makapuyo sa bag-ong kalibotan sa Diyos​—usa ka kalibotan nga wala nay daotang mga panahon.

[Footnote]

[Kahon/Hulagway sa panid 9]

Hingpit nga Pagkontrolar sa Panahon

Sa bag-ong kalibotan sa Diyos, ang mga tawo dili na mahadlok nga ang ilang balay o mga tanom madaot tungod sa katingad-anang mga bagyo. (2 Pedro 3:13) Ang Bibliya nagpatin-aw nga ang Diyos ug ang iyang Anak, si Jesu-Kristo, bug-os may katakos sa pagkontrolar sa panahon. Tagda ang mosunod nga mga teksto.

◼ Genesis 7:4: “[Sa] pito na lamang ka adlaw ako magpaulan diha sa yuta kap-atan ka adlaw ug kap-atan ka gabii.”

◼ Exodo 14:21: “Si Jehova nagpabalik sa dagat pinaagi sa usa ka makusog nga hangin nga timog sa tibuok gabii ug naghimo sa dulang sa dagat nga mamalang yuta, ug napikas ang katubigan.”

◼ 1 Samuel 12:18: “Si Samuel mitawag kang Jehova, ug si Jehova nagpadalugdog ug nagpaulan niadtong adlawa, mao nga ang tibuok katawhan nahadlok pag-ayo kang Jehova ug kang Samuel.”

◼ Jonas 1:4: “Si Jehova nagpadalag usa ka makusog nga hangin ibabaw sa kadagatan, ug miabot ang usa ka kusog kaayong bagyo sa dagat; ug bahin sa barko, kini hapit na maguba.”

◼ Marcos 4:​39: “Niana siya [si Jesus, nga gihatagag gahom sa Diyos] mibangon ug gibadlong ang hangin ug miingon sa dagat: ‘Hilom! Magmalinawon!’ Ug ang hangin milurang, ug miabot ang dakong kalinaw.”

[Mga hulagway sa panid 8, 9]

Sa bag-ong kalibotan sa Diyos, dili na kita mahadlok sa peligrosong mga kahimtang sa panahon