Mga Pagpili nga Makaapektar sa Imong Panglawas

KASAGARAN nga mahimong problema ang pagkaog sustansiyadong pagkaon ug pagpabiling himsog. Tungod sa kapuliki karon, morag mas kombenyente ang pagkaog giproseso, sayon-andamon nga mga pagkaon imbes maghikay ug preskong mga lutoonon ug mas haruhayng magpalabay sa libreng panahon atubangan sa TV o kompiyuter kay sa paghimog pisikal nga kalihokan. Apan, kini nga mga pagpili mahimong mopahinabo ug grabeng mga problema sa panglawas diha sa nagkadaghang hingkod ug mga kabataan.

Ang magasing Asiaweek nag-ingon nga sa Asia, “ang mantikaon ug tam-is kaayo nga mga pagkaon ug pirmeng paglingkod nakapatungha ug epidemya sa diabetes.” Makapatugaw ang paghunahuna nga nagkaus-os ang edad sa batan-ong mga membro sa katilingban nga nabiktima niining sakita. Ug sa Canada “nakaplagan sa mga tigpanukiduki nga usa lang sa pito ka batan-on nga wala pay 13-anyos ang mokaog igong gidaghanon sa mga prutas ug utanon [ug] nga kapin rag gamay sa katunga ang magdula hangtod sa punto nga sington,” nagtaho ang The Globe and Mail. Kini nga estilo sa kinabuhi ‘ahat nga makahatag niining mga bataa ug sakit sa kasingkasing inigkaedad nilag 30,’ matod sa taho.

Sa susama, ang mga eksperto bahin sa pagkatulog nag-ingon nga ang mga hamtong magkinahanglan ug mga walo ka oras nga katulog matag gabii ug nga ang mga batan-on magkinahanglan ug labaw pa. Sa pagkatinuod, sa usa ka pagtuon sa University of Chicago, ang himsog nga batan-ong mga lalaki nga may upat ka oras lang nga katulog sa sunodsunod nga unom ka gabii nagsugod sa pagpakitag mga simtoma sa mga sakit nga kasagarang bation sa mga edaran. Bisan tuod gisakripisyo sa daghang tawo ang bililhong mga oras sa pagkatulog aron makagugol ug mas daghang panahon sa trabaho, tunghaan, o kalingawan, ang mga resulta dili maayo. “Lahi ang pagtinguha nga makalihoklihok,” nag-ingon ang tigpanukiduki bahin sa pagkatulog sa Cornell University sa New York nga si James Maas, “ug lahi kaayo ang pagtinguha nga mahimong alisto, mamugnaon ug dili mahitagpilaw samtang nagdrayb sa haywey.”

Siyempre, dunay ubang mga butang nga makaapektar usab sa atong pisikal nga kaayohan. Ang positibong panglantaw, pananglitan, makahatag ug kaayohan sa atong panglawas. Ug ang pagbaton ug tinuod nga katuyoan sa kinabuhi makadasig kanato sa paghimog mga pagpili nga motabang kanato sa pagpabiling himsog.